Tshiena-bualu tshipiatshipia tshiatuambuluisha bua kutuadija kulonga Bible ne bantu
1. Ntshiena-bualu tshinene kayi tshipiatshipia tshiapatuka mu Tshibumba tshia Nsentedi tshia kufila mu buambi? Mbatshienze bua tshinyi?
1 Kutuadijila mu ngondo wa kumpala, nekuikale tshiena-bualu tshinene tshipiatshipia tshiapatuka mu Tshibumba tshia Nsentedi tshia kufila mu buambi tshiatuambuluisha bua kutuadija kulonga Bible ne bantu. Tshidi tshiamba ne: “Anyisha bua kulonga Dîyi dia Nzambi.” Malu ikala apatuka mu tshiena-bualu etshi mmenza bua kulonga ne bantu mu buambi nansha muikala bamue bantu mua kusanka bua kuabala nkayabu.
2. Ngamue malu kayi ikala mu tshiena-bualu etshi?
2 Malu ikalamu: Tshiena-bualu tshionso tshia mu tshiena-bualu tshinene ne tu biena-bualu tukese mbienza mu nkonko ya kuela muntu panudi nuyukila nende. Ki mbatele mêyi a mu mvese ya nshindamenu to, kadi mbayifile bua muntu adibadile nkayende mu Bible. Mbenze bikoso bîpi bua kumona mua kubilonga nansha bimanyine kulu. Tshiena-bualu tshionso tshidi tshituma muntu mu mukanda wa Bible ulongesha bua kukuambuluisha bua kutuadija kulonga mukanda eu ne muntu padiku mushindu.
3. Patudi tuyisha ku nzubu ne ku nzubu, mmunyi mutudi mua kuenza mudimu ne tshiena-bualu tshipiatshipia etshi bua kutuadija kulongesha bantu Bible nansha bimanyine kulu?
3 Mua kuenza natshi mudimu: Paudi upesha muntu bibejibeji, umuele lukonko ludi mua kumukoka ntema ku tshiena-bualu. Tshilejilu, Tshibumba tshia Nsentedi tshia dia 1/1/2011 tshidi tshileja mushinga udi nawu Bible. Udi mua kumukonka ne: “Utu umonaku Bible bu Dîyi dia Nzambi anyi bu mukanda muimpe patupu? [Lekela muntu andamune.] Ndi ne tshintu tshimpe tshidi tshiakula bua bualu ebu.” Muleja lukonko lua kumpala, bala tshikoso tshia kumpala ne bala mvese udibu bafile. Balulula lukonko, muambila bua andamune. Nukonkonone nende malu bungi bukumbanyine bilondeshile nsombelu wa muntu, wenze mudimu ne nkonko mudiyi milondangane. Kumpala kua kumbuka, ukoke ntema yende ku lukonko ludi lulonda, numvuangane nende bua kulua kuyukidilapu. Lumingu luonso, ikala ukonkonona malu anukavua bamone mu tshiena-bualu atshi too ne pawamutuadila nimero mukuabu. Mukuabu mushindu ngua kulomba muntu bua kulonga nende Bible anu panudi nupetangana bua musangu wa kumpala. Pashishe wenze mudimu ne tshiena-bualu tshia mu tshibejibeji bua kumuleja mututu tulonga.
4. Patudi tupinganyina bantu, mmunyi mutudi mua kuenza mudimu ne tshiena-bualu etshi?
4 Udi kabidi mua kukuata mudimu ne tshiena-bualu tshinene etshi bimpe kudi bantu bautu ne tshibidilu tshia kupesha bibejibeji anyi paudi upinganyina bantu bakuabu. Udi mua kuamba ne: “Kudi bualu bupiabupia mu Tshibumba tshia Nsentedi etshi. Ndi musue kukuleja tshiudi mua kuenza.” Tudi basue bua tshiena-bualu tshipiatshipia etshi tshiambuluishe bantu ba bungi menemene bua “bafike ku dimanya dia malu malelela.”—1 Tim. 2:4.