Réveillez-vous! wa pa buende utuafila mu Kasuabanga

¹ Bantu ba bungi batu badiela nkonko ne muoyo mujima bua kumanya dikuatshisha didi nadi Bible. Batu badiebeja ne: Bikalabi ne: bantu ke badi bafunda Bible, mmunyi mudibu mua kumubikila ne: Dîyi dia Nzambi? Mmalu kayi adi mua kumfikisha ku ditaba ne: udi mua kundombola bimpe? Meme mudifile bikole ku dimubala ne dimulonga, ntshinyi tshingapeta? Nkudimuinu kayi wa Bible undi ne bua kubala ne kulonga? Eyi ngimue ya ku nkonko idibu bandamune mu Réveillez-vous! wa ngondo wa 11 udi ne tshiena-bualu ne: “Udi mua kueyemena Bible anyi?”

² Netudienzeje bua kuabanya Réveillez-vous! wa pa buende eu mu teritware wetu mujima. Kuoku mushindu, yisha ku nzubu ne ku nzubu pamue ne bena mu tshisumbu mu Disambombo dionso dia ngondo wa 11. Pesha balela bebe, bena mutumba nebe, bena mudimu nebe, balongeshi, balongi nebe ne bantu bautu uya kutangila mu buambi Réveillez-vous! eu. Kupu muoyo bua kuambula bibejibeji ebi paudi uya mu tshisalu anyi paudi wenza luendu. Bakulu badi ne bua kulomba bibejibeji ebi bia bungi bua bena mu tshisumbu bamone mua kupeta bungi bukumbane.

³ Tuadija kulonga Bible ne bantu: Paudi upesha muntu tshibejibeji etshi, udi mua kulongolola mushindu wa kutuadija dilonga dia Bible kumpala kua nuenu kulayangana nende. Tshilejilu udi mua kuamba ne: “Musangu udi ulonda, nenkuleje mudi Bible wandamuna lukonko elu lua ne: ‘Ntshinyi tshidi Nzambi mulongolole bua buloba?’” Paudi umupinganyina, ulue ne mukanda wa Bible ulongesha ne umuleje mu dibeji 4-5, anyi ukonkonone nende tshikoso 1-3 tshia nshapita 3. Anyi udi mua kuamba ne: “Musangu walonda, netuyukile pa mulayi kampanda uvuabu badianjila kumanyisha mu Bible udi wenda ukumbana mu matuku etu aa.” Paudi umupinganyina, umuleje nshapita wa 9 wa mukanda wa Bible ulongesha ne nukonkonone nende tshikoso 1-3. Peshi udi mua kuambila muntu au ne: “Bantu ba bungi batu ne lutatu lua kumvua bidibu babala mu Bible. Pangalua kabidi, nenkuleje muudi mua kumvua Bible bimpe menemene.” Paudi umupinganyina, umuleje mukanda wa Bible ulongesha ne mututu tuulonga ne bantu.

⁴ Anu Bible nkayende ke udi ne ‘mifundu ya tshijila’ idi mua kutuvuija ‘bena meji too ne ku lupandu.’ (2 Tim. 3:15) Nunku, tuetu bonso tudienzejayi bua kudifila ne muoyo mujima mu diabanya dia Réveillez-vous! eu wa pa buende bua kuambuluisha bantu bua bafike ku dieyemena Bible.