‘Biakudia pa dîba diabi’
1. Mmunyi muvua mpuilu wa pa buende wa dituku dimue mukuambuluishe wewe ne bantu bakuabu?
1 Patudi tujikija mpuilu wa pa buende wa dituku dimue, tutu tuamba pa tshibidilu ne: “Ke malu atuvua nawu dijinga.” Mutangidi wa tshijengu kampanda wakamba panyima pa yeye mumane kubuela mu mpuilu eu ne: bantu bakuabu ba mu tshijengu tshiende mbaleje dijinga dia kuvudija mudimu wabu wa kuyisha. Mutangidi mukuabu wa tshijengu wakamba ne: “Mmutuambuluishe bua kumona tshikondo tshitudi ne kukonkonona malu atudi basungule bua kuenza mu nsombelu wetu.” Mukuabu pende wakamba ne: “Mpuilu eu mmubavuluije bua kukonkonona bikalabu badifile mu mudimu wa kuyisha udi ne mushinga.” Mmunyi muvua mpuilu wa pa buende mukuambuluishe wewe?
2. Mmalu kayi atualonga mu mpuilu wa pa buende wa tshidimu tshipiatshipia tshia mudimu?
2 Mpuilu wa tshidimu tshia mudimu tshialua neikale pende ne malu atudi nawu dijinga. Neikale ne tshiena-bualu ne: “Tunyemene kudi Yehowa,” tshiangatshila mu Musambu wa 118:8, 9. Nebumvuijemu biena-bualu ebi: “Mudi Yehowa muikale tshinyemenu mu tshikondo tshia dikenga,” “Ambuluisha bakuabu bua kusokoma mu mapuapua a Yehowa,” “Ikala pebe tshinyemenu anu bu Yehowa,” “Bansonga wetu, vuijayi Yehowa tshinyemenu tshienu” ne “Yehowa udi utulama mu mparadizu wetu wa mpindieu.”
3. Ntshinyi tshitudi mua kuenza bua mpuilu atuambuluishe bikole?
3 Bua mpuilu kutuambuluishaye: Padibu bamanyisha dituku dienzeka mpuilu wa pa buende, udilongolole bimpe bua kubuelamu ne ubikile balongi bebe ba Bible bua kubuelabu pabu. Bua tuetu ‘kuvudija maminu bua dinanukila,’ tudi ne bua kukuata malu atudi tumvua. (Luka 8:15) Nunku udilongolole bua kuteleja mpuilu bimpe ne kufunda malu a mushinga ne malu audi musue kutumikila mu nsombelu webe ne mu mudimu wa kuyisha. Nuikale nuyukila malu anudi bumvue mu dîku ne ukonkonone mushindu uudi wewe ne bena mu dîku dienu mua kuatumikila.
4. Bua tshinyi tudi ne bua kuindila ne muoyo mujima mpuilu wetu wa dituku dimue udi kumpala eku?
4 Anu bu mutubu balamba biakudia bimpe bia muenya, mbalongolole mpuilu wa pa buende wa tshidimu etshi ne dinanga dionso ne meji onso. Yehowa abeneshe malu onso audi wenza bua kubuela mu mpuilu eu ne bua ‘biakudia’ bidibu bafila ‘pa dîba diabi’ bua kudisha bamanyishi bena Kristo bikuambuluishe.—Mat. 24:45.