Mukanda wa ‘Rends pleinement témoignage au sujet du Royaume de Dieu’

1. Mu matuku 14 a ngondo muisatu, bimue bisumbu nebituadije kulonga mukanda kayi mu Dilonga dia Bible dia Tshisumbu?

¹ Kubangila ku lumingu lua dia 14 ngondo muisatu wa 2011, bisumbu bia Anglais ne Mfualansa ne Tshibemba ne Tshisawudi nebituadije kulonga mukanda wa ‘Rends pleinement témoignage au sujet du Royaume de Dieu’ mu Dilonga dia Bible dia Tshisumbu. Mukanda eu udi wakula bua malu a mu mukanda wa Bienzedi mu mushindu udi ujula muntu dijinga dikole dia kumanya malu au. Pamutu pa kuakula bua mvese ne mvese, mukanda eu udi ushindamena pa malongesha adi miyuki idi mu Bienzedi itupesha ne mushindu udiyi mua kutuambuluisha.​—Lomo 15:4.

2. Kuenaku mua kuleja amue malu adi mu mukanda eu anyi?

² Mushindu udi mukanda eu: Mu dibeji 2 mudi mêyi a mbangilu. Mêyi aa mmukanda muimpe udi Kasumbu Kaludiki katufundile bua kuleja mudibu basue ne: malu adimu atuambuluishe. Kutuadija ne nshapita 2, badi banji kufila diumvuija dikese dia malu adi mu nshapita yonso, bafila kabidi mvese idibu bangatshile malu au. Mu nshapita ya bungi mudi tuzubu. Tuzubu etu tudi ne malu a nshindamenu a bantu, a miaba ne a amue malu avua menzeke. Mbashiye miaba minene ku mielelu ya mabeji bua wewe kufunda amue malu. Mudi bimfuanyi bidi ne tu malu tua bungi tua malu adibu balonde mu Bible; bionso ebi bua tuetu kumona mu lungenyi malu au. Dibeji dia ndekelu didi ne diumvuija dia malu adi mu tshimfuanyi tshionso tshia tshinene tshidi mu mukanda eu. Mu tshizubu tshia kumpala ne tshia ndekelu mudi tuarte tudi tuleja muvua mudimu wa buambi wenda uya kumpala mu bidimu lukama bia kumpala, baleja muakafikabu ku diyisha lumu luimpe too ‘ne ku mfudilu kua buloba.’​—Bien. 1:8.

3. Mu kulonga mukanda wa Bienzedi, bantu nebapete mandamuna a nkonko minene kayi?

³ Mandamuna a nkonko minene: Kulonga mukanda wa Bienzedi nekutuambuluishe bua kumvua bimpe mandamuna a nkonko minene idi itangila mudimu wa buambi. Tshilejilu, bena Kristo balelela nebabamanyine ku mudimu kayi? ku mukenji kayi udibu bayisha? Udi ulombola mudimu wa kuyisha pa buloba bujima eu nnganyi? Udi uulombola mushindu kayi? Kukengesha ne kuluisha bena kristo kudi kubapetesha mpunga kayi? Nyuma muimpe udi ne mudimu kayi mu mudimu wetu wa buambi?

4. Leja mudi dilonga dia mukanda wa Bienzedi mua kuambuluisha muntu bikole.

⁴ Bua mukanda eu kuambuluisha muntu bikole, bidi bikengela ikala uubala kumpala kua dîba, udilongolola bua kuandamuna mu bisangilu. Bikengela kubuela mu Dilonga dionso dia Bible dia Tshisumbu, kuela meji bua mushindu wa kuenza malu adibu balonga au patudi mu buambi. Dilonga dia mukanda eu disakaku muntu yonso bua kuyisha Bukalenge bua Nzambi, kuyishilamu.​—Bien. 28:23.