Bukole budi nabu Bible mu nsombelu webe

Bible ukadi mupeshe bantu miliyo mivule bukole bua kushintulula nsombelu wabu ne kumuvuija muimpe menemene. Ngimue ya ku mikenji kayi ya mu Bible yatuambuluisha mua kupita ne ntatu ya tshikondo etshi patudi tuyitumikila? Newikale ne disanka dia kupeta diandamuna dia lukonko elu paudi utangila filme muibidi wa mu ditadi dia filme isatu didi ne tshiena bualu ne: La Bible: un livre historique et prophétique (Bible mmukanda wa malu malelela ne wa milayi). Filme muibidi eu udi ne tshiena-bualu ne: La Bible: une force dans votre vie (Bukole budi nabu Bible mu nsombelu webe). Wewe mumane kutangila filme ewu, udiku mua kuandamuna nkonko idi ilonda eyi anyi?

(1) Tshidi tshienza bua Bible ikale mupite mikanda yonso itu bantu bafunde ntshinyi? (Eb. 4:12) (2) Pikala Bible ne bukole budi mua kuambuluisha bantu bua kulengeja nsombelu wabu, bua tshinyi bantu ba bungi badi ne ntatu mipite bungi? (3) Ntshiena-bualu kayi tshinene tshidi mu Bible? (4) Tela mvese idibu batele mu filme idi mua kuambuluisha bena mabaka bua (a) kulengeja mushindu utubu bayukidilangana ne (b) kudikanda? (5) Leja mushindu udi mmuenenu udi nende bena Kristo bua dibaka ulengeja nsombelu wabu. (Ef. 5:28, 29) (6) Mmunyi mudi Yehowa mushile baledi tshilejilu tshimpe? (Mâko 1:9-11) (7) Baledi badi mua kuenza tshinyi bua kuvuija dilonga dia mu dîku tshikondo tshia disanka? (8) Pa kumusha dibalongesha Bible, mbualu kayi bukuabu budi Dîyi dia Nzambi dilomba baledi bua kukumbajila bana babu? (9) Mmunyi mudi mibelu ya mu Bible mua kuambuluisha bena mu mêku mu malu a makuta? (10) Tela mêyi a mu Bible adi akula bua bukezuke, dinua dia bintu bia lulengu, dinua maluvu bibi ne dibungama adi mua kuambuluisha bantu bua kukepesha masama padibu baatumikila. (11) Leja malu adibu balaye mu Bible adi mua kutukolesha. (Yobo 33:25; Mus. 145:16) (12) Amba mudi Dîyi dia Nzambi dikuambuluishe bua kulengeja nsombelu webe. (13) Mmunyi muudi mua kuenza mudimu ne ditadi edi bua kuambuluisha bantu bakuabu?