Bidimu 100 bia dimanyisha Bukalenge!
1. Ntshinyi tshivuabu balombe bantu ba Yehowa bua kuenza kukadi bidimu bitue ku lukama?
1 “Monayi, Mukalenge ukadi ukokesha! Nuenu ke bamanyishi ba malu ende. Nunku, manyishayi, manyishayi, manyishayi Mukalenge ne bukalenge buende.” Mêyi mimpe avua muanetu Rutherford muambe aa kukadi bidimu bitue ku lukama, akakankamija bantu ba Yehowa bua kumuangalaja mukenji wa Bukalenge miaba ya kule ku diambuluisha dia tudiomba. Ke tshituvua benze. Anu bu bena Kristo ba mu bidimu lukama bia kumpala, tudi bayishe lumu luimpe lua Bukalenge “munkatshi mua bifukibua bionso bidi muinshi mua diulu.” (Kolos. 1:23) Tupingajabi meji kakese mu bidimu lukama bishale ebi, mmalu kayi atuvua benze bua kumanyisha Bukalenge bua Nzambi? Bu mudi bidimu 100 bia mufikilu wa diledibua dia Bukalenge bikadi pa kukumbana, ntshinyi tshitudi mua kuenza bua kutungunuka ne kumanyisha Bukalenge ebu?
2. Mmushindu kayi udi mikanda yetu mitambe kuakula bua Bukalenge?
2 Tuvulukayi: Munkatshi mua bidimu bia bungi, mikanda yetu mmitambe kuakula bua Bukalenge. Katshia ku tshidimu tshia 1939, tshibejibeji tshietu tshinene tshitu amu ne tshiena-bualu tshia ne: Tshibumba tshia Nsentedi tshidi tshimanyisha Bukalenge bua Yehowa. Tshibejibeji etshi tshitu tshiakula misangu ne misangu bua Bukalenge ne tshienzabu. Tshibejibeji tshia Réveillez-vous! tshitu patshi tshileja ne: Bukalenge bua Nzambi ke ditekemena dimuepele bua bantu. Mbikumbane bushuwa bua bibejibeji bibidi ebi kuikalabi bidibu bakudimuna ne babanya bikole pa buloba bujima lelu.—Buak. 14:6.
3. Tela imue mishindu itudi benze nayi mudimu bua kumanyisha Bukalenge.
3 Bantu ba Yehowa mbenze mudimu ne mishindu mishilashilangane bua kumanyisha Bukalenge. Bakatuadija kuenza mudimu ne mashinyi a bikolokolo, tudiomba ne bisanji bia fono. Mishindu eyi yakatuambuluisha bua kufikisha lumu luimpe kudi bantu ba bungi musangu umue pavuaku bamanyishi ba Bukalenge bakese. (Mus. 19:4) Bidimu bidi panshi ebi, tudi bele malu mu site wetu wa jw.org, bua kumanyisha Bukalenge kudi miliyo ya bantu, too ne kudi aba badi mu matunga adibu bakandike mudimu wetu.
4. Mmishindu kayi ya pa buayi itudi tuyisha?
4 Bantu ba Yehowa mbenze mudimu ne mishindu ya pa buayi bua kumanyisha Bukalenge. Tshilejilu, kutuadijila munkatshi mua bidimu bia 1990, tuvua badienzeje bua kuvudija mudimu wetu wa kuyisha ku nzubu ne ku nzubu, tuvua tuyisha miaba ya dikishila, miaba idibu bimanyikila mashinyi, ne miaba ya midimu. Matuku mashale aa, tuvua balongolole mudimu wa diyisha dia pa buadi mu bimenga binene bia pa buloba bujima. Bena mu bisumbu bia bungi batu kabidi bayisha muaba utu bantu ba bungi mu teritware wabu, batu bateka mikanda pa mêsa ne pa bintu bikuabu mu mushindu wa kuikalayi mimueneke kudi bantu badi bapita. Bushuwa, mudimu wa ku nzubu ne ku nzubu utshidi anu mushindu wetu munene wa kuyisha.—Bien. 20:20.
5. Bantu ba bungi nebikale ne mpunga wa kuenza tshinyi mu tshidimu tshipiatshipia tshia mudimu?
5 Kumpala eku: Ku ntuadijilu kua tshidimu tshia mudimu tshipiatshipia mu ngondo wa 9, bantu ba bungi nebalue bampanda-njila ba pa tshibidilu. Neulue pebe mpanda-njila anyi? Wewe kuyi ne mushindu, kuenaku mua kuikala wenza mudimu bu mpanda-njila muambuluishi ku musangu ne ku musangu anyi? Nansha wewe ne mushindu wa kulua mpanda-njila anyi kuyi nawu, Yehowa neakubeneshe bua bionso biudi udipangisha bua kumanyisha Bukalenge bikole.—Mal. 3:10.
6. Ngondo wa 10 wa 2014 neikale ngondo wa pa buende bua tshinyi?
6 Ngondo wa 10 wa 2014, neikale ngondo wa mufikilu wa bidimu 100 bia diledibua dia Bukalenge. Mbikumbane menemene bua Tshibumba tshia Nsentedi tshia bantu bonso kutambatshi kuakula bua Bukalenge bua Nzambi. Katuenaku mua kuenza muetu muonso bua kutshipesha bantu ba bungi anyi? Bu mututshidi bindile, mbimpe yonso wa kutudi atungunuke ne ‘kuamba lumu luimpe lua Bukalenge bua Nzambi’ kudi bonso badi bateleja.—Bien. 8:12.