Yisha bantu balume, kubatshinyi
1. Mbualu bua mushinga kayi budiku bua kuyisha malu a Bukalenge kumpala?
1 Mudi mudimu wa kuyisha lumu luimpe lua Bukalenge wenda anu uvula mu matuku aa a ku nshikidilu, kudi dijinga dia lukasa dia bantu balume badi bakumbane bua kulombola mudimu eu. (Mâko 4:30-32; Bien. 20:28; 1 Tim. 3:1-13) Pabi, mu imue miaba bantu bakaji ke batu bitaba ba bungi lumu luimpe kupita bantu balume. Mu bimue bisamba, bantu balume batu bamona ne: bujitu bua kulongesha bana malu a Nzambi budi kudi bakaji babu. Mmunyi mutudi mua kukankamija bantu balume ba bungi bua kumvuabu ne: badi pabu dijinga ne kumanya malu a Nzambi ne kudisanga netu mu ntendelelu mulelela?
2. Mmushindu kayi uvua Paulo ne Petelo bapatule bipeta bimpe pavuabu bayishe bantu balume?
2 Tukebayi bantu balume: Padi mfumu wa dîku witaba bulelela, utu misangu ya bungi ukoka bena mu dîku bakuabu mu ntendelelu mulelela. Tshilejilu, pavua Paulo ne Sila mu buloko, bakayisha mulami wa buloko mukuabu. Pashishe muntu eu ne ba mu nzubu wende bonso bakatambula. (Bien. 16:25-34) Pavua Paulo uyisha mu Kolinto, ‘Kulisipo wakadi pa mutu pa nsunagoga, wakitabuja Mukalenge ne ba mu nzubu wende bonso.’ (Bien. 18:8) Yehowa wakatuma Petelo bua kuyisha Kônelio, munene wa basalayi uvuabu bamba ne: “mutendeledi muakane, wakadi utshina Nzambi.” Kônelio ne ba mu nzubu wende, ne balela ne balunda bende bakatambula.—Bien. 10:1-48.
3. Bilondeshile tshilejilu tshia Filipo, mbanganyi “badi ne bukokeshi” baudi mua kuyisha?
3 Kuyisha bantu balume “badi ne bukokeshi” kudi mua kupatula bipeta bituvua katuyi belele meji to. (1 Tim. 2:1, 2) Tshilejilu, muanjelu wa Yehowa wakambila Filipo bua kuyisha “muntu mutungula wa bukokeshi bunene” uvua ulama bintu bionso bia mukalenge mukaji wa mu Etiopi. Filipo wakumvua muntu au “ubala mukanda wa muprofete Yeshaya” ne dîyi dikole, Filipo kumuambila lumu luimpe lua bualu bua Yezu. Muena Etiopi eu wakatambula, kulua muyidi wa Yezu. Bidi bimueneka ne: wakamanyisha lumu luimpe mu njila muonso pavuaye uya mutangile kuabu ku Etiopi. Uvua mua kuikala kabidi muyishe mukalenge mukaji ne bantu bonso bavua mu tshipangu tshia mukalenge mukaji, bantu abu bavua mua kuikala kabayi ne mpunga wa kuteleja lumu luimpe.—Bien. 8:26-39.
4. Tshitudi mua kuenza ntshinyi bua bantu balume ba bungi kupetabu mpunga wa kuteleja lumu luimpe?
4 Mua kuyisha bantu balume ba bungi: Bu mutu bantu balume baya ku midimu yabu mu munya, kuenaku mua kushintulula programe webe bua kuikala kuyisha mêba a bungi dilolo, mu Disambombo ne mu Dia lumingu anyi matuku adi bena mudimu mu dikisha anyi? Wewe ne tshibidilu tshia kuyisha miaba idi bantu benzela midimu anyi bapanyina bintu, udi mua kupeta mpunga ya kuyisha bantu balume batu kabayi batamba kusomba ku mbanza yabu. Bana betu badi kabidi mua kudienzeja bua kuyisha bena mudimu nabu bantu balume padi mpunga umueneka. Patudi mu diyisha dia ku nzubu ne ku nzubu, nangananga mu teritware unutu nutamba kuyisha, nudi imue misangu mua kulomba bua kuyukila ne batatu bena nzubu.
5. Tshidi muanetu wa bakaji mua kuenza ntshinyi bu yeye mua kupeta muntu mulume udi muanyishe mukenji wa Bukalenge?
5 Muanetu wa bakaji yeye mupete muntu mulume muanyishe bulelela, kena ne bua kumupinganyina nkayende nansha. Udi mua kuyaku ne bayende anyi ne muambi wa lumu luimpe mukuabu. Padi muntu eu wenda uya kumpala mbitambe buimpe kumupesha muanetu wa balume udi mukumbane.
6. Mmunyi mutudi mua kuidikija Paulo bua kumona mua ‘kupeta mioyo ya bakuabu ba bungi’?
6 Sungula biena-bualu bidi bikoka ntema ya bantu balume: Mupostolo Paulo uvua welela bateleji bende meji ne usungula malu avua makanyine nsombelu wabu bua ‘kupeta mioyo ya bakuabu ba bungi.’ (1 Kol. 9:19-23) Tuetu petu tudi ne bua kuelangana meji a biena-bualu bidi mua kusankisha bantu balume batudi mua kupetangana nabu, ne tudilongolola mua kuyikila nabu biena-bualu abi. Tshilejilu, bantu balume badi batamba kuelangana meji a dinyanguka dia malu a mpetu, bua mbulamatadi muimpe ne badi baditatshisha bua mêku abu ikale mu bukubi buimpe. Badi kabidi mua kuikala belangana meji bua kumanya bua tshinyi tudi ne muoyo, tshikala buloba mu bidimu kumpala eku ne tshidi Nzambi mulekeela makenga enzeka. Badi mua kuanyisha mukenji wetu wa Bukalenge anu tuetu bautuale ne meji.—Nsu. 16:23.
7. Mmushindu kayi udi bena mu tshisumbu bonso bua kuambuluisha balume badi balua mu bisangilu badi ne bakaji babu Bantemu?
7 Ambuluisha balume badi kabayi Bantemu: Nansha mutu bikadilu bimpe bia bana betu ba bakaji bikoka babayabu badi kabayi Bantemu, bana betu ba mu tshisumbu badi pabu mua kubelesha diboko. (1 Pet. 3:1-4) Padi muntu mulume udi kayi Ntemu ulua kufila mukajende mu bisangilu, bena mu tshisumbu bobu bamuakidile ne disanka, nebimutue ku muoyo bikole. Dilua diende adi didi mua kuikala dileja mudiye wanyisha bulelela ne pamuapa udi mua kuitaba bua kulonga Bible.
8. Mmushindu kayi udi bana betu ba balume mua kuambuluisha balume badi kabayi bitaba bulelela?
8 Ku lukuabu luseke, bamue bantu balume badi mua kuleja dianyisha dikese bua malu a Bible bua musangu wa kumpala, kadi pashishe badi mua kuanyisha bua muanetu wa balume kampanda udibu bapetangana nende bimpe kubalongesha Bible. Bana betu ba balume ba mu tshisumbu tshikuabu bakadienzeja pavuabu baya kutangila imue misangu dîku kampanda bua kuyikila ne mulume uvua kayi Ntemu pa malu avuabu bamanye ne: avua asankisha muntu au. Miyuki yabu eyi yakabafikisha too ne malu a Nzambi ne tatu au; lelu eu ukadi mutambule. Tshikuabu tshilejilu ntshia muanetu wa balume wakambuluisha bayende wa muanetu wa bakaji bua kuamushisha ka lupangu ka mabaya ka kuende. Bua bualu ebu, wakitaba bua kumulongeshabu Bible. (Gal. 6:10; Filip. 2:4) Biwikale muntu mulume, kuenaku mua kuyukila ne mulume umue anyi ba bungi badi kabayi Bantemu anyi?
9. Kulongesha bana betu ba balume kudi mua kupatula bipeta kayi?
9 Nubalongeshe bua matuku atshilualua: Bantu balume badi bitaba mukenji wa Bukalenge ne bapeta majitu mu mudimu wa Yehowa badi mua kuikala pabu ‘mapa,’ tuambe ne: bakulu bena Kristo badi benza mudimu ne bipedi biabu ne bakolesha bisumbu bia batendeledi ba Yehowa. (Ef. 4:8; Mus. 68:18) Bantu aba badi balama tshisumbu ne disanka, ne muoyo umue. (1 Pet. 5:2, 3) Badi balua dibenesha kudi bana betu bonso, ki mmuomu anyi?
10. Mmushindu kayi uvua diyisha dia Anania kudi Paulo diambuluishe bantu ba bungi?
10 Tshilejilu, Shaula wakalua “mupostolo kudi bisamba bia bende,” nansha muvuaye mukengeshi wa bena Kristo. (Lomo. 11:13) Anania wakanji kutshina bua kuyisha Shaula bu muvuaye ukengesha bena Kristo. Nansha naku, Anania wakenza tshivua Yezu mumuambile, kuyishaye Shaula utudi tubikila ne: mupostolo Paulo. Panyima pa bidimu, lumu luimpe luvua Paulo wamba luakambuluisha binunu bia bantu bakalumvua ne kabidi mikanda ivuaye mufunde ku bukole bua nyuma wa Nzambi (idi mu Dîyi dia Nzambi) idi itungunuka ne kuambuluisha miliyo ya bantu lelu.—Bien. 9:3-19; 2 Tim. 3:16, 17.
11. Bua tshinyi mbimpe tuakaje malu bua kuyisha bantu balume?
11 Tuenzayiku wetu mushindu wonso bua kudiakaja bua kuyisha bantu balume kakuyi lutatu. Patudi tutungunuka ne kuenza bualu ebu, tuikalayi bajadike ne: Yehowa udi utubenesha bua mutudi tudienzeja bua kuenza disua diende ne kutuala bimpe lumu lua Bukalenge.