‘Kuikadi ne buôwa’
1. Anu bu Yelemiya, nntatu kayi itudi mua kupeta?
1 Yelemiya wakadimona kayi mukumbane pakamupeshabu mudimu wa buprofete. Kadi Yehowa wakamuambila ne: ‘Kuikadi ne buôwa,’ e kumukolesha ku muoyo ne bulenga buonso bua kukumbajaye mudimu wende. (Yel. 1:6-10) Nansha lelu kabidi, buôwa budi mua kutupangisha petu mua kuyisha. Imue misangu, patudi tutshina bua mushindu watuandamuna bantu ne mudibu mua kutumona, bidi mua kutupangisha bua kuyisha. Kadi ntshinyi tshitudi mua kuenza bua kujikija buôwa? Mmasanka kayi atuapeta?
2. Mmunyi mudi didilongolola mua kutuambuluisha bua kukepesha buôwa?
2 Dianjila kudilongolola: Tuetu tudilongolola bimpe, netukepeshe buôwa. Tshilejilu, tuetu badianjile kudilongolola ku malu atu bantu bamba bua kubenga kututeleja, nebituambuluishe bua kubayisha katuyi tutshina. (Nsu. 15:28) Panudi nuenza Ntendelelu wa mu Dîku, mbimpe kabidi kuenza manaya a mushindu wa kuyisha mu buambi ne mu kalasa padi bantu batukosa ku mêyi bua kubenga kututeleja.—1 Pet. 3:15.
3. Mmunyi mudi dieyemena Yehowa dituambuluisha bua kujikija buôwa?
3 Eyemena Yehowa: Bua tuetu kujikija buôwa, tudi ne bua kueyemena Yehowa, bualu mmutulaye bua kutuambuluisha. (Yesh. 41:10-13) Ebu mbukubi bua dikema, ki mmomu anyi? Yezu wakatujadikila kabidi ne: padi imue nsombelu itudi katuyi belela meji itutulukila, nyuma wa Nzambi neatuambuluishe bua kuyisha bimpe. (Mâko 13:11) Nanku, tuikalayi tulomba Yehowa nyuma wende eu misangu yonso.—Luka 11:13.
4. Patudi tutungunuka amu ne kuyisha nansha patudi tupeta ntatu, mmasanka kayi atudi tupeta?
4 Masanka awapeta: Patudi tutungunuka amu ne kuyisha nansha mudi bantu babenga kututeleja, neutantamene kabidi ntatu ituapeta mu matuku atshilualua. Tudi tupeta muoyo mukole ne dikima: malu adi aleja mutudi ne nyuma wa Nzambi. (Bien. 4:31) Patudi kabidi tujikija buôwa ku diambuluisha dia Yehowa, tudi tukolesha ditabuja dietu ne dieyemena bukole buende bua kutupandisha nabu. (Yesh. 33:2) Tudi kabidi tupeta disanka patudi tumanya ne: tudi tusankisha tatu wetu wa mu diulu. (1 Pet. 4:13, 14) Nunku, katutshinyi bua kuyisha ne dikima, tuikale anu bashindike ne: Yehowa neatuambuluishe.