Mandamuna a nkonko yenu

▪ Tshidi mua kutusaka bua kushila muntu mikanda ntshinyi?

Tshia kumpala, ndijinga didi nadi muntu. Yeye muleje dijinga dilelela, tudi mua kumushila bibejibeji bibidi, broshire, mukanda anyi tshintu tshikuabu tshitudi tufila. Tudi mua kumupesha nansha yeye mufile makuta makese anyi kayi muafile. (Yobo 34:19; Buak. 22:17) Kadi ki mbimpe kupesha muntu udi kayi ne dianyisha mikanda yetu nansha.​—Mat. 7:6.

Tshidi mua kuleja ne: muntu udi ne dijinga dia kumanya ntshinyi? Padiye witaba bua kuyikila netu. Padiye ututeleja patudi tuakula, wandamuna nkonko, ne uleja wende mmuenenu. Padiye ulondesha mu Bible patudi tubala mvese. Kadi misangu ya bungi, mbimpe kumuebeja pikalaye mua kubala mukanda utudi basue kumushila. Tudi ne bua kuikala ne disunguluja dia malu bua kumanya bikala muntu ne dijinga dia kumanya. Tshilejilu, patudi tuyisha mu njila, ki mbimpe kupesha muntu yonso udi upita bibejibeji, broshire anyi mikanda nansha. Tuetu katuyi bajingulule pikala muntu ni udi ne dijinga, tudi mua kumupesha trakte anyi dibeji dikuabu.

Bia muomumue, bungi bua mikanda idi mumanyishi wangata kabuena bulondesha bungi bua makuta adiye ufila nansha, kadi mbungi bua mikanda budiye mua kufila mu buambi. Mapa kaatu bua mikanda to, kadi mbua malu onso adi mudimu wetu wa diyisha pa buloba bujima ulomba. Nansha tuetu ne makuta a bungi anyi makese, dianyisha ditudi nadi neditusake bua kufila bitudi nabi ne disanka dionso bua kutua mudimu wa Bukalenge mpanda, pamutu pa kufila anu bintu bia pa mutu bitudi katuyi nabi bualu anyi bishadila. (Mâko 12:41-44; 2 Kol. 9:7) Dianyisha edi didi kabidi ditusaka bua kuangata anu mikanda itudi nayi dijinga, bua kubenga kunyanga makuta a bulongolodi buetu.

[Lungenyi lunene lua mu dibeji 2]

Tudi ne bua kuikala ne disunguluja dia malu bua kumanya bikala muntu ne dijinga dia kumanya