‘Disua dia Nzambi dienzeke’
1. Mpuilu wa pa buende wa mu tshidimu tshia mudimu tshia 2012 neikale ne tshiena-bualu kayi? Bua tshinyi ntshikumbanyine?
1 Yehowa wakatufuka ku disua diende. (Buak. 4:11) Nunku katuakukumbaja tshidibu batufukile, bituikale katuyi tulonga ne tuenza disua dia Nzambi to. Ki mbualu butekete to, bualu muoyo wetu utu utusaka bua kulonda ‘nkuka ya mibidi yetu’ anyi bua kuenza ‘disua dia bisamba bia bende.’ (Ef. 2:3; 1 Pet. 4:3; 2 Pet. 2:10) Nzambi yeye kayi mutuambuluishe, ‘netukuatshibue kudi Diabolo bua kuenza bu mu disua diende.’ (2 Tim. 2:26) Mpuilu wetu wa pa buende wa dituku dimue wa mu 2012 neambuluishe muntu yonso wa kutudi bua kuenza bualu buisatu bua ku malu a kumpala adi mu disambila dia Tatu wetu. (Mat. 6:9, 10) Neikale ne tshiena-bualu etshi: “Disua dia Nzambi dienzeke.”
2. Nebandamune nkonko kayi mu mpuilu wa pa buende?
2 Nkonko yandamunabu: Pawabuela mu mpuilu, ukebe mandamuna a nkonko eyi: Pa kumusha kuteleja Dîyi dia Nzambi, ntshinyi tshikuabu tshitudi ne bua kuenza? Mmunyi mutudi mua kutungunuka ne kujingulula tshidi Nzambi musue ne: tuenze? Bua tshinyi tudi ne bua kuikala ne muoyo wa kukeba bantu ba mishindu yonso bua kubambuluisha? Tudi mua kuenza tshinyi bua kuikala ne nsombelu muimpe? Nuenu bana ne bansonga, ntshinyi tshinudi mua kuleja Yehowa? Kuenza disua dia Yehowa kudi ne malu malenga kayi? Bua tshinyi tudi nangananga ne bua kukolesha bakuabu mu maboko?
3. Mmushindu kayi udi mpuilu eu mua kutuambuluisha?
3 Ubuele mu mpuilu, uteleje miyuki bimpe. Nemuikale ngamba-malu mukumbudi: muena ku Betele anyi mutangidi muena ngendu mukuabu. Ukebaku bua kuyikila nende (anyi nabu, pikalaye ne mukaji). ‘Kanupu malu aa muoyo’ to: panudi nupingana ku nzubu, nuambulule malu aa mu dîku anyi pa nkayenu, nukebe mushindu unudi mua kuenza disua dia Nzambi bimpe menemene.—Yak. 1:25.
4. Mbimpe kuteka disua dia Nzambi pa muaba wa kumpala bua tshinyi?
4 Bakadi pa kushipa bantu badi balonda majinga abu a mubidi ne babenga bua kutumikila Nzambi. (1 Yone 2:17) Nunku, tudi ne dianyisha kudi Yehowa bua mudiye mutulongoluele malu anu pa dîba diawu, malu adi atuambuluisha bua kuteka disua diende pa muaba wa kumpala.