Mandamuna ku nkonko yenu

▪ ‘Mupika wa lulamatu ne wa budimu’ utuku witabila Bantemu bua kudienzelabu abu makebulula a malu a mu Bible mu mikanda mikuabu anyi kuayukidilangana anyi?​—Mat. 24:45, 47, NW.

Tòo, kêna ubitabila to. Kadi, mu miaba mishilangane pa buloba bujima, bamue Bantemu bakadi benze tusumbu bua kuenza makebulula a malu a mu Bible mu mikanda ya bantu bakuabu. Bakuabu bakadi badienzele tuabu tusumbu bua kudilongelabu tshiena Ebelu ne tshiena Greke bia mu Bible bua kulondolola Bible wa Traduction du monde nouveau bua kumona ni mmujalame. Bakuabu kabidi badi balonga malu adi bena meji ba pa buloba bafunde pa bidi bitangila Bible. Mbenze miaba ku Internet bua kuikala bamanyishangana ngenyi idibu bapete ne bayikonkonona bonso pamue. Batu kabidi benza bisangilu biabu, bapatula ne mikanda bua kuleja malu adibu bapete mu makebulula abu ne bua kuasakidila ku malu atutu tulonga mu bisangilu bietu ne mu mikanda yetu.

Pa buloba bujima, Bantemu ba Yehowa batu bapeta malongesha a bungi mimpe a mu Bible ne mibelu mu bisangilu bia tshisumbu, mu mpuilu ne mpungilu ne mu mikanda ya bulongolodi bua Yehowa. Yehowa udi upesha bantu bende bidibu nabi dijinga ku diambuluisha dia nyuma wende ne Dîyi diende dia bulelela bua bikale bonso ‘bakajibue tshishiki mu meji amue ne mu lungenyi lumue’ ne bua ‘bikale bajadikibue mu ditabuja.’ (1 Kol. 1:10; Kolos. 2:6, 7) Bushuwa, tudi ne dianyisha dia bungi bua mudi Yehowa utulongesha mu matuku a ku nshikidilu aa. Nanku, ‘mupika wa lulamatu ne wa budimu’ kêna mua kuitaba mukanda, bisangilu anyi adrese wa ku Internet udiye kayi mupatule anyi udi kayi wa bulongolodi buetu to.​—Mat. 24:45-47, NW.

Tudi tulomba bantu bonso bua benze mudimu ne bieledi biabu bia lungenyi bua kutungunuja lumu luimpe. Kadi tshipatshila tshia muntu nansha umue katshiena ne bua kunyanga tshidi Yezu Kristo munkatshi mua dienza lelu pa buloba ku diambuluisha dia tshisumbu tshiende to. Mu bidimu lukama bia kumpala, mupostolo Paulo wakadimuija bena Kristo bua kabadibueji mu miyuki idi itshiokeshangana, yangata dîba dia bungi bu mudi ya kulondolola ‘mêna a bankambua malongolola adi kaayi ne ndekelu; malu aa adi avuija dikokangana, kaena avuija kudiunda kua mudimu wa Nzambi kudi ditabuja.’ (1 Tim. 1:3-7) Bena Kristo bonso badi ne bua kuenza muabu muonso bua ‘kuepuka diebejangana malu mapote ne mêna a bankambua malongolola ne kufuilangana bua mikenji; malu aa kaena mamanye mua kuvuijila muntu mushinga muimpe, adi patupu.’​—Tito 3:9.

Tudi tubela bantu badi basue kulonga Bible mu buondoke buende ne kuenza makebulula bua babale mukanda wa Étude perspicace des Écritures, “Toute Écriture est inspirée de Dieu et utile” anyi mikanda yetu mikuabu bu mudi idi yakula bua milayi ya mu Bible bu mudi mukanda wa Danyele, Yeshaya ne wa Buakabuluibua. Mikanda eyi idi ne malu mavule atudi mua kulonga nawu Bible ne kuelelapu meji bua kumona mua ‘kuujibua tente ne kumanya kua disua diende [dia Nzambi] mu meji onso ne dijingulula dia mu nyuma; ne bua kuenda mu bienzedi bidi biakanangane ne Mukalenge ku dimusankisha dionso, ne bua tuetu kukuama mamuma mu mudimu wonso muimpe, ne bua kudiundadiunda mu kumanya kuetu kua Nzambi.’​—Kolos. 1:9, 10.