Yisha mukenji wa Bukalenge padi mpunga umueneka!
1. Ndilongesha kayi ditudi tupetela ku tshilejilu tshia Davidi?
1 Mukalenge Davidi kavua ulekela nsombelu wende umupangisha bua kuenza bualu kampanda to. Tshilejilu, Davidi uvua musue kuibakila Yehowa ntempelo. Pavua Yehowa mumubengele, Davidi wakakajilula bipatshila biende, yeye kulongolola bintu bivua mua kuambuluisha Solomo bua kuibaka ntempelo. (1 Bak. 8:17-19; 1 Kul. 29:3-9) Pamutu pa Davidi kuimanyina pa malu avuaye kayi mua kuenza, wakimanyina pa bivuaye mua kuenza. Mmushindu kayi utudi mua kuidikija tshilejilu tshia Davidi patudi tukeba mishindu ya kumuangalaja mukenji wa Bukalenge?
2. Mmunyi mudi muntu mua kudikonkonona?
2 Enza tshiudi mua kukokesha: Bantu ba bungi mbapepeje nsombelu wabu bua kuenza bumpanda-njila buambuluishi anyi bua pa tshibidilu. (Mat. 6:22) Udiku pebe mua kubafuana anyi? Paudi ukonkonona nsombelu webe ne muoyo mujima, udi mua kumona ne: mbankuzuluile “tshiibi tshinene tshidi tshifikisha ku mudimu.” Bikalabi nanku, babidila mpunga au.—1 Kol. 16:8, 9.
3. Nansha tuetu katuyi mua kulua ba mpanda-njila bua nsombelu wetu, mpunga kayi ya kuyisha itudi nayi?
3 Kadi tudi mua kuamba tshinyi bikala nsombelu webe ukupangisha bua kuenza bumpanda-njila? Kulenguludi mpunga mikuabu iudi mua kupeta nansha. Tshilejilu, bikala mudimu webe wa bianza ufikisha ku dituilangana ne bantu badi kabayi Bantemu, kuenaku mua kubabidila mpunga au bua kubayisha anyi? Peshi biwikala usama, kuenaku mua kuyisha bamunganga anyi? Manya ne: mbalongolole bua bantu badi kabayi ne mushindu nansha mukese wa kuyisha bualu bakadi bantu bakole anyi badi basama bikole bua bikale bafila luapolo lua minite nansha 15. Paudi ufunda luapolo luebe lua ku ngondo, uvuluke bua kufunda bungi bua mêba auvua muyishe pavua mpunga mumueneke, ne bungi bua mikanda, trakte, ne mabeji a dibikila nawu bantu mu Tshivulukilu ne mu mpungilu biuvua mufile. Bidi mua kukukemesha bua bungi bua mêba audi mua kupeta anu bua mpunga ivua imueneka bu mikese iuvua muyishe pavua mushindu mumueneke.
4. Udi mudisuike bua kuenza tshinyi?
4 Nansha nsombelu wetu muikale mushindu kayi, tubabidilayi tshikondo tshionso tshidi tshimueneka bua kuyisha lumu luimpe. Netupetelaku disanka dia kumanya ne: tudi tuenza tshionso tshitudi mua kuenza bua Bukalenge bua Nzambi.—Mâko 14:8; Luka 21:2-4.