Mua kuambuluisha bantu badi ne lutatu lua kubala
1. Kulonga Bible ne bantu badi ne lutatu lua kubala kudi ne lutatu kayi?
1 Bantu badi ne lutatu lua kubala badi mua kuitaba bua kulonga malu a Nzambi, kadi badi mua kutshina bua kulonga Bible ne mikanda yetu mikuabu. Kudianjila kupesha bantu ba nunku mukanda wa Bible ulongesha kakuena mua kupatula bipeta bimpe menemene to. Tshitudi mua kuenza bua kubambuluisha bua kumanyabu bulelela ntshinyi? Tuvua bakonke bamanyishi bapiluke ba mu matunga mashilangane mapite pa 20 bua kumanya tshitubu benza. Malu adibu bambe mmaleja mu bikoso bidi bilonda ebi.
2. Mmikanda kayi idi mikumbane bua kuambuluisha nayi bantu badi ne lutatu lua kubala?
2 Bikala mulongi ne lutatu lua kubala anyi kayi mumanye kubala, udi mua kutuadija kulonga nende broshire wa Teleja Nzambi peshi wa Teleja Nzambi bua upete muoyo wa tshiendelele. Mpanda-njila kampanda wa mu États-Unis utu uleja muntu broshire yonso ibidi, pashishe umukonka bua asungule udi umusankisha. Betele wa mu Kenya mmufunde ne: broshire eyi mmipatule bipeta bimpe mu ditunga edi, bualu mu Afrike bantu batu ne tshibidilu tshia kulondelangana miyuki bua kulongeshangana. Kabatu bayukidilangana mu nkonko ne mandamuna to. Nansha mudi muntu udi mulonge mua kuitaba dilonga dia kubala ne kuela nkonko, mushindu eu kawena mua kusankisha muntu udi mulonge kalasa kakese to. Patu bamanyishi ba bungi bapeta muntu udi mumanye kubala nansha kakese, batu batuadija kulonga nende broshire wa Lumu luimpe lua kudi Nzambi, wa Udi mua kulua mulunda wa Nzambi anyi mukanda wa Miyuki ya mu Mukanda wa Nzambi.
3. Mmalu kayi adi mua kutuambuluisha bua kulongesha bimpe bantu badi kabayi bamanye kubala?
3 Umuele kalumbandi: Bantu badi kabayi bamanye kubala badi mua kumvua bundu ne ba bungi kabatu badimona ne mushinga to. Misangu ya bungi, kuenza bua bikale badilekelele ke bualu bua kumpala budi mua kutuambuluisha bua kubalongesha bulelela. Bantu ba bungi badi kabayi bamanye kubala batu ne meji ne batu bakumbane bua kulonga. Ubanemeke, ubenzele malu ne bunême. (1 Pet. 3:15) Bobu bamone ne: udi wangata bionso bidibu benza ne mushinga ne badi baya kumpala mu malu a Nzambi, nebibasake bua kutungunuka ne kulonga. Nunku, ikala ubela kalumbandi ne muoyo mujima.
Bantu badi kabayi bamanye kubala badi mua kumvua bundu ne ba bungi kabatu badimona ne mushinga to. Misangu ya bungi, kubambuluisha bua bikale badilekelele ke bualu bua kumpala budi mua kutuambuluisha bua kubalongesha bulelela
4. Leja mutudi mua kukankamija bantu badi babala ne lutatu bua kudilongolola.
4 Nansha mulongi yeye kayi ubala bimpe, umukankamije bua ikala udilongolola. Bamue bamanyishi ba mu Afrike du Sud batu bakankamija balongi babu bua balombe muena mu dîku diabu anyi mulunda wabu kampanda udi mumanye kubala bimpe bua abambuluishe. Mumanyishi kampanda wa mu Grande-Bretagne utu ukankamija balongi bende bua kudilongolola padiye ubapesha wende mukanda bua bakonkonone bikoso bikese padibu balonga bua bamone mudibi bipepele bua kupeta mandamuna padiwu mela tushonyi. Muanetu wa balume kampanda wa mu ditunga dia Inde utu ulomba balongi bende bua kutangila bimfuanyi bidi mu dilongesha dikalabu mua kulonga lumingu ludi lulonda ne kudianjila kuelangana meji.
5. Mmunyi mutudi mua kuleja ne: tudi ne lutulu patudi tulonga ne muntu udi kayi ubala bimpe?
5 Ikala ne lutulu: Nansha nuenu nulonga mukanda kayi, wimanyine pa malu manene ne wambuluishe mulongi bua kuumvua bimpe. Mu matuku a ntuadijilu, bidi mua kuikala bitambe buimpe bua kuyukila ne muntu mu minite 10 anyi 15. Kukebi bua kulonga nende malu mapitepite bungi to, nulonge bikoso bikese patupu mu tshitupa tshionso. Mulongi yeye ubala bitekete bitekete, wikale ne lutulu. Padi dianyisha diende bua Yehowa dikola, udi pamuapa mua kulua kuakaja mushindu wende wa kubala. Bua kuambuluisha mulongi bua kuenza nunku, mbimpe kumubikila mu bisangilu anu panudi nutuadijilaku dilonga.
6. Leja tshitudi mua kuenza bua kuambuluisha bantu bua bamanye kubala.
6 Padi mulongi wa Bible umanya kubala, neaye kumpala ne lukasa. (Mus. 1:1-3) Bamanyishi ba bungi mbambuluishe balongi babu ne broshire wa Difila ku dibala ne difunda, bamulonga mu minite mikese ku ndekelu kua dilonga dionso. Mulongi yeye mutekete mu mikolo, udi mua kumutelela amue malu adiye wenza avuabu bamulongeshe, bua kumuambuluisha bua kudimona mukumbane. Umujadikile ne: Yehowa neabeneshe bionso bidiye wenza, ne umukankamije bua amulombe diambuluisha mu disambila. (Nsu. 16:3; 1 Yone 5:14, 15) Bamue bamanyishi ba mu Grande-Bretagne batu balomba balongi babu ba Bible bua kudifundila bipatshila bidibu mua kukumbaja kadi bidi bibambuluisha bua kuya kumpala. Tshilejilu, kumanya maleta a alfabe bimpe, kukeba mvese idibu bafile ne kuyibala; pashishe kubala mikanda idi kayiyi ne malu mapitepite bungi. Misangu ya bungi, kuambuluisha bantu bua kumanyabu kubala kutu kutulomba bua tubasake bua banange dibala, ki nganu kubalongesha mua kubala patupu to.
7. Bua tshinyi katuena ne bua kubenga kulongesha bantu badi ne lutatu lua kubala malongesha a mu Bible?
7 Yehowa katu upetula bantu badi balonge kalasa kakese to. (Yobo 34:19) Kadi utu ukeba tshidi mu muoyo wa muntu. (1 Kul. 28:9) Nanku, kubengi kulongesha bantu badi ne lutatu lua kubala malongesha a mu Bible to. Udi ne mikanda mimpe ya bungi iudi mua kutuadija nayi. Mu bungi bua matuku, udi mua kutuadija kulonga ne muntu mukanda wa Bible ulongesha bua apete dimanya dikumbane dia malu a mu Bible.