Malu 12 adi atusaka bua kuyisha

Tutu tuyisha ne tulongesha bantu Dîyi dia Nzambi bua tshinyi? Mbua kufikisha bantu badi basue kumanya Nzambi mu njila wa muoyo anyi? (Mat. 7:14) Ke bualu bua kumpala budibu batele kuinshi eku; kadi kudi makuabu. Buebe wewe, mu malu onso 12 aa, budi ne mushinga kupita makuabu, mbuepi?

1. Tudi tupandisha mioyo ya bantu.​—Yone 17:3.

2. Tudi tudimuija bantu babi.​—Yeh. 3:18, 19.

3. Tudi tukumbaja tshivuabu bambe mu Bible.​—Mat. 24:14.

4. Tudi tuleja ne: Nzambi udi muakane. Nunku muntu kakuamba ne: Yehowa ki mmudimuije bantu babi kumpala kua kubabutulaye to.​—Bien. 17:30, 31; 1 Tim. 2:3, 4.

5. Tudi tufuta dibanza dietu dia kuambuluisha bantu badibu basumbe ku mashi a Yezu.​—Lomo 1:14, 15.

6. Tudi tubenga kuambula mashi a bantu.​—Bien. 20:26, 27.

7. Tudi tudisungila nkayetu.​—Yeh. 3:19; Lomo 10:9, 10.

8. Tudi tuleja ne: tudi banange muntu netu.​—Mat. 22:39.

9. Tudi tuleja ne: tudi tutumikila Yehowa ne Muanende.​—Mat. 28:19, 20.

10. Ngumue wa ku mishindu itudi tutendelela Nzambi.​—Eb. 13:15.

11. Tudi tuleja ne: tudi banange Nzambi.​—1 Yone 5:3.

12. Tudi basue kuvuija dîna dia Yehowa, dîna dia tshijila.​—Yesh. 43:10-12; Mat. 6:9.

Kadi pa kumbusha malu aa, kudi makuabu kabidi. Tshilejilu, patudi tuyisha, tudi tukolesha ditabuja dietu, tulua kabidi benzejanganyi ba mudimu ne Nzambi. (1 Kol. 3:9) Kadi bualu budi butamba kutusaka bua kuyisha, mbualu bua 12. Nansha bantu batuteleja anyi babenga kututeleja, patudi tuyisha, tudi tuvuija dîna dia Yehowa dîna dinsantu, tuambuluisha kabidi Yehowa bua kuandamuna eu udi umupenda. (Nsu. 27:11) Nanku, tudi ne malu adi ne bua kutusaka bua kutungunuka ne ‘kuyisha bantu ne kubambila lumu luimpe katuyi tulekela.’​—Bien. 5:42.