Udiku mua kuyisha dilolo anyi?
1. Bilondeshile mukanda kampanda, Paulo uvua uyisha ku nzubu ne ku nzubu dîba kayi?
1 Mukanda mukuabu udi wamba ne: mupostolo Paulo uvua uyisha ku nzubu ne ku nzubu “kutuadijila mu dîba dia 16 too ne butuku.” (Daily Life in Bible Times) Katuena bamanye ni tshivua bushuwa programe wende, kadi tudi bajadike ne: Paulo uvua musue ‘kuenza malu onso bua lumu luimpe.’ (1 Kol. 9:19-23) Bualu ebu buvua mua kumulomba bua kulongolola malu ende bua kuyisha ku nzubu ne ku nzubu dîba divuaye umona ne: uvua mua kuyukila ne bantu ba bungi.
2. Dilolo ntshikondo tshimpe tshia kuyisha bua tshinyi?
2 Mu miaba ya bungi, bamanyishi batu ne tshibidilu tshia kuyisha ku nzubu ne ku nzubu mu dinda munkatshi mua lumingu. Muaba unudi, mu dinda ke tshikondo tshimpe tshia kuyisha anyi? Mpanda-njila mukuabu udi wamba bua teritware wende ne: “Mbikole bua kupeta muntu kumbelu mu munya. Kadi bantu ba bungi badiku anu ku dilolo.” Kuyisha dilolo kudi mua kukupesha mpunga muimpe wa kumanyisha nangananga bantu balume lumu luimpe. Dilolo ke dîba ditu bantu badilekelele ne basue kuyukila. Pikalabi bimpe bua kuenza nanku, bakulu badi ne bua kulongolola bisangilu bia mudimu wa buambi dilolo.
3. Patudi tuyisha dilolo, tudi mua kuleja busunguluji mushindu kayi?
3 Ikala ne busunguluji: Busunguluji budi ne mushinga patudi tuyisha dilolo. Tshilejilu, paudi uya kutangila muntu umusangana kayi ne dîba, bu mudi padiye udia, mbimpe kumulomba bua kumupinganyina pashishe. Bikala kuîsu kukadi kufike, wimane muaba udi muntu mua kukumona, udimanyishe ne lukasa pashishe umuambile kendela kebe. Mbimpe kabidi kuyisha babidi anyi mu kasumbu, kuyishila mu njila idi ne nzembu miaba idi bantu ba bungi. Kanuyi kutangila bantu dîba dimane kupita pakadibu badilongolola bua kulala bua kabibatondi. (2 Kol. 6:3) Bikala kuendakana mu teritware wenu butuku kuikale ne njiwu, nuyishe patshidi kuîsu kutoke.—Nsu. 22:3.
4. Kuyisha dilolo kudi kupetesha masanka kayi?
4 Masanka: Mudimu wa buambi utu utamba kusankisha bikole patutu tupeta muntu wa kuyukila nende. Tuetu tuyisha bikole, netupete mishindu ya bungi ya kuambuluisha bakuabu bua “basungidibue ne bafike ku dimanya dijalame dia bulelela.” (1 Tim. 2:3, 4) Kuenaku mua kuakajilula programe webe bua wikale uyisha dilolo anyi?