Badi benza disua dia Yehowa lelu mbanganyi?

1. Ndîba kayi dituatuadija kulonga broshire wa Badi benza disua dia Yehowa lelu mbanganyi? Nebituambuluishe mushindu kayi?

¹ Kutuadijila mu lumingu lua dia 28 ngondo wa 10, netutuadije kulonga broshire wa Badi benza disua dia Yehowa lelu mbanganyi? mu Dilonga dia Bible dia Tshisumbu. Bavua bapatule broshire mupiamupia eu mu Mpungilu wa Distrike wa “Ulame mutshima webe” bua kufikisha balongi ba Bible mu bulongolodi bua Yehowa. Dilonga broshire eu nedivudije dianyisha dietu bua mutudi mu bulongolodi bua Yehowa ne nedituambuluishe kabidi bua kuibidilangana ne tshiamu tshia mudimu tshia mushinga etshi bua mudimu wetu wa buambi.​—Mus. 48:13.

2. Leja mushindu utualonga broshire eu mu tshisumbu.

² Mua kumulonga: Mulombodi neabanye minite bua bantu kumvua dilongesha dionso bimpe. Bua kutuadija dilongesha dionso dia ku malongesha 28, neanji kubala lukonko lua tshiena-bualu. Pashishe, neambile mubadi bua kubala tshikoso tshia ntuadijilu. Padi dibala dijika, mulombodi neele bateleji lukonko luvuaye mulongolole bua tshikoso tshia ntuadijilu atshi. Tshitupa tshionso tshidi tshituadija ne miaku mifiikisha, nutshibale pa nkayatshi, nuyukidilangane bua malu adimu. Padi dibala dia tshitupa tshionso dijika, mulombodi nealombe bateleji bua kuamba mudi tshitupa atshi tshiandamuna lukonko lua tshiena-bualu. Mu broshire eu mudi kabidi foto ya bungi idibu mua kumvuija. Pikalaku dîba, nubale mvese minene yonso. Kumpala kua kuya mu dilongesha didi dilonda, mulongeshi neele nkonko idi kuinshi kua dibeji bua kuenza diambulula. Pikalamu kazubu ka “Malu makuabu,” neakabadishe; pashishe nealombe bateleji bua kulejabu mudi malu adimu mua kuambuluisha mulongi wa Bible yeye muatumikile. Koku dîba ku ndekelu kua dilonga, mulombodi udi mua kuenza mudimu ne mitu ya biena-bualu bia malongesha bu nkonko ya kuenza nayi diambulula. Numanye ne: eu ki mmushindu utuikala nangananga tulombola malonga a Bible ne broshire eu to.

3. Tshitudi mua kuenza bua dilonga dia broshire eu kutuambuluishadi bikole ntshinyi?

³ Bua dilonga edi kukuambuluishadi bikole, wikale udilongolola bimpe kumpala kua kulua mu bisangilu. Udienzeje bua kuandamuna. Panudi mu dilonga, wele meji bua mudi malu anudi nulonga mua kuambuluisha balongi ba Bible. Dilonga dia broshire eu ditupeteshaku malu atuikala mua kuambuluisha nawu bantu bakuabu bua kudisangishabu netu bua kuenza disua dia Nzambi bua bapete ditekemena dia kushala ne muoyo kashidi.​—1 Yone 2:17.