Enza mudimu bimpe ne mikanda yetu
1. Mmushindu kayi utudi mua kuidikija tshilejilu tshia Yezu tshia kuleja dianyisha bua bintu bidi Yehowa utupesha?
1 Panyima pa Yezu mumane kudisha musumba wa bantu mu tshishima, wakambila bayidi bende bua kusangisha bipesa bia mampa bivua bishale. (Mat. 14:19-21) Mushindu uvua Yezu kayi unyangakaja bintu bivua Yehowa ufila udi utulongesha petu bua ‘kuikala ne muoyo wa dianyisha’ pa kulama bimpe bintu bidi Yehowa utupesha ku diambuluisha dia ‘mulami wa bintu udi ulamata mfumuende.’—Kolos. 3:15, MMM; Luka 12:42; Mat. 24:45-47.
2. Ntshinyi tshitudi mua kuenza bua katunguiji mushiki wa bibejibeji mu nzubu?
2 Bibejibeji: Tuetu katuyi tufila bibejibeji mu buambi, nebitupite bungi mu nzubu. Tuetu tupete bibejibeji bipitepite bungi padibi bilua, tudi ne bua kuenza muetu muonso bua kukeba dîba dikumbane dia kubifila mu buambi. Ntshinyi tshitudi mua kuenza ne bibejibeji bia kale? Nansha biobi bia kale, kadi biena-bualu bidimu bidi anu ne mushinga wa bungi bua bantu. Tuetu bikale ne mushiki wa bibejibeji bia kale mu nzubu, mutangidi wa mudimu anyi mukulu mukuabu udi mua kutuambuluisha bua tupete mishindu mipepele itudi mua kubifila mu buambi.
3, 4. Mmalu kayi atudi ne bua kuikala bamanye patudi tulomba mikanda nansha bibejibeji ku Nzubu wa Bukalenge?
3 Mikanda mikuabu: Padibu batumanyisha mukanda mupiamupia wa kufila mu buambi, katuyi diakamue bua kuangata mikuabu ku Nzubu wa Bukalenge to, mbimpe tuanji kutangila mu mikanda itudi nayi mu nzubu imue misangu tudi mua kuikala nayi. Mbimpe kuangata mikanda anu bungi bukumbanyine butudi mua kufila mu buambi lumingu alu, pashishe kupingana kabidi bua kuangata mikuabu.
4 Bua mikanda yebe ya kubala, lomba anu iudi nayi dijinga dîba diudi ulomba adi. Ufunde dîna diebe pa muaba udibu bashiya au. Kuenza nunku nekuambuluishe bua wewe kuupeta bu wowo mua kujimina. Wewe muikale ne ditadi dia Watchtower Library mu CD-ROM anyi mulama tshibejibeji tshitutu tupeta ku ngondo yonso, kuakuikala ne dijinga dia kulomba relié wa Tshibumba tshia Nsentedi ne Réveillez-vous! kabidi to. Kuikadi upesha anyi witaba bua bana bebe bikala banaya ne mikanda anyi bibejibeji to.
5. Ntshinyi tshitudi katuyi mua kupua muoyo patudi tushila muntu mikanda yetu anyi tshibejibeji?
5 Difila bibejibeji anyi mikanda mu buambi: Tudienzejayi bua kufila bibejibeji bietu anyi mikanda anu kudi bantu badi ne dijinga menemene dia kuyibala. Kupu muoyo ne: tuetu ke batu bafila tshitupa tshinene tshia makuta a bintu bitutu tufila mu buambi. Paudi ushila muntu mukanda anyi tshibejibeji, kupu muoyo bua kumuleja mudiye pende mua kufila makuta bua kutungunuja mudimu wa diamba lumu luimpe udi wenzeka pa buloba bujima.
6. Bua tshinyi tudi tuangata mikanda yetu ne mushinga wa bungi? Bualu ebu nebutusaka ku dienza nayi tshinyi?
6 Yezu wakenza tshishima tshia kudisha bantu ba bungi, kadi uvua misangu ya bungi ubadisha mu ditabuja. Yezu wakamba ne: ‘Muntu kikadi ne muoyo bualu bua bidia nkayabi, ikale nawu bualu bua mêyi onso adi alopoka mukana mua Nzambi.’ (Mat. 4:4) Mikanda yetu idi ilongesha malu malelela a mu Bible adi ne mushinga bua kupeta muoyo wa kashidi. (Yone 17:3) Bu mudiyi ne mushinga mushindu eu, katunayi nayi to!