Diyisha dietu didi dileja mutudi banange Nzambi
1. Dinanga divua Yezu munange nadi Nzambi diakamusaka bua kuenza tshinyi?
1 Dinanga diakasaka Yezu bua kukumbaja mudimu wende wa diyisha. Malu onso avua Yezu wenze mu mudimu wende wa diyisha avua tshijadiki tshia dikema tshia muvuaye munange Yehowa. Yezu wakamba ne: ‘Bua ba pa buloba bamanye ne: Ndi musue Tatu, ne bu muakampa Tatu mukenji, nunku mundi ngenza.’ (Yone 14:31) Bu mutudi tulonda mu makasa a Yezu, tuetu petu tudi ne diakalenga dia kuleja mutudi banange Nzambi mu mudimu wetu wa kuyisha.—Mat. 22:37; Ef. 5:1, 2.
2. Mmushindu kayi udi dinanga bua Yehowa dilenga mudimu wetu wa buambi?
2 ‘Banemeke dîna diebe’: Patudi tudienzeja ne tshisumi padi mpunga umueneka bua kuambila bakuabu malu a Yehowa ne a Bukalenge buende, tudi tuleja mutudi banange Nzambi ne tudienzeja bua dîna diende kunemekibua. (Mus. 83:18; Yeh. 36:23; Mat. 6:9) Anu muvuabi bua mudimu wa Yezu, mudimu wetu wa diyisha udi uleja mutudi tuditatshisha bua dîna dia Yehowa kunemekibua ne bua disua diende kuenzekadi.—Mat. 26:39.
3. Mmushindu kayi udi dinanga dietu bua Yehowa dituambuluisha bua kutantamena ntatu?
3 Dinanga didi dituambuluisha bua kutantamena bipumbishi: Kakuena tshintu tshidi mua kuimanyika dinanga dietu bua Yehowa. (1 Kol. 13:4, 7) Ntatu ya bungi ivua Yezu mupete mu nsombelu wende ivua mua kumupangisha bua kukumbaja mudimu wende. Kadi pavuaye upeta ntatu, dinanga dikole diende ne dijinga diende dia kuenza disua dia Yehowa biakamuambuluisha bua kuyitantamena. (Mâko 3:21; 1 Pet. 2:18-23) Tuetu petu tutu tupeta ntatu ya bungi idi dinanga dietu bua Nzambi dituambuluisha bua kutantamena. Tuetu tuenda menemene mu dikasa dia Yezu, netupete muoyo mukole ne dishindika dia kukumbaja mudimu wetu wa buambi katuyi tulekela. Nansha mudibi mua kututonda padibu batukengesha mu dîku, patudi tusamakana, anyi bakulakaje, peshi padi bantu batudi tuyisha babenga kututeleja, malu aa kaena atupangisha bua kunanga Yehowa ne bua kukumbaja mudimu udiye mutupeshe mu mushindu udibi bikengela to.
4. Dinanga dietu bua Nzambi didi ditupesha disanka kayi?
4 Dinanga didi ne bukole bua bungi, ne tudi ne disanka dia kuleja mutudi banange Nzambi ne muoyo mujima mu mudimu wetu wa buambi. (1 Kol. 13:13) Bu mudi dituku dikala Yehowa mua kutumbishisha dîna diende bua kashidi ne tshiendelela disemena ne lubilu luonso, tuenzayi ne muetu muonso bua ‘dinanga dietu divulangane misangu yonso.’—Filip. 1:9; Mat. 22:36-38.