Malu mamona
▪ Australie: Muntu kampanda diende John, uvua mulonge bikole, uvua uya mu tshitendelelu patshivuaye muana, kadi kuluaye muntu uvua wamba ne: Nzambi katuku. Mpanda-njila kansanga wakamushila broshire wa La vie a-t-elle été créée? Pashishe pakamupinganyinaye dituku dikuabu kumushilaye mukuabu wa L’origine de la vie. Mpanda-njila au wakatungunuka ne kukolesha dijinga diende pavuaye umutuadila bibejibeji bipiabipia bivua ne biena-bualu bikuabu bidi biakula bua bufuki anyi bua milayi ya mu Bible. Pakamonaye ne: John wakapeta dijinga, wakamupesha mukanda wa La Bible: Parole de Dieu ou des hommes? Pakabala John mukanda au, wakatuadija kudimona anu bu muntu uvua kayi mumanye malu a Nzambi. Mpanda-njila au wakalua kumupesha mukanda wa Bible ulongesha, kumulejaye tshikoso tshia 8 tshidi mu dibeji dia 20 pashishe kukonkononabu nende tshikoso tshia 13-16 mu dibeji dia 23-24. Mvese ivuabu batele mu bikoso bivuabu babala, yakakemesha John bikole, kumusakabi bua kuamba ne: “Bidi bikengela ndonge Bible eu tshiakabidi.”
▪ Mexique: Muntu kampanda wakambila mumanyishi kansanga ne: tshitu ngitaba ne: Bible mmufundisha ku nyuma wa Nzambi to. Mumanyishi wakamulomba bua amulejaku bualu budi bujadika ne: Bible mmufundisha ku nyuma wa Nzambi. Bobu bamane kuyukila amue malu, muoyo wa muntu wakalengibua bikole bua malu avuaye ulonga mu Bible. Pakalongaye bua mikenji ya Nzambi, biakamusankisha bikole menemene. Wakambila mumanyishi ne: “Musangu wa kumpala utuvua babale nebe Bible bivua bimueneke bu ne: mibelu ivuamu ivua anu bu ya mu mukanda kayi wonso eu, ne kayivua mindenge to. Kadi bua mpindieu, patudi tumubala nangananga mibelu yende idi yakula bua bikadilu bilenga, muoyo wanyi udi usama.”
▪ États-Unis: Pavua bena dibaka babidi baditue mu diyisha dia pa buadi mu bimenga binene, bakapeta muntu mukaji kampanda wa mu ditunga dia Taiwan uvua witabuja Nzambi kadi eku wamba ne: Bible muenza bua bena ku Mputu. Wakalua muaba uvuabu batekela mikanda yabu bualu uvua mudimone mujimine nansha muvuaye ne nsombelu muimpe. Uvua utekemene ne: Bible uvua mua kumuambuluisha bua kumanya bua tshinyi udi ne muoyo. Bena dibaka babidi aba bakatuadija kulonga nende kudiambuluisha dia mukanda wa Bible ulongesha ne broshire wa La paix et le bonheur durables: comment les trouver Pamutu pa kulonga nende nshapita 2, bakakonkonona tshitupa tshia mu broshire tshidi tshiamba ne: “Un guide bénéfique pour tous les humains.” Bobu bamane kukonkonona bikoso bisambombo bia ntuadijilu bia mu tshitupa atshi, muntu mukaji au wakakema bikole uleja ne: kakuena mikanda mikuabu ya bitendelelu idi bu Bible to. Bobu bamane kabidi kukonkonona milayi ya mu Bible ivua mikumbane, wakamba ne: “kakuena mukanda mukuabu undi mua kuamba ne: udi ne bujalame bu Bible to!”
▪ Japon: Nansha muvua muntu kampanda muambile mumanyishi ne: tshiena ngitabuja Nzambi, mumanyishi wakatungunuka ne kumupinganyina nansha bua minite mikese umutuadila biena-bualu bia mu Réveillez-vous! bia ne: “Hasard ou conception?” Kakese ku kakese, muntu eu wakashintulula mmuenenu wende, kutuadijaye kuitaba ne: Mufuki wa bintu udi mua kuikalaku. Patudi tuakula apa, ukadi witaba ne: Nzambi udiku, mumanyishi udi wende ulonga nende broshire wa Lumu luimpe lua kudi Nzambi!
▪ Canada: Muanetu kampanda wa bakaji wakapesha mamu mukuabu uvua umbuka kuende uya mutangile mu mashinyi ende bibejibeji bipiabipia. Pavua muanetu wa bakaji mualukile panyima pa matuku, mamu au wakamuandamuna wosha ne munu muiku ne: kabivua bimusankisha ne kavua witabuja Nzambi to. Muanetu wa bakaji kakalekela to, kadi wakamutuadila kabidi broshire wa Une vie pleinement satisfaisante: comment? Pavua muanetu wabakaji musangane mamu au kumbelu, wakamuambila ne: nansha muvuaye mumanye ne: kavua witabuja Nzambi, uvua nende mu meji bualu muanetu wa bakaji au uvua mumanye ne: mamu au uvua udikoleshela bana nkeyende. Wakamuleja tshikoso 6 mu dibeji 4 dia broshire, mudibu bakula bua muaba utudi mua kupetela mibelu mimpe. Pashishe wakamulomba bua kubala malu adi mu dilongesha 2 didi diakula bua dikolesha dia bana. Mamu eu wakasanka bikole bua kuangata broshire eu.