Udiku mua kuambuluisha muena dibaka udi kayi Ntemu bua kuitaba bulelela anyi?
1. Bua tshinyi mudimu wa kuambuluisha mulume anyi mukaji udi kayi Ntemu kawena utangila anu muena dibaka nende ukadi Ntemu?
1 Mu tshisumbu tshienu mudiku bamue bamanyishi badi ne ba bayabu anyi bakaji babu kabayi Bantemu anyi? Pikalabu momu, mbasue bua bena dibaka nabu babuele pabu mu ntendelelu mulelela. Kadi ki nganu bobu nkayabu badi basue bua bena dibaka nabu bitabe bulelela to. Anu bu Nzambi, bena mu tshisumbu bonso mbasue bua ‘bantu bonso basungidibue, bafike ku dimanya dia malu malelela.’ (1 Tim. 2:4) Ntemu yeye ne bayende anyi mukajende kayi muena Kristo, mmunyi mutudi mua kumuambuluisha bua kuitabaye bulelela?
2. Mmunyi mutudi mua kuambuluisha bayetu anyi mukajetu udi kayi Ntemu ne busunguluji buonso?
2 Tshia kumpala, tudi ne bua kumona malu mudi muena dibaka udi kayi Ntemu uamona. Bena dibaka ba bungi batu bakayi Bantemu mbanange mêku abu ne badi baditatshisha bua kuikala bena dibaka bimpe anyi baledi bimpe. Pamuapa mbalamate malongesha a mu tshitendelelu tshiabu adi abengangana ne etu. Imue misangu mbamanye anu malu makese patupu adi atangila Bantemu ba Yehowa pa kumusha malu a dishima avuabu babambile kudi bantu badi kabayi bamanye anyi basue Bantemu. Bamue kabena basanka padi bena dibaka nabu bapitshisha dîba divuabu basomba ne bena mu dîku diabu mu malu a Nzambi to. Tuetu bikale ne busunguluji, netuenzele muena dibaka udi kayi Ntemu malu ne bulenga ne kanemu, ne kubenga kuikala tufika munda tshianana tshianana patudi nende pamue.—Nsu. 16:20-23.
3. Mmushindu kayi mutambe buimpe utudi mua kusaka muntu udi kayi Ntemu bua kuitaba bulelela?
3 Muudi mua kumutabalela: Mushindu muimpe utudi mua kutamba kusaka muena dibaka udi kayi Ntemu ku ditaba bulelela, nku bienzedi bietu, ki nku dimulongesha Bible to. (1 Pet. 3:1, 2) Bualu bua mushinga nkumutabalela. Bana betu ba bakaji mu tshisumbu badi mua kuikala batabalela mukaji wa muena Kristo udi kayi Ntemu ne bana betu ba balume benza bia muomumue bua bayende wa muena Kristo udi kayi Ntemu. Mushindu kayi?
4. Leja mushindu utudi mua kutabalela muntu udi kayi Ntemu.
4 Wewe kuyi muanji kutuilangana ne muena dibaka udi kayi Ntemu, udi mua kuanji kuyukila ne muena dibaka udi Ntemu kumpala kua kuya kayukila nende. Yeye kayi muleje disanka, kuteketshi mu maboko to. Patudi ne bulenga ne tumutabalela, bidi mua kumusaka bua kumona Bantemu ba Yehowa mu mushindu muimpe. (Lomo 12:20) Bamue bena Kristo bashindame mu ditabuja bavua babikile muntu uvua kayi Ntemu ne bena mu dîku diende bua kudia nabu ne dijinga dia kumanyangana nende bimpe ne kumufikisha ku diumusha lungenyi kayi luonso lubi luvuaye mua kuikala nalu bua Bantemu. Bavua bayukila anu malu avua amusankisha pamutu pa kuyukila malu a mu Bible. Pashishe padibu bamona ne: mmushintulule bikole mushindu uvuaye umona Bantemu, badi mua kutuadija kuyukila malu a mu Bible. Udi mua kuitaba bua kulua mu bisangilu bua kumona malu adi mukajende ulonga nangananga pikalaye ukadi mumanyangane ne bamue bana betu. Nansha yeye kayi muanji kutuadija kulonga Bible, tudi mua kumuela kalumbandi bua mudiye ukuatshisha mukajende anyi bayende.
5. Bakulu badi mua kuenza tshinyi bua kuambuluisha muena dibaka udi kayi Ntemu?
5 Bakulu ke badi mua kutamba kuambuluisha bantu aba ne kukeba mishindu ya kubayisha diba dionso didi mushindu umueneka. Muntu yeye kayi muanji kuitaba bua kulonga Bible, udi mua kuteleja pamuapa mibelu ya mu Bible padiye mu lupitadi anyi padiye usama bikole. Bikalabu bapete lutatu lukole mu dîku diabu, tshilejilu, bobu bafuishe, bakulu badi mua kuambila muena dibaka udi kayi Ntemu bua ikalepu padibu babakankamija.
6. Bua tshinyi tudi ne bua kuambuluisha balume anyi bakaji badi kabayi Bantemu?
6 Elabi meji disanka didi muena Kristo mua kuikala nadi padiye umona bayende anyi mukajende witaba bulelela. Bualu ebu budi busankisha kabidi Yehowa, banjelu ne bena mu tshisumbu bonso bikole. (Luka 15:7, 10) Kadi, nansha bikalaye kayi muitabe ku ntuadijilu, tuikale amu ne disanka bualu Yehowa udi wanyisha mudimu utudi tuenza, ne ‘kena musue umue wetu ajimine, kadi udi musue bonso balue kukudimuna mitshima yabu.’—2 Pet. 3:9.
[Lungenyi lunene lua mu dibeji 6]
Mushindu muimpe utudi mua kutamba kusaka muena dibaka udi kayi Ntemu ku ditaba bulelela, nku bienzedi bietu, ki nku dimulongesha Bible to