Kushila bantu bibejibeji: mushindu muimpe wa kutuadija kulonga nabu Bible
1. Bua tshinyi kukadi matuku a bungi adi bulongolodi bua Yehowa bulomba bamanyishi bua kuikala ne bantu ba kushila bibejibeji?
1 Bantu ba bungi kabatu basue kulonga netu Bible to, kadi batu basue kubala bibejibeji bietu. Ke bualu kayi kukadi matuku a bungi adi bulongolodi bua Yehowa bulomba bamanyishi bua kuikalabu ne bantu batubu bashila bibejibeji. Padi bantu batamba kubala bibejibeji bietu, misangu ya bungi batu bapeta dijinga dikole dia Dîyi dia Nzambi. (1 Pet. 2:2) Ndekelu wa bionso, bualu kampanda budibu babale budi mua kubasankisha bikole, bubasaka bua kuitaba dilonga dia Bible.
2. Leja tshitudi mua kuenza bua kujula bantu batutu tushila bibejibeji dijinga dia kulonga.
2 Miamina ntete ya bulelela mâyi: Pamutu pa kushila muntu bibejibeji patupu ne kuya lukasa, uyukile nende, ukebe bua kudia nende bulunda. Kuenza nunku nekukuambuluishe bua kumanya nsombelu wende, malu atuye munange ne malu atuye witabuja, biakuambuluisha bua kuyukila nende ne lungenyi lutue. (Nsu. 16:23) Udilongolole paudi uya kutangila bantu bautu ushila bibejibeji. Koku mushindu, wakule mu tshikoso bua bualu kampanda ne ubale mvese udi upetangana ne bualu abu udi mu tshibejibeji, bua kumiamina ntete ya bulelela idi mu muoyo wa muntu mâyi. (1 Kol. 3:6) Ufunde dituku dionso dia ngondo diudi uya kutangila muntu, bibejibeji biuvua mumushile, biena-bualu ne mvese inuvua bakonkonone nende.
3. Tudi mua kupinganyina bantu batutu tushila bibejibeji misangu bungi kayi?
3 Tudi mua kubapinganyina misangu bungi kayi? Udi mua kupinganyina bantu bautu ushila bibejibeji musangu umue ku ngondo bua kubapesha bibejibeji bipiabipia. Kadi bilondeshile nsombelu webe ne dijinga didi nadi muntu, udi mua kumupinganyina misangu ya bungi. Tshilejilu, lumingu lumue anyi ibidi wewe mumane kushila muntu bibejibeji, udi mua kumupinganyina ne kumuambila ne: “Mvua mupitshile kuebe eku bua kukuleja mu mêyi makese bualu budi mu bibejibeji bimvua mukushile.” Bualu ebu budi mua kupesha muntu dijinga dia kubala tshiena-bualu kampanda. Bikalaye ukadi mamane kutshibala, udi mua kumuebeja tshidiye wamba bua tshiena-bualu atshi ne kuyukila nende mu minite mikese. Peshi bikala muntu musue kubala mikanda yetu, udi mua kumupinganyina bua kumupesha trakte, broshire anyi mukanda utudi tufila mu ngondo au.
4. Ntshinyi tshitudi mua kuikala tuenza ku musangu ne ku musangu bua kumanya bikala muntu utudi tushila bibejibeji ni mmusue kulonga Bible?
4 Kuindidi bua muntu akulombe bua kumulongesha Bible to. Mbimpe wewe umulombe. Nansha bikalaye ukavua mubenge bua kulonga Bible, udi mua kuikala uyukila nende ku misangu ne misangu tshiena-bualu tshia “Mandamuna a nkonko ya malu a mu Bible” tshidi mu Tshibumba tshia Nsentedi, bikalaye musue kuyukila nebe. Udi mua kutuadija kulonga nende bimanyine nansha kuulu. Kadi wewe kuyi ne mushindu wa kutuadija kulonga nende, udi mua kutungunuka anu ne kumushila bibejibeji bua kumujula dijinga.