Udiku ulonga bionso biudi mua kulongela kudi Yehowa anyi?

1. Yehowa utu umona dilongesha mushindu kayi?

¹ Yehowa udi “Muyishi” wetu Munene. Mmusue ne: tulonge. (Yesh. 30:20) Mmutuadije kulongesha panyima pa mumane kufuka Muanende wa kumpala. (Yone 8:28) Kakalekela kulongesha pakatomboka Adama to. Watungunuka ne kulongesha ne dinanga dionso bantu bena bilema.—Yesh. 48:17, 18; 2 Tim. 3:14, 15.

2. Mmudimu kayi wa kulongeshangana udi wenzeka lelu?

² Lelu eu Yehowa udi ulombola mudimu munene wa dilongesha utu kawuyi muanji kuenzeka to. Anu bu muvua muprofete Yeshaya muambe, bantu ba bungi badi babanda ku ‘mukuna wa nzubu wa Yehowa’; mbatue ku miliyo. (Yesh. 2:2) Bua tshinyi? Bua Yehowa abalongesha njila yende. (Yesh. 2:3) Mu tshidimu tshia mudimu tshia 2010, Bantemu ba Yehowa bavua bayishe ne balongeshe bantu Bible munkatshi mua mêba mapite pa muliyare 1 ne miliyo 6. Kadi lumingu luonso elu, batu balongesha bantu malu a Yehowa mu bisumbu bipite pa 105 000; batu kabidi bapatula mikanda mu miakulu mipite pa 500 kudi mupika wa lulamatu ne wa budimu bua kulongesha bantu.

3. Umvuija mudi dilongesha dia Nzambi dikuambuluishe.

³ Longa, longelamu: Dilongesha dia Nzambi ndituambuluishe bikole be! Tshilejilu, tudi balonge ne: Nzambi udi ne dîna, ne udi ututabalela. (Mus. 83:18; 1 Pet. 5:6, 7) Tudi bapete mandamuna a nkonko minene, bu mudi eyi: Tudi tukenga ne tufua bua tshinyi? Mmunyi mundi panyi mua kupeta disanka? Tudi ne muoyo bua tshinyi? Yehowa mmutupeshe kabidi mibelu bua kuikala ne bikadilu bilenga bua tuetu ‘kututa dikasa dimpe.’—Yosh. 1:8.

4. Ntumue tulasa kayi tudi batendeledi ba Nzambi mua kulonga? Tudi ne bua kulonga kulongelamu malu kudi Yehowa bua tshinyi?

⁴ Yehowa udi kabidi ne mishindu mikuabu idiye ulongesha bantu ba bungi mua kualabaja mudimu wabu. Mu dibeji 4-6, badi baleja tulasa tudi tuambuluisha bamue bua kualabaja mudimu wabu. Nansha mutudi katuyi mua kulonga tulasa tuonso etu, katuenaku mua kulonga ne muoyo umue tulasa tutudi mua kubuela anyi? Tutuku tukankamija bansonga bua kudifundila tshipatshila tshia kupeta dilongesha dia Nzambi pamutu pa kubalekela mu bianza bia balongeshi babu ne bantu bakuabu badi babakankamija bua kulonga tulasa tua bungi anyi? Kulonga kulongelamu malu kudi Yehowa Nzambi kudi mua kutuambuluisha bua kuikala ne nsombelu mulenga lelu ne kupeta muoyo wa tshiendelele mu matuku adi kumpala.—Mus. 119:105; Yone 17:3.

Tulasa tudi natu bulongolodi bua Yehowa

Tulasa tua Dibala ne Difunda

Kipatshila: Bua kulongesha bantu mua kubala ne kufunda bua kutuadijabu kudibadila ne kulonga Bible, ne kulongesha bakuabu bulelela.
Matuku: Bilondeshile dijinga didiku.
Muaba: Mu Nzubu wa Bukalenge.
Balongi: Bamanyishi bonso ne balunda ba bulelela.
Mua kudifundisha: Bakulu badi benzeja tulasa etu bilondeshile dijinga didiku; batu balomba bantu bonso badi basue bua badifundishemu.

Kalasa ka Mudimu wa Nzambi

Kipatshila: Bua kulongesha bamanyishi bua kuikala bayishi ne balongeshi bimpe ba lumu luimpe.
Matuku: Kakena ne ndekelu to.
Muaba: Mu Nzubu wa Bukalenge.
Badi mua kudifundisha: Bamanyishi bonso. Ne bakuabu batu babuela mu bisangilu bikole, badi bitaba malongesha a mu Bible ne badi ne nsombelu bu wa bena Kristo.
Mua kudifundisha: Uyikile ne mutangidi wa Kalasa ka Mudimu wa Nzambi.

Tulasa tua Miakulu mienyi

Kipatshila: Bua kulongesha bamanyishi mua kuyisha mu miakulu mikuabu.
Matuku: Ngondo 4 anyi 5. Batu batuenza nangananga mu Disambombo mu dinda, bua dîba 1 anyi 2.
Muaba: Misangu ya bungi mu Nzubu wa Bukalenge udi pabuipi.
Badi mua kudifundisha: Bamanyishi badi ne bikadilu bilenga badi basue kuyisha mu muakulu mukuabu.
Mua kudifundisha: Biro bia filiale ke bitu bilongolola tulasa etu bilondeshile dijinga didiku.

Dibaka dia Nzubu ya Bukalenge

Kipatshila: Bua kuibaka Nzubu ya Bukalenge ne kuyilongolola. Nki nkalasa to, kadi bena budisuile badi balonga malu a bungi a dibaka dia nzubu.
Matuku: Bilondeshile nsombelu wa muntu ne muntu.
Muaba: Tshitupa tshionso tshidi Komite wa Luibaku wa Rejon anyi Biro bia Dibaka dia Nzubu ya Bukalenge bitangila. Badi mua kulomba bamue bena budisuile bua kuya muaba udi bipupu binyangakaje nzubu ne bintu, nansha muikale wa kule.
Malu malomba: Bana betu ba bakaji ne ba balume badi batambule badi kasumbu ka bakulu kanyishila. Bamanye anyi kabayi bamanye imue midimu.
Mua kudifundisha: Udi uwuja formilere wa Construction des Salles du Royaume—Questionnaire pour les volontaires (S-82) utu bakulu bafila, anyi bua muetu mu Congo: Demande d’admission dans l’ordre international des serviteurs spéciaux à plein temps Témoins de Jéhovah en tant que serviteur à la construction de Salles du Royaume (A-12) utu biro bituma.

Kalasa ka Bampanda-njila

Kipatshila: Bua kuambuluisha bampanda-njila bua ‘kukumbaja mudimu wa Nzambi’ bimpe.—2 Tim. 4:5.
Matuku: Matuku dikumi.
Muaba: Biro bia filiale ke bidi bikenzeja; nangananga ku Nzubu wa Bukalenge udi pabuipi.
Malu malomba: Bonso bakaadi bampanda-njila kukadi tshidimu tshimue anyi kupita apu.
Mua kubuelamu: Badi babuejamu bampanda-njila badi bakumbaje malu malomba, pashishe mutangidi wa tshijengu udi ubambila.

Kalasa ka bantu bapiabapia ku Betele

Kipatshila: Bua kuambuluisha bantu bapiabapia bua kuenza mudimu bimpe ku Betele.
Matuku: Dîba 1 ku lumingu munkatshi mua mbingu 16.
Muaba: Ku Betele.
Malu malomba: Udi ne bua kuikala muena ku Betele bua kashidi anyi muena budisuile wa matuku a bungi (tshidimu tshimue anyi kupita apu).
Mua kubuelamu: Batu basungula bena mu dîku dia Betele badi bakumbane.

Kalasa ka Mudimu wa Bukalenge

Kipatshila: Bua kulongesha bakulu ne basadidi ba mudimu bua kuenza mudimu wa ditangila mikoko ne midimu idi itangila bulongolodi. (Bien. 20:28) Batu benza kalasa aka kunyima kua bidimu bikese bilondeshile tshidi Kasumbu Kaludiki kapangadija.
Matuku: Katshia mu bidimu bishale ebi, bakulu badi benza dituku dimue ne tshitupa, basadidi benza dituku dimue.
Muaba: Nangananga ku Nzubu wa Bukalenge anyi wa mpuilu udi pabuipi.
Malu malomba: Kuikala mukulu anyi musadidi wa mudimu.
Mua kubuelamu: Mutangidi wa tshijengu udi ubikila bakulu ne basadidi ba mudimu badi bakumbane.

Kalasa ka bakulu ba mu bisumbua

Kipatshila: Bua kuambuluisha bakulu bua kuambula majitu abu mu tshisumbu.
Matuku: Matuku atanu.
Muaba: Biro ke bidi ne dipangadika; nangananga ku Nzubu wa Bukalenge anyi wa mpuilu udi pabuipi.
Malu malomba: Kuikala mukulu.
Mua kubuelamu: Biro bia filiale bidi bisungula bakulu badi bakumbane.

Kalasa ka batangidi bena ngendu ne bakaji babub

Kipatshila: Bua kuambuluisha batangidi ba bijengu ne ba distrike bua kuambuluisha bisumbu mushindu muimpe ne ‘kuenza mudimu mukole wa kuamba ne wa kuyisha dîyi dia Nzambi’ ne kulama bantu badi ku bukokeshi buabu.—1 Tim. 5:17; 1 Pet. 5:2, 3.
Matuku: Ngondo ibidi.
Muaba: Biro bia filiale ke bidi bisungula muaba.
Malu malomba: Kuikala mutangidi wa tshijengu anyi wa distrike.
Mua kubuelamu: Biro bia filiale bidi bibikila batangidi bena ngendu badi bakumbane ne bakaji babu.

Kalasa ka malu a mu Bible bua bana betu ba balume bajikec

Kipatshila: Bua kulongolola bakulu ne basadidi ba mudimu badi kabayi banji kusela bua kuambula majitu makuabu. Batu batuma balongi ba bungi bua kuya kuambuluisha muaba udiku dijinga dinene mu ditunga diabu. Badi mua kutuma bakese mu matunga makuabu padibu bitaba bua kuyamu.
Matuku: Ngondo ibidi.
Muaba: Biro bia filiale ke bidi bisungula muaba; nangananga ku Nzubu wa mpuilu anyi wa Bukalenge.
Malu malomba: Bana betu ba balume ba bidimu kubangila ku 23 too ne ku 62, badi ne makanda a mubidi, badi basue kukuatshila bana babu mudimu ne kuyisha malu a Bukalenge kumpala muaba wonso udiku dijinga. (Mâko 10:29, 30) Badi ne bua kuikala babateke bakulu anyi basadidi kukadi bidimu bibidi anyi kupita apu.
Mua kudifundisha: Pikalabu benza kalasa aka mu teritware wa biro bia filiale wenu, nebenze tshisangilu bua badi basue kubuelamu mu mpuilu wa tshijengu. Badi baleja malu makuabu mu tshisangilu etshi.

Kalasa ka malu a mu Bible bua bena dibakad

Kipatshila: Bua kulongesha mulume ne mukajende malu kampanda bua Yehowa ne bulongolodi buende kukuata nabu mudimu bikole menemene. Batu batuma balongi ba bungi bua kuya kuambuluisha muaba udiku dijinga dinene mu ditunga diabu. Badi mua kutuma bakese mu matunga makuabu padibu bitaba bua kuyamu.
Matuku: Ngondo ibidi.
Muaba: Bavua benze tulasa tukese tua kumpala ku Patterson, mu New York, mu États-Unis (Mu Muaba wa dilongeshangana wa Watchtower). Mpindieu biro bia ma filiale ke bidi bisungula muaba, kadi nangananga mu Nzubu wa mpuilu anyi wa Bukalenge.
Malu malomba: Mulume ne mukajende badi ne bidimu kutuadijila ku 25 too ne ku 50, badi ne makanda a mubidi, badi mua kuitaba bua kuya muaba udi dijinga dinene ne badi ne muoyo wa kuamba ne: ‘Ke meme eu, untume meme!’ (Yesh. 6:8) Bikale baselangane bidimu kutuadijila ku bibidi ne bikale mu mudimu bu mudi wa bumpanda-njila bua pa tshibidilu bidimu kutuadijila ku bibidi kabayi bawukose to.
Mua kudifundisha: Pikalabu benza kalasa aka mu teritware wa biro bia filiale wenu, nebenze tshisangilu bua badi basue kubuelamu mu mpuilu wa pa buende. Badi baleja malu makuabu mu tshisangilu atshi.

Kalasa ka Watchtower ka malu a mu Bible ka Gilada

Kipatshila: Bua kulongesha bampanda-njila ne bakuabu badi mu midimu ya pa buayi bua kuenza mudimu wa bu misionere.
Matuku: Ngondo itanu.
Muaba: Ku Patterson, mu New York, mu États-Unis (Mu Muaba wa dilongeshangana wa Watchtower).
Malu malomba: Bena dibaka badi batambule kukadi bidimu bisatu ne badi ne bidimu pankatshi pa 21 ne 38 padibu buwuja formilere bua musangu wa kumpala. Badi ne bua kuikala bakula Anglais, baselangane kukadi bidimu biobi bikese bibidi, bikale mu mudimu bu mudi wa bumpanda-njila bua pa tshibidilu munkatshi mua bidimu biobi bikese bibidi kabayi bawukose to. Badi ne bua kuikala ne makanda a mubidi. Bampanda-njila badi mu matunga a bende (kusangisha ne aba badi bu bamisionere); batangidi ba bijengu ne ba distrike; bena mu dîku dia Betele; ne aba bavua babuele mu Kalasa ka Dilongesha Mudimu, Kalasa ka malu a mu Bible bua bana betu ba balume bajike ne Kalasa ka malu a mu Bible bua bena dibaka badi pabu mua kuuja formilere pikalabu bakumbaje malu malomba.
Mua kubuelamu: Mu filiale itubu banyishile, batu benza tshisangilu bua badi basue kuyamu mu mpungilu wa distrike. Badi baleja malu makuabu mu tshisangilu atshi. Pikalabu kabayi benza tshisangilu etshi mu ditunga dienu, udi mua kufundila biro bia filiale wenu bua kumanya malu makuabu.

Kalasa ka bena mu Komite ya filiale ne bakaji babu

Kipatshila: Bua kuambuluisha aba badi mu komite ya filiale bua kuenza mudimu wabu wa kutangila Betele bimpe, bua kutangila malu a mudimu adi atangila bisumbu, ne batangidi ba bijengu ne ba distrike mu teritware yabu, kutangila kabidi mudimu wa dikudimuna, wa dipatula mikanda ku biamu, wa diyituma ne kutangila mikuabu midimu ya ku Betele.—Luka 12:48b.
Matuku: Ngondo ibidi.
Muaba: Ku Patterson, mu New York, mu États-Unis (Mu Muaba wa dilongeshangana wa Watchtower).
Malu malomba: Bena mu komite ya matunga anyi ya filiale anyi bantu badibu mua kulua kupesha midimu eyi.
Mua kubuelamu: Kasumbu Kaludiki kadi kabikila bana betu ba balume badi bakumbane ne bakaji babu.

a Kalasa aka kakena kenzeka mu matunga onso to.

b Kalasa aka kakena kenzeka mu matunga onso to.

c Kalasa aka kakena kenzeka mu matunga onso to.

d Kalasa aka kakena kenzeka mu matunga onso to.