Ulongeshe bana bebe ne site wetu wa Enternete
1. Tshitupa tshia mu site wetu tshia ne: “Enfants” tshidi ne tshipatshila kayi?
1 Mbenze site wetu wa jw.org bua ikale usankisha bantu ba bidimu bishilangane. Tshitupa tshia ne: “Enfants” (Tuaku pa La Bible et vous > Enfants) tshidi tshiambuluisha baledi ne bana babu bua kusemenabu pabuipi ne Yehowa ne kudiabu bulunda munkatshi muabu. (Dut. 6:6, 7) Mmunyi muudi mua kuenza mudimu ne tshitupa etshi bua kulongesha bana bebe?
2. Leja muudi mua kusungula malu a kulongesha bana bebe bilondeshile bidimu biabu.
2 Ubalongeshe bilondeshile bidimu biabu: Muana yonso utu ne ende majinga. (1 Kol. 13:11) Mpindieu mmunyi muudi mua kusungula malu a kulongesha bana bebe bilondeshile bidimu biabu? Udiebeje ne: ‘Ntshinyi tshiabasankisha? Badi mua kukuata malu bungi kayi? Badi mua kushala ne ntema mutantshi bule kayi?’ Bua bana badi ne bidimu bisatu anyi muinshi, udi mua kuyukila nabu miyuki idi mu tshitupa tshia ne: “Comptines bibliques.” Mêku makuabu atu manange miyuki ya mu Bible idi mu tshitupa tshia ne: “Enseignez vos enfants.” Udi kabidi mua kutangila malu makuabu adi alonda aa.
3. Leja mudi baledi mua kuenza mudimu bimpe ne miyuki ne malu adi mu tshitupa tshia ne: “Pour le culte familial.”
3 Pour le culte familial: Malu aa adi mua kuambuluisha bamfumu ba mêku bua kulongeshabu bana babu. Bua kumanya mushindu wa kuenza mudimu ne miyuki ne malu makuabu, utute muaba wa kuambuila bintu wa dikala dikunzubile, pashishe ubale “Guide des parents” bilondeshile bualu ne bualu budimu. Wenze mudimu ne foto, bu mudi idi mu mabeji adi ne mekala bua kulongesha bana bebe batshidi bapuekele. Wambuluishe bana bebe bakadi babandile bua kuujabu malu adibu balonga. Malu onso adi mu tshitupa tshionso adi akula bua bualu bumue bumue anyi dilongesha dia mu Bible, nanku bana ba bidimu bishilangane badi mua kulonga bualu bua muomumue mu ntendelelu wa mu dîku.
4. Mmalu kayi adi mu tshitupa tshia “Deviens l’ami de Jéhovah”?
4 Deviens l’ami de Jéhovah: Filme, misambu ne malu makuabu adi mu tshitupa etshi adi ambuluisha baledi bua kulongesha bana babu batshidi bapuekele Dîyi dia Nzambi. (Dut. 31:12) Filme yonso wa bimfuanyi bizola udi ulongesha bana bualu kampanda bua mushinga. Malu bu mudi manaya a kukeba ne kupeta adi atamba kuleja mushinga udi nawu malongesha au. Bu mutu bana banange kuimba misambu ne misambu ibambuluisha bua kuvuluka bivuabu balonge, batu bela misambu ya Bukalenge ne misambu mimba, mu site wetu nangananga bua bana ku musangu ne ku mukuabu.
5. Baledi badi ne bua kulomba Yehowa diambuluisha bua kulongesha bana babu bulelela bua tshinyi?
5 Baledi wetu, Yehowa mmusue bua nukumbaje mudimu wenu wa buledi bimpe. Nanku numulombe diambuluisha bua nuenu kulongesha bana benu bulelela. (Bal. 13:8) Ku diambuluisha dia Yehowa nudi mua kulongesha bana benu bua kubavuija ‘bena meji bua kupeta lupandu ku ditabuja mu diumvuangana ne Kristo Yezu.”—2 Tim. 3:15; Nsu. 4:1-4.