Dîyi dia Nzambi didi Yelemiya utuambila
1. Mu mpungilu wa distrike wa 2010 muvua mupatuke mukanda kayi? Netuwulonge dîba kayi?
1 Ndisankapu kayi dituvua nadi patuvua bapete mukanda mupiamupia mu Mpungilu wa Distrike wa “Ushale pabuipi ne Yehowa,” uvua muenzeke mu 2010! Mukanda eu udi ne malongesha adi mua kutuambuluisha dituku dionso. Malongesha aa mmangatshila mu mukanda wa Yelemiya ne wa Muadi. (Lomo 15:4) Mbawenze bua kuwulonga mu Dilonga dia Bible dia Tshisumbu. Netubangishe kuwulonga mu lumingu lua dia 5 ngondo wa 11 wa 2012.
2. Kukonkonona malu adi mu mukanda wa Yelemiya ne wa Muadi kudi mua kutuambuluisha ku tshinyi?
2 Udi mua kutuambuluisha lelu: Muprofete Yelemiya wakenza mudimu wende mu tshikondo tshivua bimvundu bia bungi bienzeka mu Yuda. Kumpala, kavua udimona mukumbane bua kuenza mudimu wa buprofete to. (Yel. 1:6) Bavua bamukengeshe kudi bantu bavuaye mumanye, ne pamuapa kudi balela bende ba mu tshimenga tshiabu tshia Anatota. (Yel. 11:21, 22) Ke bualu kayi Yelemiya wakateketa mu maboko imue misangu. (Yel. 20:14) Bu mutudi tuenza mudimu wa ‘kuvuija bantu ba bisamba bionso bayidi,’ tutu tutuilangana ne ntatu ne tudiumvua anu muvua Yelemiya udiumvua. (Mat. 28:19) Kukonkonona malu avuaye mufunde kudi mua kutuambuluisha bua kuenza mudimu wetu ne dikima ne tshisumi.
3. Amue malu adi mu mukanda wa Yelemiya adi ne mudimu kayi?
3 Malu adimu: Mvese minene ya kubala mu dilonga mmifunda mu maleta maladika. Mbakosolole mukanda eu mu bitupa bia kulonga ku lumingu ne ku lumingu: ku ndekelu kua tshitupa tshionso mbele lukonko lumue anyi ibidi mifunda mu maleta mafikisha bikole bua kuleja malu manene a mu tshitupa atshi. Nkonko eyi nya nkuela bateleji mu diambulula. Mu mukanda eu mudi kabidi bimfuanyi bimpe bidi bateleji mua kumvuija.
4. Tudi ne bua kuenza tshinyi bua dilonga dia mukanda wa Yelemiya kutuambuluishadi?
4 Bua mukanda eu kukuambuluishawu bimpe, wikale udilongolola kumpala kua dîba. Wikale ukeba malu adi mua kukuambuluisha dituku dionso ne mu buambi kabidi. Wikale wandamuna bikole padibu bela nkonko. Yehowa wakambuluisha Yelemiya bua kuenza mudimu wende ne disanka. (Yel. 15:16) Nunku, dilonga dia mukanda mupiamupia eu nedituambuluishe bua kuenza mudimu wa buambi anu bu Yelemiya.