Disambila ne dielangana meji bidi bituambuluisha bua kuyisha ne tshisumi
1. Ntshinyi tshiakambuluisha Yezu bua kutungunuka ne mudimu munene uvuaye muluile pa buloba?
1 Dimue dituku ku dilolo Yezu uvua wondopa bantu, wipata kabidi bademon. Pakalua bayidi bende kumusangana dituku diakalonda, bakamulomba bua atungunuke ne kuenza bishima bamba ne: “Bantu bonso badi bakukeba.” Nansha nanku, Yezu kavua mulengulule mudimu wende munene wa kuyisha lumu luimpe to. Kadi wakabandamuna ne: ‘Tuyayi bietu kukuabu mu minga misoko idi pabuipi, mbambileku bualu bua Nzambi; ngakaluila bualu ebu.’ Ntshinyi tshiakambuluisha Yezu bua kutungunuka ne mudimu wa kuyisha? Uvua mujuke patshiatshia bua kusambila ne kuelangana meji. (Mâko 1:32-39) Mmunyi mudi masambila ne dielangana meji mua kutuambuluisha petu bua kuyisha ne tshisumi?
2. Tela malu atudi ne bua kuelangana meji bua kutungunuka ne kuyisha ne tshisumi.
2 Tudi tuelangana meji bua malu kayi? Yezu wakamona ne bantu bavua ‘batata, bamuangalake bu mikoko idi kayiyi ne mulami.’ (Mat. 9:36) Bia muomumue, tudi petu mua kuelangana meji bua mudi bantu bajinga kuteleja lumu luimpe bikole. Tudi ne bua kuenza nunku bualu matuku mmashale mukese. (1 Kol. 7:29) Tudi mua kuelangana meji bua midimu ya Yehowa ne ngikadilu yende, bua diakalenga dia kuikala Bantemu bende ne bua malu mimpe atudi balonge mu Dîyi diende adi bantu ba bungi kabayi banji kumanya mu teritware wetu.—Mus. 77:11-13; Yesh. 43:10-12; Mat. 13:52.
3. Ndîba kayi ditudi mua kuelangana meji?
3 Ndîba kayi ditudi mua kuelangana meji? Anu bu Yezu, bamue batu bajuka pa dinda padiku kakuyi mitoyi bua kuelangana meji. Bakuabu pabu batu belangana meji dilolo kumpala kua kulala. (Gen. 24:63) Nansha tuetu ne malu a bungi a kuenza, tudi mua kukeba dîba dia kuelangana meji. Bakuabu batu belangana meji padibu mu mashinyi baya muaba kampanda. Banga batu belangana meji bimpe padibu bikisha mu midi. Ba bungi batu bamona ne: kuelangana meji kumpala kua kuyisha nansha bua minite mikese kudi kubambuluisha bua kuyisha ne dikima ne tshisumi tshia bungi.
4. Tudi ne bua kuelangana meji bua tshinyi?
4 Kuelangana meji ne kusambila nekukoleshe dijinga dietu dia kuenzela Yehowa mudimu, nekutuambuluishe bua kuteka ntendelelu mulelela muaba wa kumpala ne nekukoleshe dipangadika dietu dia kutungunuka ne kuyisha. Dielangana meji diakambuluisha Yezu (Muena Mudimu Munene wa Nzambi) bikole, nedituambuluishe petu.