Diyisha didi dikolesha ditabuja dietu
1. Mmasanka kayi atudi tupeta patudi tuyisha?
1 Kuyisha bikole kudi mua kukolesha ditabuja dietu ne kutuvudijila disanka. Tshidibi, tudi tuyisha nangananga bua kusankisha Yehowa. Kadi patudi tutumikila mukenji wa ‘kuambila bantu dîyi,’ bidi bitupetesha masanka a kudi Yehowa ne bituambuluisha kabidi. (2 Tim. 4:2; Yesh. 48:17, 18) Mmushindu kayi udi kuyisha kutukolesha ne kutupetesha disanka?
2. Nku malu kayi kudi mudimu wa kuyisha utukolesha?
2 Tudi tupeta bukole ne masanka: Mudimu wa kuyisha udi utuambuluisha bua kutangija mêsu etu anu ku masanka a mu Bukalenge bua Nzambi pamutu pa kuatangija ku ntatu ya lelu. (2 Kol. 4:18) Patudi tumvuija bantu malongesha a mu Bible, tudi tukolesha ditabuja dietu bua malu adi Yehowa mutulaye, tukolesha ne dianyisha ditudi nadi bua bulelela. (Yesh. 65:13, 14) Patudi tuambuluisha bantu bua kukolesha malanda abu ne Yehowa bua kubenga ‘kuikala ba pa buloba,’ tudi tuenda tukolesha dipangadika dietu dia kubenga kubuelakana mu malu a pa buloba.—Yone 17:14, 16; Lomo 12:2.
3. Mmunyi mudi kuyisha kutuambuluisha bua kuikala ne ngikadilu mimpe?
3 Kuyisha kudi kutuambuluisha bua kuikala ne ngikadilu mimpe ya buena Kristo. Tshilejilu, kudienzeja bua ‘kulua muena malu onso kudi bantu bonso’ kudi kutuambuluisha bua kuikala ne budipuekeshi bua bungi. (1 Kol. 9:19-23) Patudi tuyisha bantu badi ‘batata ne badi bamuangalake bu mikoko idi kayiyi ne mulami,’ tudi tulua bena luse ne bumvuidi ba bakuabu. (Mat. 9:36) Tudi tumanya mua kunanukila nansha padi bantu babenga kututeleja anyi padibu batuluisha. Disanka dietu didi divula patudi tudifila bua kuambuluisha bakuabu.—Bien. 20:35.
4. Ntshinyi tshiudi umvua bua mudimu webe wa diyisha?
4 Ndiakalengapu kayi nunku dia kuenza mudimu udi utumbisha Muntu umuepele utudi ne bua kutendelela! Mudimu wa kuyisha udi utukolesha. Udi upetesha bonso badi badifila mu ‘dimanyisha bantu lumu luimpe’ masanka a bungi.—Bien. 20:24.