Wewe dijinga ne mikanda ya mu muakulu muenyi pa lukasa

Imue misangu tutu tupeta bantu badi dijinga ne kubala mikanda yetu ya mu muakulu kampanda itudi katuyi nayi mu stoke wa tshisumbu tshietu. Udiku mumanye ne: wewe ne mushindu wa kuya ku Enternete udi ne tshiamu tshia kupatula natshi mabeji (emprimante) udi mua kupatula mikanda pa mabeji mu miakulu mitue ku 400 anyi? Tangila tshiudi mua kuenza:

• Udi uya mu www.jw.org: ke adrese anyi muaba wetu utu mumanyike wa ku Enternete.

• Ku dia balume kua dibeji dia mbangilu, kudi mêna a miakulu mikese. Bua kumona mêna a miakulu yonso idiku, tuta pa ka tshimfuanyi ka dibulunge dia buloba.

• Tuta pa muakulu uudi musue. Neumone dibeji dipatuka didi ne mikanda iudi mua kupatula ku emprimante bu mudi: trakte, broshire ne mikanda mikuabu. Bu mudi dibeji edi difunda mu muakulu uudi musungule, wewe kuyi mujingulule bimpe mêna a mikanda, kutshinyi to.

• Kuma pa tshimfuanyi anyi tshiena-bualu kayi tshionso. Neumone tshiudi mukangule atshi tshipatuka, pashishe udi mua kutshipatula pa mabeji bilondeshile mudibu balongolole bua kupatula mabeji ku Enternete au.

Mu adrese wetu mudi anu mikanda mikese, kadi udi mua kupetela mikanda mikuabu mu tshisumbu. Paudi umona ne: muntu mmunange bulelela, mbimpe umuenzele komande wa mikanda mikuabu mu tshisumbu.