Kuata mudimu bimpe ne Bible
1. Bible udi utuambuluisha ku tshinyi?
1 Kukuata mudimu bimpe ne Dîyi dia Nzambi nekukuambuluishe bua kuyisha ne kulongesha bulelela bilenga, ne kuleja mudi amue malongesha mikale a dishima ne mudi bimue bilele bikale anu bia bantu patupu.—2 Tim. 2:15; 1 Pet. 3:15.
2. Tshidi mua kukuambuluisha bua kupeta mvese ne lukasa ntshinyi?
2 Kolesha dimanya diebe dia Bible: Anu bu mutubi bua tshiamu tshia mudimu tshionso etshi, dimanya kukuata mudimu ditu dilua paudi wibidilangana ne tshintu. Wewe mubale Bible mujima, neumanye bimpe tshiena-bualu tshidiye natshi; newikale uvuluka mvese ne uyipeta kabidi ne lukasa. Paudi umanya Bible bimpe, neubange kuakula ne tshisumi ne muoyo umue paudi mu buambi anyi paudi uyisha bantu padi mpunga umueneka.—1 Tes. 1:5.
3, 4. (a) Tela imue mishindu idi mua kutuambuluisha bua kumanya Bible bimpe. (b) Ukadiku pebe mutete mikuabu mishindu ya kumanya Bible bimpe anyi?
3 Paudi mu bisangilu, ikala ubulula Bible webe, ulondesha padibu babala mvese. Paudi udilongela Bible anyi ulongolola bisangilu, wikale ubala mvese idi kayiyi ne mêyi ayi mu bikoso, welangana meji bua muudi mua kuyitumikila. Bantu ba bungi mbamone ne: kubadila mvese anu mu Bible pamutu pa kuyibadila mu ordinatere anyi pa mabeji kudi kubambuluisha bua kuyipeta ne lukasa dîba didibu mu buambi.—Yone 14:26.
4 Bamue bena mu mêku mbateke tshikondo kampanda tshia kukuata mvese ku muoyo. Imue misangu batu ne tubeji ku luseke lumue bafunda mvese, ku lukuabu bafunda mêyi a mvese au. Badi batetangana umue ku umue bua kumona ni kudi muntu udi mua kutela mêyi a mvese anyi kumanya muaba udibu bangatshile mêyi au mu Bible. Bakuabu pabu batu bambulula mbuelelu ya kuyisha nayi, bateta tshia kuenza padi muntu usua kubenga bua kumuyishabu anyi bateta kuandamuna lukonko ne Bible; bitu bibambuluisha bikole.
5. Bua tshinyi udi ne bua kumanya Bible bimpe?
5 Kakuena mukanda udi mufuanangane ne Bible to; bualu Bible udi ne mêyi adi mua kuvuija bantu bena meji ‘too ne ku lupandu.’ (2 Tim. 3:15) Nunku, bu mudi bantu ba bungi kabayi bibidilangane bimpe ne malu malenga adi mu Bible, tudi ne bua kuditatshisha bua kumumanya bimpe bua kumona mua kubaleja tshidiye wamba menemene.—Nsu. 2:1-5.