Mukanda wa kudi Kasumbu Kaludiki

Bana betu basuibue,

Tudi ne disanka dia bungi bua kunufundila mukanda eu. Tudi tudiumvua anu bu mupostolo Yone wakamba muvuaye ‘munange mu bushuwa’ bena Kristo nende ne muvuaye usanka bua muvuabu ‘benda mu bushuwa’ anyi mu bulelela. (2 Yone 1, 4) Eyowa, bulelela ndibenesha dia mushinga mukole kutudi tuetu bonso! Bulelela mbutupikule mu Babulona Munene ne ku malongesha ne bilele bidi kabiyi bisankisha Nzambi. Kutumikila bulelela nkutuambuluishe bua kulua bantu badi banangangane, bena bulenga ne luse. Mbutupeteshe mushindu wa kulua bantu bimpe ku mêsu kua Nzambi ne kupeta ditekemena dia muoyo wa tshiendelele.

Tudi ne dianyisha dia bungi bualu nyuma wa Yehowa udi utulombola dituku dionso ne utukolesha. Tudi batuishibue ne: nuvua basanke bikole mu mpungilu wetu wa distrike wa “Nyuma wa Nzambi udi utulombola” patuvua bakonkonone mishindu mishilashilangane idi Yehowa utuambuluisha ne nyuma wende eu. Bu mudi nsombelu wenda anu unyanguka pa buloba bujima, mbimpe tuetu kueyemena nyuma wa Yehowa bua atulombole mu matuku mabi adi kumpala eku.

Tudi bajadike ne: miyuki ya bana betu bavua batantamene ntatu ya bungi bua ditabuja diabu inudi babale mu Annuaire mminulenge ku muoyo bikole. Bidi bikemesha bua kumona ne: ba bungi ba kudibu batshivua bafumina ku ditambula anyi kabavua banji kutambula pavua ntatu eyi mibakuate. Tudi babanange bikole bua lulamatu luabu ne bua muvuabu benze malu makane. Tshilejilu tshiabu tshimpe tshidi tshitukolesha bua tuetu kushala anu balamate Bukalenge bua Nzambi nansha tuetu mua kupeta ntatu ya mushindu kayi.​—1 Tes. 1:6-8.

Bana betu, tudi bamanye ne: nudi ne ntatu ya bungi mikebesha kudi malu a mpetu anyi malu makuabu inudi ne bua kutantamena bua kushala anu banangangane mu mêku enu. Bamue ba kunudi mbafike too ne ku dipangila mushindu wa kuyisha mudibi bikengela ne kubuela mu bisangilu bionso. Ke bualu kayi, panyima pa tuetu bamane kuela meji bikole ne basambile bua bualu ebu, tudi bashintulule ndongamu ya bisangilu bia tshisumbu kutuadijila mu dia 1 ngondo wa kumpala 2009. Tudi batekemene ne: nenuenze muenu muonso bilondeshile dishintuluka edi bua kupeta dîba dia kudilongela ne kuenza ntendelelu wa mu dîku.

Tudi ne disanka bua muvua bantu bavule batambule mu mpuilu ne mpungilu ituvua benze tshidimu tshishale. Munkatshi muabu muvua kabidi bansonga ba bidimu bikese. Tudi tunuela nuenu baledi kalumbandi bua munudi bambuluishe bana benu bua kunanga bulelela ne babakankamije bua kudilambula kudi Yehowa ne kumuenzela mudimu patshidibu bansonga. Bansonga aba badi batuilangana ne ntatu ya bungi mu tulasa, kadi mbafike ku dikumbaja malu malomba bua kutambula ku diambuluisha didibu bapete mu mêku abu.​—Mus. 128:1-6.

Tudi kabidi tuela bana betu bonso kalumbandi bua mudibu balombole malonga a Bible a bungi. Bana betu bamisionere ne bampanda-njila ba pa buabu mbambuluishe bikole mu mudimu eu. Tuetu bena mu Kasumbu Kaludiki bonso tudi ne dianyisha dia bungi bua mudimu mukole udi bana betu ba balume ne ba bakaji ba pa buloba bujima benza padibu babikila bantu bonso ba muoyo muimpe ne babambila ne: ‘Luayi nuangate mâyi a muoyo tshianana.’ (Buak. 22:17) Tudi tujingila bana betu bonso ba pa buloba bujima 289 678 bavua batambule tshidimu tshishale difika dilenga mu bulongolodi bua Nzambi.

Mbimpe tuetu kuvuluka mêyi a mupostolo Yone a ne: “Buloba budi bujimina ne lukuka luabu kabidi; kadi yeye udi wenza mudi disua dia Nzambi udi ushalaku tshiendelele.” (1 Yone 2:17) Tudi tumona ne: tukadi ku ndekelu menemene kudi buloba ebu ne bua ‘kujimina.’ Nunku, tudi ne bua kudifila bikole mu dienza disua dia Nzambi ne ‘kushala batabale.’ (Mat. 24:42, MMM) Tuetu benze nunku, katuakunyingalala nansha kakese to, kadi netupete mabenesha adi Yehowa utupesha bua dinanga ne luse luende.​—Yesh. 63:7.

Tudi batekemene ne: miyuki mimpe ya bana betu ba mu matunga a bungi idi mu Annuaire wa tshidimu etshi neyikankamije yonso wa kunudi bua kuteka malu a Bukalenge bua Nzambi pa muaba wa kumpala. Tudi tunujadikila ne: katuena banupue muoyo, tudi tusambila bua bualu buenu ne tudi banunange bikole. Yehowa Nzambi wetu anubeneshe!

Bana benu,

Bena mu Kasumbu Kaludiki ka Bantemu ba Yehowa