Malu adi bana betu badi benza midimu mu Tshisangilu tshia Mudimu ne bua kulonda

Kutuadija ne Mudimu wetu wa Bukalenge eu, mbapepeje malu mu programe wa Tshisangilu tshia Mudimu. Malu adi kuinshi eku ne adibu batuvuluije aa neashintulule ne neatokeshe avuabu baleje mu tshiena-bualu tshidi mu Mudimu wetu wa Bukalenge wa ngondo 5 wa 2009 tshia ne: “Mushindu wa kudilongolola bua Tshisangilu tshia Mudimu.”

▪ Muyuki: Mmuyuki muangatshila muaba kampanda, kakuyi diela dia bantu nkonko to. Ngambamalu udi ne bua kuimanyina pa malu ambuluisha tshisumbu bikole menemene.

▪ Mu nkonko ne mandamuna: Ngua kuenza anu mutu dilonga dia Tshibumba tshia Nsentedi dienzeka amu, mbimpe kutuadijaku ne mêyi makese ne kujikija kabidi ne mêyi makese; mbimpe kuela nkonko mu bikoso bionso. Mulumbodi katambi kuakula to. Badi mua kubala mvese minene padiku dîba. Kabatu babala bikoso to, anu bobu bambe bua kubibala.

▪ Diyukidilangana ne bateleji: Mmuyuki kadi muikale ne imue nkonko ya kuela bateleji. Ki mmuyuki nkayawu to, ne ki ndiela bantu nkonko nkayadi to.

▪ Manaya a bilejilu ne diela bantu nkonko: Padibu bamba bua kuenzeja dinaya dia tshilejilu bidi bimvuija ne: muanetu udibu bapeshe mudimu eu ke udi ne bujitu bua kulongolola dinaya; kadi ki nyeye udi udienza to. Bantu badiye usungula bua kumuambuluisha badi ne bua kuikala bantu bakumbane ne ba tshitembu; mbimpe ambulule nabu dinaya matuku a bungi kumpala. Ki mbitambe buimpe bua kulomba bamanyishi bapiabapia ne aba badi kabayi ne dimanya dikumbane bua benze dinaya dia mushindu kampanda wa kuyisha anu bua kubapeshaku pabu mpunga wa kupita kumpala nansha. Kadi bamue ba kudibu badi mua kuangata muaba wa bantu badibu bayisha, mbuena kuamba ne: bu batuyukidishi. Bamanyishi badi benza manaya badi ne bua kutangila bateleji. Bana betu badibu bela nkonko badi ne bua kuimanyina kumpala, kabikadi basombe mu bibasa to. Padibi bikengela kuenza dinaya anyi kuela bantu nkonko, mbimpe kuenza diambulula kumpala kua dîba. Tshisangilu tshiotshi tshikale tshikadi tshidie dîba, muanetu udi ne bua kuipidija mudimu wende, kadi enzeje amu dinaya anyi ele amu bantu nkonko, kabiumbushi to. Kumpala kua basadidi ba mudimu kusungulabu bantu ba kuenza nabu manaya anyi ba kuela nkonko, badi ne bua kuanji kuyikila ne mutangidi wa malu a kasumbu ka bakulu anyi ne mukulu mukuabu.

Pikala mudimu kampanda muikale ne au malu masunguluke a kulonda, bidi bikengela kualonda bimpe menemene. Bana betu bobu benza midimu yabu bu mudibi bileja mu tshiena-bualu etshi, ‘malu neenjibue bilengele, malondangane biakane’ mu Tshisangilu tshia Mudimu.​—1 Kol. 14:40.