Newikale mpanda-njila muambuluishi anyi?
1. Bua tshinyi tshikondo tshia Tshivulukilu ntshikondo tshimpe tshia kuvudija mudimu wa buambi?
1 Tshikondo tshia tshivulukilu ntshikondo tshimpe tshia kuyisha bikole. Ntshikondo tshia tuetu kuleja mudi Yehowa mutunange bikole bua muvuaye mufile muanende bu mulambu bua kutupikula nawu. (Yone 3:16) Ntshikondo tshidi dianyisha divula mu mioyo yetu, bitusaka bua kulongesha bantu malu ende ne tshidiye ubenzela. (Yesh. 12:4, 5; Luka 6:45) Ntshikondo tshimpe kabidi tshitutu tubikila bantu batudi bamanyangane nabu ne bantu ba mu teritware wetu bua kuluabu mu Tshivulukilu. Panyima pa Tshivulukilu, netudienzeje bua kukolesha dijinga dia aba bavua babuelamu. Kuenaku mua kuangata bumpanda-njila mu ngondo 3, 4 ne 5 bua kuvudija mudimu webe anyi?
2. Bua tshinyi ngondo 3 mmuimpe menemene bua mudimu wa bumpanda-njila buambuluishi?
2 Enza bua ngondo 3 ikale ngondo wa pa buende: Ngondo 3 neikale ngondo muimpe menemene bua kulua mpanda-njila muambuluishi. Aba bikala mua kuangata bumpanda-njila, mbabalombe bua kusungula bua kuenza mêba 30 anyi 50. Nuenu bikale ne lumingu lua pa bualu mu ngondo eu, bampanda-njila bambuluishi bonso (bena mêba 30 ne 50) nebabuele mu tshisangilu tshidi mutangidi wa tshijengu wenza ne bampanda-njila ba pa tshibidilu ne ba pa buabu too ne ku ndekelu kuatshi. Mudimu wa diabanya mabeji a dibikila nawu bantu mu tshivulukilu neutuadije mu dia 1 ngondo 3, too ne mu Dibidi dia 26/3/2013; mbavudije matuku aa, bishilangane ne mutuvua benze tshidimu tshishale. Bualu bukuabu kabidi, ngondo 3 neikale ne mbingu 5. Nanku, kuenaku mua kuditatshisha bikole bua kuvuija ngondo eu, ngondo wa pa buende menemene anyi?
3. Leja tshitudi mua kuenza bua kuvudija mudimu wetu wa kuyisha.
3 Udilongole ku mpindieu: Mpindieu ke tshikondo tshimpe tshia kutangilula programe webe ne kumona malu audi mua kuakaja bua kuangata bumpanda-njila. Mu Ntendelelu wenu wa mu Dîku, nukebe mua kuyukidilangana bua bipatshila bienu, nuenze programe. (Nsu. 15:22) Wewe kuyi ne mushindu wa kulua mpanda-njila, kuteketshi mu mikolo to. Kuenaku mua kuakaja programe bua kunenga mu buambi matuku autu uyisha anyi? Kuenaku mua kuyisha dituku dikuabu munkatshi mua lumingu anyi?
4. Patudi tuvudija mudimu wetu mu ngondo 3, 4, ne 5, netupete masanka kayi?
4 Patudi tuvudija mudimu wetu mu ngondo 3, 4 ne 5, netuikale ne disanka dia bungi bua mutudi tuenzela Yehowa mudimu ne mutudi tuambuluisha bantu bakuabu. (Yone 4:34; Bien. 20:35) Bualu bua mushinga budi ne: Yehowa udi usanka bikole patudi tudifila ne muetu muonso.—Nsu. 27:11.