Programe mupiamupia wa Mpuilu wa pa Buende bua 2010
1. (a) Mbimue biena-bualu kayi bia mu Bible bivuabu bakuile mu mpuilu ya pa buayi ya bidimu bishale ebi? (b) Udiku ne malu kampanda auvua mumvue mu mpuilu wa pa buende wa tshidimu tshishale avua makusankishe anyi?
1 Bidimu bishale tuvua bumvue miyuki bu mudi: “Numanye mua kujadika malu adi makane,” “Tuimanayi bajalame bu tshisumbu tshimue,” “Tungunukayi ne kuyisha malu malelela,” ne “Tuetu tudi dima ne Yehowa udi Mufumbi wetu.” (Filip. 1:9, 10; 1:27; Yone 18:37; Yesh. 64:8) Kuenaku muindile ne muoyo kulu kulu bua kubuela kabidi mu mpuilu wa pa buende wa tshidimu tshia mudimu tshia 2010 anyi? Mpuilu au neikale ne tshiena-bualu tshia ne: “Dîba didi dishale ndikese,” tshiangatshila mu 1 Kolinto 7:29.
2. Mmalu kayi audi mua kuenza bua kudijula muoyo wa kubuela mu mpuilu eu?
2 Padibu banumanyisha dituku dienzeka mpuilu eu mu tshisumbu tshienu, tuadija kuakula bua malu mimpe awikale mua kupetamu ne muoyo mujima. Bamue baledi batu bafunda dituku adi pa kalandriye bua kuambuluisha bana babu bua kabapu muoyo dituku adi, kabidi ne dibeji difunda bintu bikala muntu yonso wa kudibu ne bua kuambula dituku adi, ne batu batuadija kubala bungi bua matuku adi mashadile bua mpuilu kuenzekaye. Dîba dinudi nutendelela mu dîku, nudi pamuapa mua kuakuila pa malu mimpe a mu mpuilu ya pa buayi mishale. Udi kabidi mua kulongolola muoyo webe bua kumvua bimpe malongesha aa wewe mubalulule malu adi mu mukanda wa Kalasa ka Mudimu wa Nzambi kadi kakuambuluisha mu dibeji dia 13-16, kuenza nunku nekukuambuluishe wewe ne ba mu nzubu muebe bonso bua ‘kudimuka munudi numvua.’—Luka 8:18.
3. Mmalu kayi audi mua kuenza bua malongesha kukuambuluishawu?
3 Tutumikile bitudi tulonga: Panyima pa mpuilu, tutu tumvua batamba kuamba ne: “Miyuki ya lelu ivua milenga be!” Bitu nanku menemene, bualu mpuilu ntshimue tshia ku bintu bimpe bidi Yehowa mutulongoluele. (Nsu. 10:22) Bua malu audi mulonge au kukuamawu bimuma, mbimpe kuelelela meji ne kuakuata kabidi. (Luka 8:15) Keba mushindu wa nuenu kuyikila malu anudi bumvue ne bena mu dîku dienu anyi ne bantu banudi nabu mu njila panudi nufuma mu mpuilu ku dilolo. Nuyikile kabidi bua bipatshila binudi badifundila ne bua malu ikala mua kunuambuluisha mu mudimu wenu wa buambi. Kuyikila malu a mushindu eu kudi kuambuluisha bua wewe kupeta malu mimpe a bungi nansha matuku a bungi panyima pa mpuilu.—Yak. 1:25.
4. Bua tshinyi mpuilu eu neatuambuluishe?
4 Tuetu bapete tshintu tshimpe tshitudi natshi dijinga menemene, tutu tudiumvua bilenga bia dikema. Katuenaku mua kuindila ne muoyo kulu kulu bua kumanya malu malenga aa adi Yehowa mutulamine mu mpuilu wetu wa pa buende udi kumpala eku anyi? Tuikalayi batuishibue ne: malu atuapetamu neatuambuluishe mu mishindu mikuabu ya bungi. Tuikalayi batekemene ne: Tatu wetu wa mu diulu Yehowa neatupeshe anu tshintu tshimpe tshitudi natshi bualu. Tshintu etshi ndilongesha dia mushinga diatukankamija bua kutungunuka ne kukumbaja bimpe mudimu udiye mutupesha.—2 Tim. 4:2; Yak. 1:17.