Londayi tshilejilu tshia baprofete: Hoshea
1. Ukadiku pamuapa mudiele lukonko kayi?
1 ‘Ndi musue panyi kupesha Yehowa tshinyi?’ Pamuapa ukadi mudiele lukonko elu pauvua wela meji bua malu mimpe a bungi ne luse ludi Yehowa mutuleje. (Mus. 103:2-4; 116:12) Hoshea wakenza ne muoyo mujima bionso bivua Yehowa umulomba, nansha muvuabi bimulomba bua kudipangisha amue malu. Mmunyi mutudi mua kuidikija Hoshea?
2. Mmunyi mutudi mua kuidikija tshilejilu tshimpe tshia Hoshea patudi tutungunuka ne kuyisha?
2 Uyishe mu bikondo bikole: Mukenji wa Hoshea uvua utangila nangananga bisa dikumi bia bukalenge bua Isalele, mukavua ntendelelu mulelela wamba kujimina. Mukalenge Yalobama muibidi uvua muenze malu mabi ku mêsu kua Yehowa ne mutungunuje ntendelelu wa kana ka ngombe uvua Yalobama wa kumpala muenze. (2 Bak. 14:23, 24) Bakalenge bakalonda bakatungunuka ne kunyanga ntendelelu mulelela wa bisa dikumi bia bukalenge too ne muakaluabu kubibutula mu 740 kumpala kua Yezu. Kadi nansha muvua ntendelelu wa dishima mutangalake bikole, Hoshea wakenza mudimu wende wa buprofete ne lulamatu munkatshi mua bidimu biobi bikese 59. Tudiku petu badisuike anu bu Hoshea bua kuyisha tshidimu tshionso nansha bantu bobu kabayi batuteleja peshi padibu batuluisha anyi?—2 Tim. 4:2.
3. Mmushindu kayi udi nsombelu wa Hoshea uleja luse lua Yehowa?
3 Wimanyine pa luse lua Yehowa: Yehowa wakambila Hoshea bua kusela ‘mukaji wa masandi.’ (Hosh. 1:2) Nansha muvua mukajende Gomê mumulelele muana wa balume, bidi bimueneka ne: wakalela bana bakuabu babidi ba mu masandi. Mushindu uvua Hoshea muitabe bua kufuila mukajende luse udi uleja luse lua bungi luvua Yehowa muleje bena Isalele babi pavuabu banyingalale. (Hosh. 3:1; Lomo 9:22-26) Tudiku tuitaba bua kulekela malu atutu basue bua kumanyisha bantu ba mishindu yonso luse lua Yehowa anyi?—1 Kol. 9:19-23.
4. Ngamue malu kayi atudi mua kudipangisha bua kuenzela Yehowa mudimu?
4 Bamue batendeledi ba Yehowa mbalekele midimu yabu ya mfranga bua kupetabu dîba dia bungi dia kuyisha. Bakuabu mbashale bajike anyi mbabenge kulela anu bua kutua malu a Bukalenge mpanda. Patudi tuela meji bua nsombelu wa Hoshea, tudi mua kudiambila ne: ‘Tshivua mua kuenza bivuaye muenze abi to.’ Kadi padi dianyisha dietu bua ngasa wa Yehowa dienda dikola ne tueyemena nyuma muimpe bua kupeta bukole, Yehowa udi mua kuenza netu mudimu mu mushindu utuvua katuyi belele meji anu bu Hoshea.—Mat. 19:26; Filip. 2:13.