Dîyi dia Nzambi didi ne bukole

1. Mpuilu wa pa buende wa tshidimu tshia mudimu tshia 2014 udi ne tshiena-bualu kayi?

¹ Bible mmushilangane ne tshintu kayi tshionso tshienza kudi bantu bena mibi; bualu udi yeye ne bukole bua kutushintulula, kuenza bua meji etu ne bienzedi bietu biumvuangane ne disua dia Yehowa. Kadi Dîyi dia Nzambi didi ne bukole bua mushindu kayi menemene? Tudi mua kuenza mudimu bikole menemene ne bukole bua Dîyi edi mu nsombelu wetu mushindu kayi? Mmushindu kayi utudi mua kuenza nadi mudimu bimpe menemene bua kuambuluisha bantu bakuabu? Tudi bajadike ne: mandamuna a nkonko eyi ikalabu mua kufila mu mpuilu wa pa buende udibu balongolole bua tshidimu tshia mudimu tshia 2014 neakoleshe malanda etu ne Nzambi. Tshiena-bualu tshiende tshidi ne: “Dîyi dia Nzambi didi ne bukole,” ntshiangatshila mu Ebelu 4:12.

2. Netuteleje mandamuna a nkonko kayi?

² Ukebe mandamuna a nkonko eyi: Paudi ulonda mpuilu eu, wikale ufunda mandamuna a nkonko idi ilonda eyi.

• Tudi ne bua kueyemena Dîyi dia Yehowa bua tshinyi? (Mus. 29:4)

• Mmunyi mutudi mua kudimuenena bukole bua Dîyi dia Nzambi mu nsombelu wetu? (Mus. 34:8)

• Mmunyi muudi mua kuleja bukole budi nabu Dîyi dia Nzambi paudi uyisha? (2 Tim. 3:16, 17)

• Mmunyi mutudi mua kubenga kukuluka mu buteyi bua bukole bua dishima budi nabu bulongolodi bua Satana? (1 Yone 5:19)

• Wewe nsonga, udi mua kuenza tshinyi bua kukolesha malanda ebe ne Nzambi? (Yel. 17:7)

• Nansha patudi ne butekete, mmunyi mutudi mua kupeta bukole? (2 Kol. 12:10)

• Nansha bikalabi ne: tuvua ne bikadilu bibi ne meji mabi kukadi matuku a bungi, tshitudi mua kuenza bua kutungunuka ne kushintuluka ntshinyi? (Ef. 4:23)

3. Pa kumbusha dikala ne ntema, mmushindu kayi mukuabu udi mpuilu wa pa buende eu mua kutuambuluisha?

³ Malu a mushinga aa neatuambuluishe bikole be! Bualu bukuabu: anu bu mpuilu wa tshijengu ne mpungilu wa distrike, mpuilu wa pa buende eu neatupeshe mpunga wa kukangula mioyo yetu ne kudia bulunda ne bana betu ba mu bisumbu bikuabu. (Mus. 133:1-3; 2 Kol. 6:11-13) Nanku ukebe dîba dia kusomba ne balunda bebe ba kale, kadi ukebe kabidi balunda bapiabapia. Bikala ngamba-malu mukumbudi bu mudi mutangidi wa distrike anyi muanetu wa ku Betele muikale mu mpuilu wenu wa pa buende, kuenaku mua kumuakidila yeye ne mukajende anyi? Bushuwa, tudi ne malu a bungi adi atusaka bua kuindila mpuilu wa pa buende eu ne muoyo kuulu kuulu.