Bufuki budi bumanyisha butumbi bua Nzambi

Bantu ba bungi batu basue kutangila bifukibua. Kadi anu bantu bakese ke batu bajingulula ne: bintu ebi bidi bileja meji a Mufuki wetu Munene ne mudiye udiumvua. (Lomo 1:20) Davidi wakalonga malu adi atangila Yehowa ku diambuluisha dia Dîyi diende kukadi bidimu bia bungi. Kadi ‘wakamona’ kabidi Yehowa ne kusemenaye pabuipi nende ku diambuluisha dia bifukibua. (Mus. 8:3, 4) Filme wa Les merveilles de la création révèlent la gloire de Dieu (Bufuki budi bumanyisha butumbi bua Nzambi) udi utuambuluisha tuetu, bana batudi nabu ne balongi betu ba Bible bua kumona bimue bifukibua bia Yehowa, ne kumanya ngikadilu ne bumuntu bua Mufuki wetu Munene. Bualu ebu nebutusemeje pabuipi nende. Paudi ujikija kutangila filme eu, utetaku kuandamuna nkonko idi ilonda eyi:

1) Mmushindu kayi udi bunene bua tshibuashibuashi ne mudi bintu bidimu bikale mu bulongame ukolesha dianyisha diebe kudi Yehowa? (Yesh. 40:26) 2) Patudi tutangila bimpe mâyi, tudi tupeta dilongesha kayi bua Muntu udi muafuke? (Buak. 14:7) 3) Bunene bua buloba ne ntanta udi pankatshi pabu ne dîba bidi bileja ne: Yehowa udi ne meji a mushindu kayi? 4) Ngondo udi ne mudimu kayi? (Mus. 89:37) 5) Tshidi tshileja ne: Yehowa uvua mufuke bantu bua bikale ne disanka ntshinyi? 6) ADN ntshinyi? (Mus. 139:16) 7) Bantu batu bashilangane ne bifukibua bikuabu bia pa buloba ku tshinyi? (Gen. 1:26) 8) Mmalu kayi audi mutekemene ne muoyo kulu kulu bua kumona mu bulongolodi bupiabupia?

Malu makuabu: 9) Mekala atu afumina kuepi? 10) Mâyi adi enda mu mutshi afika too ne mu katongobela mushindu kayi? 11) Mâyi atu ne mudimu kayi mu mubidi wa muntu? 12) Fila bilejilu bia mudi bintu bidi ne muoyo biumvuangana. 13) Bifukibua bitu biambuluishangana mushindu kayi? 14) “Angle d’or” ntshinyi? Udi umueneka mu bufuki munyi? (g-F 9/06 24-25)

‘Tangilayi bimpe’ bifukibua bia Yehowa: Yezu wakatuambila bua ‘kutangila nyunyi ya mu diulu bimpe’ ne bua kulongela ku ‘bilongo bia mu mpata.’ (Mat. 6:26, 28, NW) Kuenza nunku kudi kukolesha ditabuja dietu, kutusaka bua kueyemena Mufuki wetu ne kudi kutuambuluisha bua kuleja dianyisha bua meji, bua bukole bua kutupandisha nabu ne bua dinanga didi nabi Yehowa. Pamutu pa kulekela midimu ya mu bulongolodi ebu ikubueja mu ditanaji, udienzeje bua kupeta dîba dia kubandila bintu bia dikema bidi Yehowa mufuke ne kuela meji bua tshidibi bitulongesha bua Nzambi wetu Munene.​—Mus. 19:1.