Manyisha buimpe bua Yehowa bikole menemene
1. Ntshinyi tshidi tshitusaka bua kumanyisha buimpe bua Yehowa?
1 ‘Yehowa, bunene ne bukole ne butumbi ne kutamba ne bulengele butambe mbiebe; bualu bua bintu bionso bia mu diulu ne bia pa buloba mbiebe.’ (1 Kul. 29:11) Dinanga ne dianyisha bitudi nabi kudi Yehowa bidi bitusaka ku tshinyi? Bidi bitusaka bua ‘kuamba buimpe bua Nzambi wakatubikila bua kutupatula mu mîdima bua kutubueja mu munya wende wa dikema.’ (1 Pet. 2:9) Katuakulekela kuambila bantu bua Nzambi wetu munene to. Netupete mushindu wa kumanyisha buimpe bua Yehowa mu ngondo muisatu, muinayi ne muitanu emu.
2. Mmudimu kayi wa pa buawu wenzeka bua kumanyisha bualu bua Tshivulukilu? Kadi mbanganyi bawenza?
2 Mudimu wa pa buawu wa dimanyisha bualu bua Tshivulukilu: Mu Dimue dia matuku 2 a ngondo muinayi, netumanyishe buimpe bua Yehowa pa kuenza tshibilu tshia Didia dia Mukalenge. Netuabanye mabeji a kubikila nawu bantu mu Tshivulukilu pa buloba bujima kutuadijila ku dituku dia 17 ngondo muisatu too ne ku dituku 2 dia ngondo muinayi. Tudi tulomba bantu bonso bua kuenza mudimu eu kuwenzelamu. Matuku au neikale matuku mimpe a bantu badi bakumbaja malu malomba kuluabu bambi ba lumu luimpe. Wewe ne balongi ba Bible anyi bana badi mua kukumbaja malu aa, manyisha bakulu.
3. Ntshinyi tshitudi mua kuamba bua kubikila bantu mu Tshivulukilu?
3 Netuenze mudimu eu anu mutuvua benze wa dimanyisha bualu bua Mpungilu wa Distrike wa “Lupandu luetu lukadi pabuipi.” Nebatumine bisumbu mabeji bungi bukumbane bua mumanyishi yonso kupeta ende 50 ne mpanda-njila yonso 150. Udi mua kuamba anu mêyi makese bu mudi: “Diebe dibeji dia kukubikila nadi mu tshibilu tshinene tshia ku tshidimu tshionso tshituenza mu matuku makese emu ndiodi edi. Tudi bakuindile ne muoyo mujima. Malu makuabu adi anu mu dibeji emu.” Kadi bikala muntu ne nkonko, umuandamunayi. Tshiena-bualu tshia Didia dia Mukalenge tshidi mu dibeji dia 206 mu mukanda wa Bible ulongesha tshidi mua kukuambuluisha. Mu Disambombo ne mu Dia lumingu dionso, netufile bibejibeji pamue ne mabeji au. Angata mêna a bonso badi bakuakidile bimpe, ubapinganyine.
4. Mmushindu kayi utuabanya mabeji a kubikila nawu bantu mu Tshivulukilu?
4 Bikalaku mushindu, mabeji aa nuapeshe muntu yonso anu ku bianza. Kadi, muntu yonso afunde nzubu idi bantu kabayiku bua kulua kubapinganyina dîba dikuabu. Lumingu lua ndekelu lua kumpala kua Tshivulukilu, bisumbu bikala bishale ne mabeji a dibikila nawu bantu a bungi nebiashile bantu bikala bamanyishi kabayi basangane ku mabu. Kabaafidi kumpala kua lumingu alu to! Kanupu muoyo bua kuapesha bantu banutu nupinganyina, balongi ba Bible, balela benu, bena mudimu nenu, bena mutumba, nansha bamanyangana nabu bonso.
5. Bua tshinyi tudi ne bua kutuadija kudilongolola bua kulua bampanda-njila bambuluishi?
5 Bampanda-njila bambuluishi: Kuenaku mua kulua mpanda-njila muambuluishi mu ngondo muisatu ne muinayi ne muitanu bua kumona mua kumanyisha buimpe bua Yehowa bikole anyi? Bua kuenza mudimu eu, nebikulombe pamuapa bua kushintulula programe webe wa dituku dionso. (Ef. 5:15-17) Umanye ne: patudi tuyisha bikole, tudi tupeta disanka ne Yehowa udi utubenesha. (Nsu. 10:22) Bu mukadi matuku a Tshivulukilu masemene pabuipi, tuadija kudilongolola.—Nsu. 21:5.
6. Bualu bua muanetu wa bakaji mukuabu uvua mpanda-njila tshidimu tshishale budi butulongesha tshinyi?
6 Muanetu wa bakaji mukuabu wa bidimu 90 uvua mpanda-njila muambuluishi tshidimu tshishale. Udi wamba ne: “Nansha mumvua munange bikole budimi buanyi ne musue kutuadija kukunamu bintu, ngakamona ne: mbimpe kuteka malu a mushinga mukole pa muaba wawu. Ke meme kulua mpanda-njila muambuluishi mu ngondo muisatu.” Mudimu eu uvuaku mumupeteshe masanka anyi? Eyowa, bualu mmuambe ne: “Mpindieu tudi balue kulamatangana ne bena mu tshisumbu bikole, ne bualu ebu mbukoleshe bulunda buanyi ne Yehowa bikole menemene.” Kuenaku mua kutangila programe webe bimpe ne kumona ni kudi malu audi ne bua kuakaja anyi?
7. Mbikole bua kuikala mpanda-njila muambuluishi anyi?
7 Umanye ne: ki mbikole bua kuenza mêba 50 atu bampanda-njila bambuluishi bafila to. Konkonona malu ebe onso bimpe, uleje Yehowa bualu ebu mu disambila ne ubufunde mu programe webe. Udi mudimanye, mumanye ne tshidi nsombelu webe bimpe. Biwikala ne mubidi wa tusamasama, kuyi ne bukole bua bungi, udi mua kuenza programe wa kuyisha anu mêba abidi ku dituku. Kadi wewe wenza mudimu udi ukuangata mêba a bungi anyi ulonga kalasa, udi mua kukumbaja mêba 50 wewe uyisha mu dinda anyi ku dilolo, nansha ku ndekelu kua lumingu.
8. Ntshinyi tshivua tshiambuluishe muanetu mukuabu ne mukajende bua kuluabu bampanda-njila bambuluishi?
8 Ba bungi mbakokeshe bua kuenza mudimu eu ne ba mu mêku abu. Muanetu mukuabu ne mukajende bavua bidimu kumpala batshina bua kuenza mudimu eu bualu bavua bamona ne: malu avuabu nawu kaavua abapetesha mushindu wa kuwenza to. Bakenza tshinyi? Badi bamba ne: “Tuakalomba Yehowa bua atuambuluishe bua kukumbaja tshituvua basue kuenza kukadi matuku a bungi.” Bakenza programe muimpe ne kuluabu bampanda-njila. Ke kuambabu ne: “Bivua bimpe bia lufu! Tuakapeta masanka a bungi. Tshitudi mua kunuambila tshidi amu ne: Tetayi penu, nenukokeshe bua kuwenza anu mutuvua baukokeshe petu.”
9. Ntshinyi tshinuenza mu dilonga dienu dia mu dîku dia musangu walonda bua kudilongolola bua mudimu wa mu ngondo idi kumpala eku?
9 Mu dilonga dienu dia mu dîku dia musangu walonda, yukilayi bua mushindu unudi mua kuyisha bikole mu ngondo idi kumpala eyi. Nansha bikala bena mu dîku dienu bonso kabayi bakokeshe mua kulua bampanda-njila bambuluishi, nudi mua kuambuluisha umue wa kunudi bua kulua mpanda-njila. Bikala nansha umue wa kunudi kayi mua kuenza mudimu eu, nudi mua kudifundila tshipatshila tshia kuyisha bikole mu ngondo eyi.
10. Bua tshinyi tudi ne bua kuambila bakuabu ne: tudi basue kuenza bumpanda-njila mu matuku a Tshivulukilu?
10 Tuambuluishanganayi: Disanka ditu diambulukilangana. Ambila bakuabu dijinga diebe dia kulua mpanda-njila muambuluishi. Bualu ebu nebusake bakuabu bua kulua pabu bampanda-njila. Pashishe yukila ne bana betu bavua bampanda-njila ngondo mishale bua bakuleje tshivuabu benze bua umone mua kuakaja programe webe. (Nsu. 15:22) Wewe mumone ne: udi mua kuenza mudimu eu, kuenaku mua kuambila muanetu mukuabu udi pamuapa ne nsombelu wa buena webe bua nuenu kuwenza nende anyi?
11. Ntshinyi tshidi bakulu mua kuenza bua kujula bantu dijinga dia kulua bampanda-njila ngondo idi kumpala eku?
11 Bakulu ba bungi batu baditatshishaku pabu bua kuenza mudimu eu wa pa buawu. (Eb. 13:7) Bualu ebu butu bukolesha bena mu tshisumbu bikole be! Bakulu badi kabidi bakankamija bana betu padibu bayukila nabu bua mudimu eu. Badi mua kubakankamija anyi kubaleja imue ngenyi mimpe bua kubasaka bua kuwenza. Mutangidi wa mudimu nealongolole bisangilu bikuabu bia buambi bua bantu kuyishabu pamue panyima pa mêba a mudimu anyi padi balongi bapatuka mu tulasa. Nuikale nuvuluija bena mu tshisumbu programe eu misangu ya bungi. Mutangidi eu alongolole kabidi bua muntu yonso ikale ne wende teritware ne mikanda idi ikengela.
12. Wewe mupangile mua kulua mpanda-njila muambuluishi, ntshinyi tshiudi mua kuenza?
12 Nansha wewe mupangile mua kulua mpanda-njila muambuluishi, udi mua kukankamija badi benza mudimu eu ne kusambila bua bualu buabu. (Nsu. 25:11; Kolos. 4:12) Udi nansha mua kuenza programe wa kuyisha nabu dituku dikuabu munkatshi mua lumingu anyi kunenga mu buambi paudi uyisha nabu kupita muutu wenza pa tshibidilu.
13. Nebikale dijinga ne bampanda-njila bungi kayi mu ditunga dia Congo-Brazzaville ne dietu edi? Kadi ntshinyi tshidi tshisumbu tshienu mua kuenza bua kubukumbaja?
13 Tudi dijinga ne bampanda-njila 22 750 mu ngondo muinayi: Mu tshidimu tshia 2000 ditunga dia Congo-Brazzaville divua ne bampanda-njila bambuluishi 556 ne dietu edi divua nabu 8 260 mu 1997. Nunku tshipatshila tshietu ntshia kupetaku bampanda-njila bambuluishi 750 mu Congo-Brazzaville, 22 000 mu Congo-Kinshasa mu ngondo muinayi. Bua kukumbaja tshipatshila etshi, bidi bikengela bua mumanyishi 1 pa 6 mu tshisumbu tshionso kuluaye mpanda-njila muambuluishi. Tudi bamanye ne: bimue bisumbu nebipete bamanyishi badi mua kuenza mudimu eu ba bungi. Mbitekete bua bisumbu bia bungi kukumbajabi tshipatshila tshiabi etshi. Elabi meji! Bualu ebu se nebusanguluje bena mu tshisumbu tshienu, kubambuluishabu bua kuyisha kabidi bikole mu teritware wenu!
14. Bua tshinyi mbitekete bua kulua mpanda-njila muambuluishi mu ngondo muinayi?
14 Bua tshinyi ngondo muinayi mmuimpe bua kulua mpanda-njila muambuluishi? Bualu Tshivulukilu netshienzeke ku ntuadijilu kua ngondo, nunku netupete mushindu wa kuya katangila bantu bavua babuelamu pa lukasa. Netupeshe bantu bibejibeji bua kumona mua kubapesha kabidi mukanda wa Bible ulongesha patudi tubapinganyina ne kutuadija kulonga nabu Bible. Kuikala mpanda-njila muambuluishi mu ngondo muinayi nekutupeteshe mishindu ya bungi ya kutuadija kulonga Bible ne bantu. Kabidi ngondo muinayi udi ne matuku a Dia lumingu atanu ne dikisha dikese bua bena mudimu ne balongi. Nunku, neikale ngondo muimpe udi bena mudimu ne balongi mua kulua bampanda-njila bambuluishi.
15. Bua tshinyi tudi ne bua kuenza malu ne lukasa padi matuku a Tshivulukilu enda asemena pabuipi?
15 Padi Tshivulukilu tshia tshidimu tshionso tshipita, tudi tumbushila tshidimu tshimue ku bidi bitushadile bua kufika ku nshikidilu wa tshikondo etshi. Nkutushadile dîba dikese menemene bua kumanyisha bantu bualu bua Nzambi wetu munene. (1 Kol. 7:29) Padi matuku a Tshivulukilu anu apita, mpunga mimpe ya kutumbishila Tatu wetu wa mu diulu ivuawu matupeteshe idi payi ipita kashidi kashidi. Nunku, tudilongololayi kutuadijila anu ku mpindieu bua kuenza muetu muonso mu ngondo muisatu ne muinayi ne muitanu bua kumanyisha buimpe bua Yehowa.
[Kazubu mu dibeji 4]
Tudiku mua kupeta bampanda-njila bambuluishi 22 750 mu ngondo muinayi anyi?
▪ Teka malu malondangane bilondeshile mushinga wawu
▪ Yukilayi mu dîku bua bipatshila bia nuenu kudifundila
▪ Ambila bakuabu biudi mulongolole bua kuenza