Mushindu wa kuleja dianyisha bua dipa ditambe bunene dia Nzambi
1. Tutu ne dianyisha kudi Yehowa nangananga bua tshinyi?
1 Ku bintu bilenga bionso bidi Yehowa mutupeshe, kakuena ‘dipa dimpe’ didi dipite muoyo uvua Muanende mufile buetu tuetu nansha. (Yak. 1:17) Lufu lua Yezu ludi lututuadila malu malenga a bungi, lutubuikidila kabidi ne mibi yetu. (Ef. 1:7) Ke bua tshinyi katuakupua lufu lua Yezu muoyo to. Kadi tutu tutamba kuvuluka muoyo utu Yezu mufile eu mu tshikondo tshia Tshivulukilu.
2. Leja tshitudi mua kuenza mu dîku dietu bua kukolesha dianyisha bua muoyo udi Yezu mufile.
2 Kukolesha dianyisha: Bua tshinyi kubengaku kulonga malu adi atangila lufu lua Yezu mu mbingu ya kumpala kua dituku dia 30 dia ngondo muisatu mu Ntendelelu wenu wa mu Dîku? Balayi kabidi mu dîku, dituku dionso mvese yonso idibu batulombe bua kubala mu tshikondo tshia Tshivulukilu. Kuenza nunku nekukoleshe dianyisha dienu bua dipa edi. Wele meji bikole bua kumona mudi lufu lua Yezu lukuambuluishe mu mushindu uudi umona Yehowa, udimona wewe nkayebe, umona bantu bakuabu ne umona matuku atshilualua. Binuikala ne mukanda wa misambu mipiamipia, nulonge misambu ibidi ituimba mu Tshivulukilu.—Mus. 77:12.
3. Tudi mua kuenza tshinyi bua kuleja dianyisha?
3 Mishindu ya kuleja dianyisha: Dianyisha dia muoyo udi Yezu mufile neditusake bua kuambila bantu malu a Yehowa ne dinanga dikole dia mudiye mututumine Muanende. (Mus. 145:2-7) Bua kuleja dianyisha, mu ngondo muisatu ne muinayi ne muitanu, amue mêku atu enza bua nansha muntu umue tshianana ikale mpanda-njila muambuluishi. Pikalaku kakuyi muntu, kanuenaku mua ‘kudisumbila tshikondo’ bua kuvudija mêba anudi nuenza mu buambi anyi? (Ef. 5:16) Dianyisha neditusake kabidi bua kubikila bantu bua kubuela netu mu Tshivulukilu. (Buak. 22:17) Tuadija kufunda mêna a bantu badi banyisha bulelela, balongi bebe ba Bible, balela bebe, bena mudimu nebe ne bena mutumba nebe. Pashishe uditue mu diabanya mabeji a dibikila nawu bantu mu Tshivulukilu.
4. Leja mutudi mua kuenza malu ne meji mu tshikondo tshia Tshivulukilu.
4 Tshikondo tshia Tshivulukilu tshidi tshitupesha mishindu mikuabu ya kuleja Yehowa mutudi ne dianyisha dia bungi bua tshidiye mutuenzele. Tuangatayi tshikondo etshi bua kukolesha dianyisha dia bakuabu ne kuleja dianyisha dietu bua mudi Yezu mutufuile ne bua ‘bubanji buonso bua Kristo budibu kabayi bamanye mua kuidikija.’—Ef. 3:8.