Ngikadilu mutambe bulenga wa mulongeshi muimpe
1. Ngikadilu mutambe bunene wa mulongeshi muimpe nngikadilu kayi?
1 Tshidi mua kuambuluisha muntu bua kuikalaye mulongeshi muimpe wa Bible ntshinyi? Ntulasa anyi? Mbidimu bidiye muenze mu bulongolodi bua Yehowa anyi? Ntshipedi kampanda tshidiye natshi anyi? Tòo, nngikadilu utu usangisha Mikenji ya Mose yonso, utu usunguluja bayidi ba Yezu, utu mutambe bunene ne mutambe bulenga ku ngikadilu minene yonso ya Yehowa. (Yone 13:35; Gal. 5:14; 1 Yone 4:8) Ngikadilu eu ke dinanga. Balongeshi bimpe batu nende.
2. Tudi ne bua kunanga bantu bua tshinyi?
2 Nanga bantu: Yezu uvua Mulongeshi Munene. Uvua munange bantu. Ke bualu kayi bantu bavua basue kumuteleja. (Luka 5:12, 13; Yone 13:1; 15:13) Tuetu banange bantu, netubayishe dîba dionso didi mpunga umueneka. Ntatu bu mudi ditukengesha ne dibenga kututeleja kabiakututekesha mu mikolo to. Netuditatshishe bikole bua bantu batudi tuyisha ne kubambila malu bilondeshile majinga abu. Netukebe dîba dia kudilongolola bua dilonga dionso ne dia kupitshisha ne mulongi wa Bible yonso.
3. Leja mudi dinanga dia malu a mu Bible dituambuluisha bua kuyisha.
3 Nanga malu adi mu Bible: Yezu uvua kabidi munange malongesha a mu Bible, uvua uamona bu bintu bia mushinga mukole. (Mat. 13:52) Tuetu banange malu a mu Bilbe, netuikale tuakula ne disanka, bateleji betu nebumvue pabu disanka adi. Nunku meji etu neikale mateka ku malu mimpe atudi tubambila aa pamutu pa malu atudi katuyi mua kukumbana mua kuenza; dîba adi katuakumvua buôwa patudi tuyisha to.
4. Tudi mua kuenza tshinyi bua kukolesha dinanga?
4 Kolesha dinanga: Udi mua kuenza tshinyi bua kukolesha dinanga diebe? Ela meji bua mudi Yehowa ne Yezu baleje bantu dinanga, wele kabidi meji bua mudi bantu ba mu teritware wenu kabayi bamanye Bible. (Mâko 6:34; 1 Yone 4:10, 11) Tuetu tulonga Bible ne tuelangana meji bikole bua malu atudi tulongamu, dinanga dietu dia malu adimu nedikole. Dinanga ngumue wa ku ngikadilu ya dimuma dia nyuma. (Gal. 5:22) Nunku tuikalayi tulomba Yehowa nyuma muimpe, tumulomba kabidi bua atuambuluishe tukoleshe dinanga dietu. (Luka 11:13; 1 Yone 5:14) Nansha tuetu balonge tulasa kayi, bikale ne bidimu bungi kayi mu bulelela anyi ne bipedi kayi, tudi mua kulua balongeshi bimpe ba Bible anu tuetu ne dinanga.