‘Pesha balongi muoyo webe’
1. Tudi ne bua kuenza tshinyi bua kuambuluisha mulongi wetu?
1 Bua kufikisha muntu ku didilambula, kumulongesha Bible bikole nkayaku ki nkukumbane to. Paulo wakafuanyikija malanda avua pankatshi pende ne bantu bavuaye ulongesha ne malanda adi pankatshi pa mamu udi ulama bana bende. Tuetu petu tutu basue ‘kufila mioyo yetu’ bua kuambuluisha balongi betu bua kuyabu kumpala.—1 Tes. 2:7-9.
2. Tudi ne bua kuleja mutudi tuditatshisha bua mulongi wetu bua tshinyi? Tudi mua kuenza tshinyi tshilejilu?
2 Uditatshishe bua mulongi: Padi mulongi ubanga kuenza malu adiye ulonga, muoyo wende neutuadije kumusaka bua kulekela balunda bende badi benza malu adi Bible ukandika. (1 Pet. 4:4) Bena dîku diende badi mua kumubenga. (Mat. 10:34-36) Bua kubengaye kudiumvua nkaya, tudi ne bua kuditatshisha bua malu ende. Misionere kampanda ukadi muyishe bidimu bia bungi udi wamba ne: “Panudi nujikija kulonga, kushiyi mulongi lukasa lukasa to. Padiku mushindu, somba katupa, nuyikilaku nende.” Ikala ukeba mushindu wa kumupesha mibelu mimpe mu malu makuabu. Tshilejilu padiye usama, udi mua kumuela nshinga anyi kuya kumumona. Pikalaye mulue ne bana mu bisangilu, usombe nende pamue bua kumuambuluisha padiku mushindu.
3. Leja tshitudi mua kuenza bua mulongi ikale uyikila pende ne bena mu tshisumbu.
3 Mudi bena mu tshisumbu mua kuambuluisha mulongi wa Bible: Tshilejilu, wewe uyishila pamue ne kua ba mulongi webe, kuenaku mua kuya kuabu bua amanye muntu unudi bapatuke nende mu buambi anyi? Padiku mushindu, ikala ushintulula bantu paudi uya kulonga nende, udi mua kuya kabidi ne bakulu. Panudi nutuadija kulonga bimpe ne muntu, udi mua kumulomba bua alue mu bisangilu. Nunku neamanye bantu bikala mua kulua bana babu ba mu dîku dia Yehowa.—Mâko 10:29, 30; Eb. 10:24, 25.
4. Leja mutuapeta difutu bua tshisumi tshietu.
4 Muledi yonso utu wambuluisha bana bende bikole utu usanka bikole padiye ubamona balonda njila wa Yehowa. (3 Yone 4) Tuetu petu netumvue disanka dia bungi patudi tudifila ne muoyo wonso bua kuambuluisha balongi betu ba Bible.