Dikuatshisha ditudi mua kupeta ne lukasa
1. Mmunyi mudi bamue mua kuteketa mu nyuma?
1 Muanetu Anna uvua wenza mudimu uvua umuangata diba dia bungi. Kabidi bayende kavua muena Kristo to. Nunku, uvua ne lutatu bua kubuela mu bisangilu, bua kuyisha ne bua kudilongela Dîyi dia Nzambi. Nansha mutshivuaye munange Yehowa, kavua kabidi uyisha to. Kadi diakalenga, bakulu bakalua kumuambuluisha.
2. Mmushindu kayi udi bena Kristo bonso mua kuikala dikuatshisha dia kupeta ne lukasa?
2 Padi muntu witaba diambuluisha didiye upeta mu tshisumbu, udi uleja mudiye weyemena Yehowa. Bakulu badi bidikija mushindu uvua Yezu ulama bayidi bende ne dinanga dionso patubu bakeba mishindu ya kukolesha ne kuambuluisha badi batekete mu nyuma. Misangu ya bungi, bitu bikengela anu mêyi makese mimpe mangatshila mu Bible. Kudienzeja bua kuambuluisha bantu badi batekete mu nyuma bua tshitupa tshîpi mbualu budi butangila bena Kristo bonso, ki mbua bakulu nkayabu to. Kakuyi mpata, tuetu bonso tudi bamanye bukole budi nabu ‘dîyi dimpe diamba mu tshikondo tshiakane.’—Nsu. 25:11; Yesh. 35:3, 4.
3, 4. Kuambuluisha bakuabu kudi kulomba tshinyi? Tudi mua kubambuluisha mushindu kayi?
3 Uye kudibu: Tudi tuleja mutudi tutabalela bantu badi dijinga ne diambuluisha patudi tuya kudibu, tubaleja dinanga ne muoyo mujima. Tshilejilu, pakumvua Yonatana ne: Davidi uvua mu lutatu, ‘wakajuka, wakaya kudi Davidi pakadiye muitu, wakamukolesha mu maboko.’ (1 Sam. 23:15, 16) Keba mushindu mulenga wa kuambuluisha bakuabu. Mêyi malenga adi afumina mu mutshima atu ambuluisha bikole. Yezu wakaleja kabidi ne: bua kuambuluisha muanetu bua kupetulula makanda a mu nyuma, bidi bikengela kudifila ne muoyo mujima katuyi tupua muoyo kipatshila ketu. (Luka 15:4) Kujinga ne muoyo mujima bua kuambuluisha bakuabu nekutusake bua kutungunuka amu ne kuambuluisha muntu nansha yeye kayi ushintuluka diakamue.
4 Tuetu balombe bantu bu mudi bena mu kasumbu ketu ka dilonga dia mukanda bua kutufila mu buambi, nebibambuluishe bikole. Patudi tuambuluisha muena Kristo netu bua kuyisha, tudi mua kubuelelapu bua kumukolesha mu nyuma. Dîba ditudi tupitshisha pamue mu mudimu wa Yehowa didi diambuluisha nangananga bantu bakavua batshioke mu nyuma.
5. Imue misangu bakulu badi mua kupesha bamue bantu diambuluisha kayi?
5 Ndongoluelu mulenga: Bantu bakadi benze matuku kabayi bayisha anyi babuela mu bisangilu badi mua kupeta diambuluisha dia pa mutu bua kukolesha ditabuja diabu. Imue misangu, kulonga nabu patupu mukanda bu mudi wa Tutendelelayi Nzambi umuepele mulelela anyi wa Approchez-vous de Jéhovah anyi wa Bible utu ulongesha tshinyi menemene? nkukumbane. Dilonga edi kadiena ne bua kuenza matuku a bungi to, bualu muntu eu ukadi mutambule. Komite wa Mudimu wa Tshisumbu neakebe bua kumanya bantu badi bakumbanyine kulonga Bible nunku.—Tangila mandamuna ku nkonko yenu mu Mudimu wetu wa Bukalenge wa Kasuabanga 1998 ne wa Kasuabanga 2000.
6. Mmunyi muakapeta tshiakabidi muanetu wa bakaji mukuabu bukole bua mu nyuma?
6 Anna wakitaba ne disanka dionso bua kulonga Bible ne muanetu wa bakaji uvua mukole mu nyuma uvua bakulu bamusunguile. Bakalonga anu misangu inayi patupu, Anna kupetulula malanda mimpe ne Yehowa. Wakatuadija kabidi kubuela mu bisangilu ne wakapeta kabidi dijinga dia kutumbisha Yehowa Nzambi ku mêsu kua bantu bonso. Muanetu wa bakaji eu wakambuluisha kabidi Anna pavuaye uya kulombola nende malonga makuabu a Bible too ne muakapeta Anna bukole bua kuyisha ku nzubu ne ku nzubu. Anna uvua anu dijinga ne diambuluisha patupu bua kutuadijilula midimu ya mu nyuma.
7. Kukolesha bakuabu mu nyuma kudi kupetesha masanka kayi?
7 Kuambuluisha badi batekete mu nyuma kudi kupetesha bantu bonso masanka. Muntu udibu bambuluishe udi ne disanka bua mudiye mupingane kudi Yehowa ne mutuadije kabidi midimu ya bena Kristo. Bakulu badi basanka padibu bamona muntu eu udiunda mu nyuma. (Luka 15:5, 6) Padi bena mu tshisumbu bambuluishangana ne dinanga, badi bashemeja malanda abu, ne tshisumbu netshikale mu buobumue. (Kolos. 3:12-14) Bushuwa, tudi ne disanka dia kuidikija Yehowa, udi muikale dikuatshisha ditudi mua kupeta ne lukasa!—Ef. 5:1.