Mua kutuadija kulonga Bible ne bantu batudi tushila bibejibeji
1. Ntshipatshila kayi tshitudi natshi patudi tupesha bantu bibejibeji?
1 Mu Disambombo dionso, tutu tupesha bantu Tshibumba tshia Nsentedi ne Réveillez-vous! mu buambi. Kadi kupesha bantu bibejibeji ke bualu bua kumpala bututu tuenza bua kufika ku dilongesha bantu ba muoyo muimpe bulelela. Kuinshi eku kudi imue ngenyi ya mua kufila mukanda wa Bible ulongesha patudi tupinganyina bantu ne kutuadija kulonga nabu. Nudi mua kuyakaja bilondeshile teritware wenu ne kuyamba mu enu mêyi. Nudi kabidi mua kuyisha ne imue ngenyi inuamona ne: mmimpe buenu nuenu.
2. Mmunyi mutudi mua kutuadija kulonga ne muntu ku diambuluisha dia mabeji a kuntuadijilu kua mukanda wa Bible ulongesha?
2 Enza mudimu ne mabeji a kuntuadijilu: Paudi upinganyina muntu, udi mua kumuambila ne: “Tshibejibeji tshimvua mukushile atshi tshidi tshiakula bua Bible. Mpindieu tangila bua tshinyi kubala Bible kudi ne mushinga.” Bala Yeshaya 48:17, 18; Yone 17:3; anyi mvese mukuabu udi muakanyine. Pashishe, wewe mumane kuleja muntu au mukanda wa Bible ulongesha ne mumupeshe wende, udi mua kulonda lumue lua ku ngenyi idi kuinshi eku eyi:
▪ “Bible udi utulaya malu mimpe bua matuku atshilualua.” Muleje dibeji 4 ne 5 ne muebeja ne: “Ku malu onso aa, mbuepi buudi musue bua bukumbane?” Muleje nshapita udi wakula bua mvese udiye musungule ne bikalaye musue, konkononayi nende tshikoso tshimue anyi bibidi mu minite mikese.
▪ Anyi udi mua kuamba ne: “Mukanda wa Nzambi udi wandamuna nkonko ya mushinga itu bantu badiela.” Muleje dibeji 6, ne muebeje ne: ukatuku mudiele lumue lua ku nkonko idi kuinshi kua dibeji eyi anyi? Bulula nshapita udi wandamuna lukonko ludiye musungule ne konkononayi nende tshikoso tshimue anyi bibidi mu minite mikese.
▪ Anyi udi mua kumuleja bimue biena-bualu ku tshikebelu ne kumuebeja tshidi tshimusankisha. Bulula nshapita udiye musungule ne muleje mu tshikoso mututu tulonga ne bantu.
3. Mmunyi mutudi mua kutuadija kulonga Bible ne muntu utuvua bapeshe tshibejibeji tshidi tshiakula bua (a) nsombelu mukole udiku? (b) dîku? (c) mudi Bible mukanda wa kueyemena?
3 Shila muntu lukonko: Mushindu mukuabu wa kutuadija kulonga Bible ne muntu ngua kushiya bualu bunualua kuyukidila musangu udi ulonda. Muntu yeye mumane kuangata tshibejibeji, jula lukonko ne muambile ne: neulue kuluandamuna musangu udi ulonda. Umvuanganayi nende dituku dijalame ne wenze muebe muonso bua kupingana anu dituku adi. (Mat. 5:37) Paudi upingana, umuvuluija lukonko ne mu minite mikese muandamunalu ne mukanda wa Bible ulongesha. Mupeshe wende mukanda bua ikale wenda ulondesha paudi ubala. Tangila bimue bilejilu:
▪ Pikala tshibejibeji tshiudi ushila muntu tshiotshi tshiakula bua nsombelu mubi udiku pa buloba, udi mua kuamba ne: “Musangu udi ulonda netuyikidila pa tshidi Mukanda wa Nzambi wamba bua lukonko elu: Mmalu kayi ashintulule Nzambi pa buloba?” Paudi upingana, yukila nende malu adi mu dibeji 4 ne 5. Anyi udi mua kujula lukonko lua ne: “Makenga atu akuata bantu atu afuma kudi Nzambi anyi?” Paudi upingana, umuleje tshikoso tshia 7 ne 8 mu nshapita wa 1.
▪ Pikala tshibejibeji tshiudi upesha muntu tshiakula bua dîku, kumpala kua wewe kuya udi mua kujula lukonko elu: “Ntshinyi tshidi muena mu dîku yonso ne bua kuenza bua kusombabu bimpe?” Paudi upingana, nuyukidila pa malu adi mu nshapita wa 14, tshikoso 4.
▪ Pikala tshibejibeji tshiudi upesha muntu tshiakula bua mudi Mukanda wa Nzambi muikale mukanda wa kueyemena ne udi wamba bulelela, udi mua kujula lukonko elu: “Bible utuku wamba bulelela patudi tumufuanyikija ne malu a siyanse anyi?” Paudi upingana, konkononayi nende tshikoso tshia 8 tshia nshapita 2.
4. Ntshinyi tshitudi ne bua kuenza padi muntu ubenga bua kuangata mukanda wa Bible ulongesha?
4 Misangu yonso inudi nujikija kuyukila ne muntu, ela lukonko luwalua kuandamuna musangu udi ulonda. Paudi umona ne: nukadi nulonga pa tshibidilu, tuadijayi kulonga anu ku ntuadijilu kua mukanda too ne ku ndekelu. Kadi netuenze tshinyi muntu yeye mubenge bua kuangata mukanda wa Bible ulongesha? Tungunuka anu ne kumutuadila bibejibeji ne kuyukila nende pa imue mvese. Tuetu bamujule nyota ya bungi, udi mua kufika ku ditaba bua kulonga Mukanda wa Nzambi.
5. Bua tshinyi tudi ne bua kudifila bikole, pamutu wa kupesha anu bantu bibejibeji patupu?
5 Tshibumba tshia Nsentedi ne Réveillez-vous! bidi mua kujula muntu dijinga dia kumanya tshidi Mukanda wa Nzambi ulongesha menemene. Nunku, enza muebe muonso bua kutuadija kulonga ne bantu bonso badi bitaba bibejibeji. Tuetu benze nanku, tudi tutumikila dîyi dia Yezu dia ‘kuvuija bayidi, kubayisha.’—Mat. 28:19, 20.