Udilongolole ku mpindieu bua kuvudija mudimu webe
1. Mbualu kayi butu butusankisha mu ngondo 3, 4 ne 5? Tudi mua kudilongolola munyi?
1 Mu ngondo 3, 4 ne 5 wa tshidimu tshionso, tutu tupeta mushindu wa ‘kusakidila Yehowa bikole.’ (Mus. 109:30) Neuvudije mudimu webe mu ngondo muisatu bua kuleja dianyisha kudi Nzambi bua mudiye mufile mulambu wa kutupikula nawu anyi? Ke dîba dia wewe kudilongolola edi!—Nsu. 21:5.
2. Wewe ne bakuabu nuvua benze tshinyi pavuabu bateke mêba 30 bua bampanda-njila bambuluishi mu ngondo muinayi?
2 Kulua mpanda-njila muambuluishi: Pakumvua bantu tshidimu tshishale ne: bavua mua kulua bampanda-njila bambuluishi mu ngondo muinayi ne kuenza mêba 30 tshianana, bakasanka bikole be! Tshilejilu, muanetu wa balume mukuabu wakafunda ne: “Ndi mulongi wa mu tulasa tua bikadilu. Tshiena ne mushindu wa kulua mpanda-njila wa pa tshibidilu to. Nendombe bua kuenza mêba 30 mu ngondo muinayi, kadi nenditatshishe bua kuenza mêba 50.” Muanetu wa bakaji utu wenza mudimu utu umuangata dîba dia bungi wakafunda ne: “Mêba 30! si mbualu bukese!” Pakenzabu dimanyisha edi, muanetu wa bakaji uvua mpanda-njila kumpala, kadi udi mpindieu ne bidimu 80 ne pa mutu, wakamba ne: “Ke tshimvua muindile etshi! Yehowa uvua mumanye ne: pamvua mpanda-njila, ke pamvua ne disanka dia menemene.” Bantu bavua kabayi ne mushindu wa kulua bampanda-njila bambuluishi, bakadienzeja bua kuvudija mudimu wabu.
3. Tshidi mua kutusaka bua kulua bampanda-njila bambuluishi mu ngondo 3, 4 ne 5 ntshinyi?
3 Ngondo muisatu eu neikale ngondo mulenga bua kulua mpanda-njila muambuluishi bualu mbatuitabile kabidi bua kuenza mêba 30 anyi 50. Tumanye kabidi ne: kutuadijila mu Disambombo dia 17 ngondo 3, netutuadije kubikila bantu bua kulua mu Tshivulukilu, tshienzeka mu dia 5 ngondo 4. Disanka dia kuyisha bikole nedisake ba bungi bua kuenza mêba 50 mu ngondo 4 ne 5.
4. Udi mua kuenza tshinyi bua kuvudija mudimu webe? Neupete tshinyi?
4 Mu Ntendelelu wenu wa mu Dîku wa musangu udi ulonda, nuyikilaku bua kumona mudi yonso wa kunudi mua kuvudija mudimu mu ngondo 3, 4 ne 5. (Nsu. 15:22) Nulombe Yehowa bua anukuatshishe. (1 Yone 3:22) Paudi uvudija mudimu webe, neutumbishe Yehowa bikole, ne neuvudije disanka diebe.—2 Kol. 9:6.