Mudi Bantemu ba Yehowa balongolola bua kuyisha lumu luimpe
Bantemu ba Yehowa mbatuadije kudilongolola bua kuyisha lumu luimpe kukadi bidimu bipite pa 100. Mudimu mukole wa katshia ne katshia udi wenzeka lelu, bualu tudi tuyisha mu miakulu nkama ne nkama, mu matunga mapite pa 230. (Mat. 24:14) Bidi bikengela kuenza mudimu eu bua tshinyi? Mmunyi mudiwu wenzeka pa buloba bujima? Filme wa Les Témoins de Jéhovah: organisés pour proclamer la bonne nouvelle (Mudi Bantemu ba Yehowa balongolola bua kuyisha lumu luimpe) neandamune nkonko eyi. Udi umvuija bimpe mudi mudimu wetu wenzeka pa buloba bujima. Paudi ujikija kutangila filme eu, ukebe mandamuna a nkonko idi ilonda eyi:
Mmunyi muvua filme eu mukumvuije ne mukupeshe dianyisha dia bungi bua: (1) mushindu udi bulongolodi bua Yehowa budienzeja bua bayishe lumu luimpe? (2 Tim. 4:2) (2) mêku a Betele adi mu matunga a bungi? (3) tulasa tudibu benze bua kulongesha ba misionere ne batangidi? (2 Tim. 2:2) (4) buimpe bua dikonkonona mvese dituku dionso mu dinda ne dilongolola bisangilu lumingu luonso? (Bien. 17:11) (5) buimpe bua kubuela mu bisangilu? (Eb. 10:24, 25) (6) malu malenga awapeta palua buloba ebu Mparadizu? (Yesh. 11:9) (7) diakalenga diudi nadi dia kuenza pebe mudimu wa dinowa?—Yone 4:35.
Filme eu mmuambuluishe bantu bapiabapia bikole bua kumanya mudi mudimu wetu wa diyisha wenzeka pa buloba bujima. (8) Tudi mua kumuleja balongi betu ba Bible, balela betu ne bantu bakuabu dîba kayi? (9) Mmunyi muvua bantu banyishe filme eu pauvua mubelelaye?
Patudi tuela meji bua mudi Yehowa wenza malu, muoyo wetu udi utusaka bua kuamba anu bu mufundi wa Musambu wa 40, ne: ‘Yehowa Nzambi wanyi, wakuvudija malu a kukema awakuenza ne malu awakupangadija bua kutuenzela; kakuena mukuabu utudi bamanye mua kuelekeja nebe.’ (Mus. 40:5) Tukuatayiku mudimu bimpe ne filme eu bua kusaka bantu bua bikale ne dianyisha bua Yehowa ne bua bulongolodi buende.