Kuelakanyi to!
1. Ntshinyi tshitu tshilomba dikima? Bua tshinyi?
1 Ukadiku muelakane bua kuyisha mu tulasa bualu uvua utshina ne: nebakuseke anyi? Kakuyi mpata, bitu bikengela kuikala ne dikima bua kuakula, nangananga wewe ne bundu. Kadi tshidi mua kukuambuluisha ntshinyi?
2. Patudi tuyisha mu tulasa, mmunyi mudibi bilomba kuikala ne busunguluji?
2 Ikala ne busunguluji: Nansha mudi tulasa mua kuikala bu teritware webe, umanye ne: kabena bakulomba bua kuyishamu muntu yonso bu muutu wenza pautu uyisha ku nzubu ne ku nzubu to. Ikala ne busunguluji kumpala kua kuyisha muntu. (Muam. 3:1, 7) Tshiena-bualu kampanda tshia mu kalasa tshidi mua kukupesha mpunga wa kumvuija malongesha etu. Anyi mulongi wenu udi mua kukuebeja tshiudi kuyi wenzela amue malu. Bamue bena Kristo batu badimanyisha kudi balongeshi babu anu ku mbangilu kua tshidimu, babapesha mikanda idi yumvuija malongesha etu. Bakuabu batu bateka mikanda yetu pa bibasa biabu bua balongi babele nkonko.
3. Udi mua kuenza tshinyi bua kudilongolola bua kuyisha mu tulasa?
3 Ikala udilongolola: Wewe udilongolola, dikima diebe didi divula. (1 Pet. 3:15) Nanku, wikale udianjila kumona nkonko idibu mua kukuela ne mandamuna audi mua kufila. (Nsu. 15:28) Pikalaku mushindu, udi mua kuikala uya ne Bible ne mikanda idi ilonda eyi mu tulasa bua kumona mua kuandamuna bantu: Comment raisonner, Les jeunes s’interrogent ne mikanda mikuabu idi yakula bua bintu bidi Nzambi mufuke. Wambile baledi bebe bua kuenza manaya a mushindu wa kuandamuna bantu mu tulasa mu ntendelelu wenu wa mu dîku.
4. Bua tshinyi udi ne bua kutungunuka ne kuyisha mu tulasa?
4 Ikala ne meji mimpe: Kuedi meji ne: balongi benu nebikale bakuseka misangu yonso yudi wakula bua Bible to. Bamue badi mene mua kukema bua dikima diebe, nenku badi mua kukuteleja. Tshidibi, kuteketshi mu mikolo pikala muntu nansha umue kayi ukuteleja to. Yehowa neasanke bualu udi mubayishe. (Eb. 13:15, 16) Wikale umulomba bua atungunuke ne kukupesha ‘mutshima wa kuamba dîyi diende ne dikima dikole.’ (Bien. 4:29; 2 Tim. 1:7, 8) Ndisankapu kayi dia kumona muntu kampanda witaba bua umuyishe! Muntu eu udi mene mua kulua dimue dituku mutendeledi wa Yehowa!