“Nudilame mu dinanga dia Nzambi”
1. Mukanda wa “Nudilame mu dinanga dia Nzambi” mmupatula ne tshipatshila kayi?
1 Tudi bindile ne mioyo kulu kulu bua kulonga mukanda mupiamupia wa “Nudilame mu dinanga dia Nzambi” mu Dilonga dia Bible dia Tshisumbu kubangila mu lumingu lua dia 23 ngondo muibidi. Mukanda eu nebawulonge mu Mfualansa ne mu Swahili; patuawupeta mu miakulu yetu mikuabu netuwulonge petu. Mu mukanda eu, Kasumbu Kaludiki nkafundile muntu yonso udi munange Yehowa mukanda udi ushikila ne mêyi aa: “Dijinga dietu ndia ne: mukanda eu unuambuluishe bua kutungunuka ne kutumikila Dîyi dia Nzambi mu nsombelu wenu bua nuenu kudilama mu ‘dinanga dia Nzambi too ne ku muoyo wa tshiendelele.’—Yuda 21.”
2. Mukanda eu neutuambuluishe mu malu kayi a mu nsombelu?
2 Malu atudi bindile bua kulonga: Mmushindu kayi udi mêyi a mu Bible atangila bualu bua balunda, bua dijikija lutetuku, bua dinemeka dia bamfumu, bua bibidilu bietu, bua dibaka, bua ngakuilu ne bua bilele bidi nabi bantu? Tuondo tuetu tua muoyo netuakanangane ne mikenji ya buakane ya mushinga mukole idi mu Dîyi dia Nzambi. (Mus. 19:7, 8) Patuikala tuenda tujingulula kabidi bikole tshidi meji a Yehowa, dijinga dietu dia kumusankisha neditusake bua kumutumikila mu malu etu onso a mu nsombelu.—Nsu. 27:11; 1 Yone 5:3.
3. Bua tshinyi mbimpe kudienzeja bikole bua kufila mandamuna lumingu luonso mu dilonga edi?
3 Pangadija bua kuandamuna: Paudi udilongolola, difundilaku tshipatshila tshia kutumbisha Nzambi munkatshi mua tshisumbu tshia bantu bende. (Eb. 13:15) Tshisumbu tshijima netshilongele mukanda eu mupiamupia kaba kamue. Bu mutuikala tulonga anu bikoso bikese ku lumingu, nebituambuluishe bua kudilongolola bimpe menemene ne bua kupeta muoyo mukole wa kumvuija bana betu malu atudi badilongele. Tuetu tufila mandamuna mipi malongolola bimpe, neasake bakuabu ku dinanga ne ku midimu mimpe ne neasanguluje dilonga dietu, diodi kutukolesha. (Eb. 10:24) Kabidi pikala yonso wa kutudi wakula bua ditabuja diende, se disanka dietu nedivule be!
4. Bua tshinyi bidi bikengela bua tuetu kutumikila mikenji ya Yehowa?
4 Yezu wakaleja butuku bua muladilu wa lufu luende mudi kutumikila mikenji ya Yehowa kuenda pamue ne kushala mu dinanga dia Nzambi. (Yone 15:10) Ku diambuluisha dia mukanda eu wa “Dinanga dia Nzambi” netushale badisuike ne muoyo wetu mujima bua kutumikila mêyi a mu Bible mu nsombelu wetu dituku dionso ne bua ‘kudilama mu dinanga dia Nzambi.’—Yuda 21.