Tshikondo tshia Tshivulukilu ntshikondo tshia kuvudija mudimu
1. Tela malu adi ne bua kutusaka bua kuvudija mudimu mu ngondo 3, 4, ne 5.
1 Kuenaku mua kuvudija mudimu wa buambi mu tshikondo tshia Tshivulukilu anyi? Mu miaba ya bungi, kuulu nekuikale kuimpe, ku mêsu nekuikale kushala kutoke too ne dilolo dia menemene. Bamue bamanyishi nebapete dikisha ku mudimu anyi mu tulasa, nanku nebadifile mu buambi. Kutuadija mu dituku 2 dia ngondo muinayi, netutuadije kubikila bantu bua kulua mu Tshivulukilu mu dia 17 dia ngondo muinayi. Bua bantu bonso badi balua kubuela mu Tshivulukilu, netuditatshishe bua kukolesha dijinga diabu dia kulonga ne netubabikile mu muyuki wa pa buawu wenzabu mu dia 25 dia ngondo muinayi. Kakuyi mpata, kudi malu a bungi adi atusaka bua kuvudija mudimu wetu mu ngondo 3, 4 ne 5.
2. Leja mushindu mutambe buimpe utudi mua kuvudija mudimu wetu.
2 Ikala mpanda-njila muambuluishi: Mushindu mutambe bulenga wa kuvudija mudimu, nkuikala mpanda-njila muambuluishi. Bu mututu ne bia bungi bia kuenza, bidi bilomba kuanji kudilongolola ne kuakaja programe wetu. (Nsu. 21:5) Tshilejilu, udi mua kuanji kulekela amue malu adi kaayi ne mushinga. (Filip. 1:9-11) Udi kabidi mua kuambila bena mu tshisumbu bakuabu dijinga diebe dia kulua mpanda-njila muambuluishi.
3. Tshidi mêku mavule mua kuenza bua kuyisha bikole ntshinyi?
3 Mu Ntendelelu wenu wa mu Dîku wa musangu udi ulonda, nudi mua kuyikila bua bualu ebu. (Nsu. 15:22) Nuenu nuambuluishangana, bamue nebalue bampanda-njila bambuluishi mu ngondo umue anyi ya bungi. Kadi nuenu bamone ne: kakuena mushindu? Nudi mua kuyisha amue matuku ku dilolo anyi kuenza mêba a bungi mu Disambombo ne mu Dia lumingu.
4. Mmalu kayi mimpe atudi mua kupeta patudi tuvudija mudimu wa buambi mu tshikondo tshia Tshivulukilu etshi?
4 Yehowa utu umona bionso bitutu tuenza bua kumukuatshila mudimu, utu usanka bikole bua mututu tudipangisha amue malu. (Eb. 6:10) Tuetu tupesha Yehowa ne bantu bintu bitudi nabi, netupete disanka. (1 Kul. 29:9; Bien. 20:35) Kuenaku mua kuvudija mudimu mu tshikondo tshia Tshivulukilu tshia tshidimu etshi bua kuvudija disanka ne kupeta bipeta bimpe anyi?