Ntuku nyisha muanyi muonso anyi?
1. Leja ntatu idi muena Kristo udi mulamate Nzambi mua kupeta.
1 Kutuku muanji kudiela lukonko elu anyi? Imue misangu bua bukulakaje, tusamasama, anyi bungi bua divula dia majitu audi nawu mu dîku kutshiena kabidi uyisha bikole muuvua uyisha kumpala to. Malu aa adi mua kukutekesha mu mikolo. Tshilejilu, muanetu wa bakaji mukuabu udi ne bana basatu wakamba ne: amue matuku ntu ndiumvua bibi bualu kukumbaja majitu a mu dîku dianyi kutu kumpangisha bua kupeta dîba ne makanda a kuyisha. Kadi tshidi mua kutuambuluisha bua kumona malu mu mushindu muimpe ntshinyi?
2. Yehowa udi utulomba tshinyi?
2 Tshidi Yehowa utulomba: Kakuyi mpata, tuetu bonso tutu basue kuyisha bikole. Kadi kutu dishilangana dinene pankatshi pa tshitudi basue kuenze ne tshitudi mua kuenza menemene. Bu mutudi basue kuyisha bikole, bidi bileja ne: katuena basue kushala bavunge maboko to. Tudi ne bua kuvuluka ne: Yehowa mmumanye bimpe malu atudi bakumbane mua kuenza ne kena utulomba bua kuenza malu atudi katuyi mua kukokesha to. (Mus. 103:13, 14) Kadi ntshinyi tshidiye utulomba bua kuenza? Mmusue bua tumuenzele mudimu ne muoyo wetu mujima, ne muetu muonso mutudi namu.—Kolos. 3:23.
3. Tshidi mua kutuambuluisha bua kumanya mushindu utudi tuyisha ntshinyi?
3 Tshiatuambuluishe bua kumanya ne: tudi tuyisha bimpe ntshinyi? Mbimpe tuetu kulomba Yehowa bua atuambuluishe bua kukonkonona nsombelu wetu. (Mus. 26:2) Tudi kabidi mua kulomba diambuluisha kudi mulunda wetu muena Kristo udi mushindame mu ditabuja, udi mutumanye bimpe ne udi kayi mua kutshina bua kutuleja bilema bitudi mua kulongolola. (Nsu. 27:9) Tumanye kabidi ne: bu mutu nsombelu ishintuluka, mbimpe tuikale tukonkonona nsombelu wetu misangu yonso.—Ef. 5:10.
4. Mmunyi mutudi mua kumona mibelu itubu batupesha bua mudimu wa kuyisha?
4 Mutudi mua kumona mibelu idibu batupesha bua buambi: Patu bantu benza manaya a kunyema lubilu, misangu ya bungi babandidi batu bela mbila mikole bua kubakankamika. Batu benza nanku bua kuambuluisha banyemi ba lubilu bua kufikabu too ne ku ndekelu, kadi ki mbua kubatekesha mu mikolo to. Bia muomumue, padibu batubela mu bisangilu ne mu mikanda yetu bua ‘kunanukila mu diyisha dîyi’ dia Nzambi, mbua diakalenga dietu kadi ki mbua kuleja ne: katuena tuyisha bimpe to. (2 Tim. 4:2) Tudi ne bua kuikala bashindike ne: patudi tutungunuka ne kudienzeja bua kuyisha ne muoyo mujima, Yehowa kakupua ‘dinanga ne mudimu wetu’ muoyo to.—Eb. 6:10.