Kudieledi mikalu to! Nansha wewe ne midimu ya bungi
1. Bamue batu belakana bua kulomba bantu bua kulonga Bible bua tshinyi?
1 Bamue batu belakana bua kulomba bantu bua kulonga nabu Bible bualu badi ne midimu ya bungi. Kulongesha muntu Bible kudi kuangata dîba. Bidi bikengela kuikala ne dîba dia kudilongolola bua dilonga, dia kulombola dilonga ne dia kuambuluisha mulongi bua kupita ne ntatu idi imupangisha bua kuya kumpala. Mupostolo Paulo wakamba muvuaye mufile muoyo wende bua kuambuluisha bena mu Tesalonike bua kumanyabu Yehowa. (1 Tes. 2:7, 8) Nansha tuetu ne midimu ya bungi, tudi mua kuenza tshinyi bua kulombola dilonga dia Bible?
2. Mmunyi mudi kunanga Yehowa kutusaka bua kuenza mudimu ne dîba dietu?
2 Kudi kuangata dîba: Tumanye ne: kuenzela Yehowa mudimu kudi kulomba dîba. Tshilejilu, misangu yonso tutu tuangata dîba bua kuya mu bisangilu, kuyisha, kubala Bible ne kusambila. Muanetu ukadi mu dibaka udi ne bia bungi bia kuenza, kadi utu ukeba anu dîba dia kusomba ne muena dibaka nende. Nanku bu mutudi banange Yehowa, tudi ne bua kuikala ne disanka dia bungi dia ‘kukuata mudimu’ bimpe ne dîba ditudi nadi bua kumutendelela. (Ef. 5:15-17; 1 Yone 5:3) Bilondeshile Yezu, kuvuija bantu bayidi mmushindu munene wa kutendelela Yehowa. (Mat. 28:19, 20) Tuetu tuvuluka bualu ebu, katuakudikanda bua kulombola malonga a Bible to.
3. Nansha tuetu bajingila kudi amue malu, leja mutudi mua kutabalela mulongi wa Bible.
3 Kadi netuambe tshinyi bikala midimu yetu, masama a munanunanu anyi midimu ya mu tshisumbu kabiyi bitupetesha dîba? Bamue bamanyishi batu benza ngendu misangu mikese batu balombola malonga abu a Bible ku telefone anyi ku Enternete. Aba batu ne masama a munanunanu batu babikila balongi babu ba Bible kumbelu bua kulongabu nabu. Bamue mbenze bua mumanyishi muimpe ikale ubambuluisha bua kulombola malonga abu a Bible padibu kabayiku.
4. Kulombola malonga a Bible kudi kutupetesha masanka kayi?
4 Paulo wakapeta disanka dia bungi pavuaye ufila dîba ne bukole buende bua kuambuluisha bakuabu bua kulongabu bulelela. (Bien. 20:35) Pakavulukaye bantu bavuaye muambuluishe mu Tesalonike, wakela Yehowa tuasakidila. (1 Tes. 1:2) Mudimu wa buambi neuvudije disanka dietu tuetu katuyi balekele midimu itudi nayi itupangisha bua kulombola malonga a Bible.