“Bienzedi bia lungenyi bidi bilujadika”
1. Bantu bakuabu batu bamona mudimu wetu wa kuyisha bishi?
1 Misangu mikuabu bantu batudi tuyisha batu babenga kututeleja bualu mbumvue bibi malongesha etu anyi bualu bavua bitabe amue malu atubu badingidila Bantemu ba Yehowa. Pamuapa lungenyi luabu ndunyanga kudi malu adibu bumvue ku bisanji, ku televizion ne mu bikandakanda. Mu imue miaba batu bamba mudi Bantemu bikale tshisumbu tshia malu a Nzambi tshidi tshisaka bantu ku dienza malu mabi. Ntshinyi tshitudi ne bua kuenza padibu batuamba malu a nunku?
2. Padi bantu batushiminyina malu, ntshinyi tshiatuambuluisha bua kubenga kuteketa mu mikolo?
2 Ikala ne mmuenenu muimpe: Mu bikondo bia bapostolo, bantu bavua bumvua bibi malu avua Yezu ne batendeledi bakuabu ba Yehowa balongesha ne bavua babashiminyina malu. (Bien. 28:22) Nansha nanku, malu au kaakabafuisha bundu ne kubapangisha bua kuyisha to. Yezu wakamba ne: “Bienzedi bia lungenyi bidi bilujadika.” (Mat. 11:18, 19) Yezu wakatungunuka ne kuenza disua dia Tatuende ne tshisumi bualu uvua mushindike ne: bantu bavua basue kumanya bulelela bavua ne bua kumona mushinga uvua nawu lumu luimpe. Patudi tuvuluka ne: Yezu Muana wa Nzambi wakapeta pende ntatu ya buine itudi tupeta, bidi bitukolesha.
3. Bua tshinyi kabiena bitukemesha padi bantu batuendeshila ngumu mibi ne batuluisha?
3 Yezu wakamba ne: ba pa buloba bavua ne bua kukina bayidi bende anu muvuabu bamukine. (Yone 15:18-20) Ke bualu kayi kabiena bitukemesha padi bantu batuendeshila ngumu mibi ne batuluisha to. Nunku, bu mudi matuku a ku nshikidilu enda asemena pabuipi bikole ne bu mudi tshiji tshia Satana tshienda tshivula, malu aa adi anu ne bua kuenzeka. (Buak. 12:12) Tudi ne bua kusanka bualu malu aa adi aleja ne: bulongolodi bua Satana bukadi pa kujimina.
4. Bantu bobu babenga kututeleja patudi tuyisha lumu luimpe, ntshinyi tshitudi mua kuenza?
4 Andamune ne dîyi dimpe: Padi bantu babenga kututeleja, tudi ne bua kubandamuna anu ne dîyi dimpe ne lutulu. (Nsu. 15:1; Kolos. 4:5, 6) Padiku mushindu, tudi mua kumvuija muena kumbelu udi musue kuteleja ne: kudi malu a bungi atubu bashiminyina Bantemu ba Yehowa, anyi kumuebeja tshidiye ubengela kututelejila. Tuetu bamuandamune ne dîyi dimpe, bidi mua kumuambuluisha bua kumona ne: malu avuaye mumvue bua Bantemu ba Yehowa nga dishima ne kuitaba bua kuyukila netu musangu walonda. Kadi muena kumbelu yeye ne tshiji tshikole, mbimpe tuetu kumulaya ne kumbuka mu bukalanga. Tumanye ne: nansha bantu bobu kabayi batuteleja, Yehowa udi wangata mudimu utudi tuenza ne mushinga.—Yesh. 52:7.