Londayi tshilejilu tshia baprofete: Mika
1. Muprofete Mika uvua mua kuikala mudiele pende lukonko kayi? Bua tshinyi mudimu wende wa kuyisha kauvua muye mu mâyi?
1 ‘Ndekelu wa bionso, nshikidilu wa bulongolodi bubi nealue dîba kayi?’ Muprofete Mika uvua mua kuikala mudiele pende lukonko elu pavuaye umanyisha bukalenge bua bena Isalele ne bua bena Yuda mukenji wa dilumbuluisha wa kudi Yehowa. Bushuwa mudimu wende wa diyisha kauvua muye mu mâyi to. Bualu mu tshidimu tshia 740 kumpala kua Yezu, patshivua Mika ne muoyo, mêyi a Yehowa avua atangila Samaleya akakumbana. (Mika 1:6, 7) Pashishe, bakabutula Yelushalema mu tshidimu tshia 607 kumpala kua Yezu. (Mika 3:12) Mmushindu kayi utudi mua kuidikija Mika patudi bindile dikumbana dia dilumbuluisha dia Yehowa dia matuku etu aa?
2. Mmushindu kayi utudi mua kuleja lutulu patudi tuindila dituku dia Yehowa? Bua tshinyi kuenza nanku?
2 Ikala ne lutulu: Mika wakafunda ne: ‘Meme panyi nentangije mêsu anyi kudi Yehowa; nengindile Nzambi wa lupandu luanyi.’ (Mika 7:7) Nunku Mika kavua muvunge maboko windila bua nshikidilu alue to. Bu muvuaye muprofete wa Yehowa uvua anu ne bia bungi bia kuenza. Bu mutudi petu bindile dituku dia Yehowa tudi ne bua kudifila mu “bikadilu bia tshijila ne mu bienzedi bia dilamata Nzambi.” (2 Pet. 3:11, 12) Lutulu lua Yehowa ludi lupesha bantu mpunga wa bobu kunyingalala. (2 Pet. 3:9) Nunku, tulondayi mubelu wa mu Bible wa kuidikija lutulu lua baprofete.—Yak. 5:10.
3. Bua tshinyi tudi ne bua kulomba Yehowa nyuma wende?
3 Eyemena bukole bua Yehowa: Bu muvua Mika ne mudimu mukole, wakalomba Yehowa bukole buende bua bumuambuluishe. (Mika 3:8) Yehowa mmumanye ne: tudi dijinga ne bukole buende, ke bualu kayi ku diambuluisha dia Bible udi utukankamija bua kumulombabu. Udi upesha bantu bonso badi batshioke bukole buende bua bakumbaje midimu yabu ya bena Kristo. (Mus. 84:5, 7; Yesh. 40:28-31) Ukadiku mutuilangane ne bualu ebu mu nsombelu webe bua midimu yebe ya mu tshisumbu anyi? Utuku misangu yonso ulomba Yehowa nyuma wende bua akuambuluishe anyi?—Luka 11:13.
4. Mika mmutushile tshilejilu kayi tshimpe tshia kulonda?
4 Kuenza disua dia Yehowa kuvua bualu bua mushinga mukole kudi Mika. Uvua mudisuike bua kushala ne lulamatu nansha muvuaye munkatshi mua bantu babi. Bia muomumue, malu adi atukuata dituku dionso adi ateka lulamatu luetu mu diteta. Tukoleshayi dijinga dietu dia ‘kuenda mu dîna dia Yehowa Nzambi wetu tshiendelele.’—Mika 4:5.